Ezekhiyele 40
40
TXIWONISO TXA DITHEPELE
(Sipimo sa 40 kala 48)
Ezekhiyele a txi tsuliswa Jerusalema
1Ka dilembe da wu magumi mambidi ni mtxhanu da wukhumbi wathu, kukhatani ka dilembe, ka ditshiku da wugumi da mtxima, msana ka digumi da malembe ni mune ku di khundumusilwe didhoropa, ka dona ditshiku dile dipune, di tile txitimwi kwangu dianza da Mkoma di ta ni yisa Jesrusalema. 2Ngu txiwoniso txa Txizimu, di to ni yisa ditikoni ka Israyeli, di txi ya ni veka txitimwi ka mmango wo guleka ngutu; ku ti ti ni so fana ni didhoropa di nga akwa, txitimwi ka mimango, ngu didhawa da wulambwe. 3Di di ni hokisile hafuhi naso, ku to woneka txo fana ni m'thu wo fana ni koporo, na a di ni ngoti ya linyu manzani kwakwe, ni litshava lo pima ngu lona, a di emile ha txikeni.
4Se wamwamna wule a to khene kwangu:
Awe mwanana wa m'thu, wona ngu maso ako, u engisa ngu tinzeve tako, kambe veka mbiluni kwako totshe ti ni no ku wonisa; nguko kasi ku ta kukomba tona, awe u to tiswa hawa; zivisa koko ka nyumba ya ka Israyeli, totshe ti u no ti wona.
Ditimba da wutxani
5Se ku ti ti ni diguma do ranganyeta nyumba, ni litshava manzani ka wule wamwamna, lo pima ngu lona, lo dingana mtxhanu wa mikono ni wumwewo, la mkono ni mune wa titiho limwelo ni limwelo; se a to pima kuanama ka nyumba: Litshava limwelo kuanama, ni litshava limwelo kuguleka. 6Sekoko a to ta ka txike txo rendekela nzila ya wutxani, e kwela ngu madingo a kona; a to pima msasimo wa ditimba: Litshava limwelo kuanama; ka wumwani msasimo kambe: Litshava limwelo kuanama. 7Se ka nyumba ni nyumba ku ti ti ni mpimo wa litshava limwelo kulapha, ni litshava limwelo kuanama; se hagari ka tinyumba ku ti ti ni mtxhanu wa mikono; msasimo wa ditimba hafuhi ni ligubhagubha, wu ti ti ni litshava limwelo, ngu mndani ka kona. 8Kambe a to pima ligubhagubha la ditimba ngu mndani ka kona: Litshava limwelo. 9Sekoko a to pima wumwani wukhalo wa ditimba, wu nga ti ti ni mtxhanu wa mikono ni yiraru; se tisika ta kona: Mikono yimbidi, ni ligubhagubha la ditimba, ngu mndani ka kona. 10Se tinyumba ta sike so rendekela wutxani i ti ti tiraru ka didhawa dimwedo, ni tiraru ka dimwani didhawa, totshe i ti ti ta tipimo timweto; ni tisika ta diya didhawa ni dimwani i ti ti ta tipimo timweto.
11A to pima ni kuanama ka txike txa ditimba, i nga ti ti da digumi ka mikono; se kulapha ka ditimba: I ti ti ka digumi da mikono ni yiraru. 12Se wukhalo wa masoni ka tinyumba i ti ti ka mkono wumwewo, ni mkono wumwewo ka wukhalo wa dimwani didhawa; kambe nyumba ni nyumba yi ti ti ni mtxhanu wa mikono ka didhawa dimwedo, ni mtxhanu wa mikono ni wumwewo ka dimwani didhawa. 13A to pima ditimba kukhukhela txitimwi ka nyumba, kala txitimwi ka yimwani: Magumi mambidi a mikono ni mtxhanu kuanama, matimba o rendekelana. 14Kambe a to maha tisika ta mtxhanu wa magumi ni dimwedo a mikono, se ni m'hubhe kala ha ka sika, yo horoloka ditimba. 15Se kukhukhela masoni ka ditimba da txidingeni, kala masoni ka m'hubhe wa ditimba da mndani, ku ti ni mtxhanu wa magumi ni magumi mambidi a mikono. 16Ka tinyumba tile a to maha kambe mafasitela o seka, ni mu ka tisika, mndani ka ditimba do horoloka, ni mu ka mihubhe; kambe mafasitela ma ti ranganyetile ngu mndani ka kona, se amu ka tisika ku ti ni mitxhese.
M'hubhe wa hahanze
17A to ni yisa ka mthanda wa hahanze; kona eyo ku ti ti ni tinyumba ni wukhalo wu nga ti ti lulamisetwe ngu hahanze; ka wukhalo wule ku ti ti ni magumi mararu a tinyumba. 18Mthanda wa didhawa da matimba, wu ti ti fana ni kulapha ka matimba; se mthanda wu ti ti hahatshi ngutu.
19Se a to pima kuanama ka masoni ka wukhalo wa mndani ka kona, ngu hahanze: Dizana da mikono ngu didhawa da wutxani ka wulambwe.
Ditimba da wulambwe
20Se ngu ditimba dile di nga ti rendekete ka nzila ya wulambwe, ka wukhalo wa hahanze, a to pima kulapha ni kuanama ka kona. 21Se tinyumba ta kona i ti tiraru ka didhawa dimwedo, ni tiraru ka dimwani; tisika ta kona ni mihubhe ya kona i ti ti sa lipimo la m'hubhe wo khata; i ti ti wa kulapha ka mtxhanu wa magumi wa mikono, se kuanama i ti ti ka magumi mambidi a mikono ni mtxhanu. 22Kambe mafasitela akona ni mihubhe ya kona, ni mitxhese, i ti ti sa lipimo la ditimba di nga ti rendekete wutxani; se ku ti ti kwelwa kuya kona ngu mtxhanu wa sivango ni simbidi, m'hubhe wu ti ti masoni ka dona. 23Ku ti ti ni ditimba da mtendela wa mndani, masoni ka ditimba da wulambwe ni da wutxani; a to pima ditimba ni ditimba: Dizana wa mikono.
Ditimba da wuphemba
24Sekoko a to ni yisa ka nzila ya wuphemba, koneho ku ti ti ni ditimba di nga ti rendekete nzila ya wuphemba; a to pimeletela tisika ta kona, ni mihubhe ya kona, ngu tona tipimo tiya. 25Ku ti ti ni mafasitela o ranganyeta mihubhe, ni mamwani mafasitela; mtxhanu wa magumi wa mikono kulapha, ni kuanama ka magumi mambidi a mikono ni mtxhanu. 26Kuguleka ka kona i ti ti ka mtxhanu wa sivango ni simbidi, ni mihubhe ngu masoni ka kona; ku ti ti ni mitxhese ka didhawa dimwedo, ni wumwani ka dimwani didhawa kambe, amu ka tisika ta kona. 27Kambe ku ti ti ni ditimba ka mtendela wa mndani, ka nzila ya wuphemba; a to pima ditimba ni ditimba, ka nzila ya wuphemba: Dizana wa mikono.
M'hubhe wa mndani ka kona: Ditimba da wuphemba
28Sekoko a to ni yisa ka mtendela wa mndani, ngu ditimba da wuphemba; a to pima ditimba da wuphemba madingano ni tipimo tiya. 29Se tinyumba ta kona ni tisika ta kona, ni mihubhe ya kona si ti ti dingana tona tipimo tiya; kambe ku ti ti ni mafasitela o ranganyeta mihubhe; kulapha i ti ti ka mtxhanu wa magumi wa mikono, ni kuanama ka magumi mambidi a mikono ni mtxhanu. 30Kambe ku ti ti ni mihubhe yo ranganyeta; kulapha i ti ti ka magumi mambidi ni mtxhanu wa mikono, ni kuanama ka mtxhanu wa mikono. 31Mihubhe ya kona yi ti ka tshungameto ya mtendelani ka hahanze, kambe ku ti ti ni mitxhese amu ka tisika ta kona; ni kuguleka ko dingana mtxhanu wa sivango ni siraru.
M'hubhe wa mndani ka kona: Ditimba da wutxani
32Msana keto, a to ni yisa ka mtendela wa mndani, ka nzila ya wutxani, se a to pima ditimba madingano ni tipimo tiya; 33ni tinyumba, ni tisika ta kona, ni mihubhe ya kona, madingano ni tipimo tiya; kambe ku ti ti ni mafasitela o ranganyeta mihubhe ya kona; kulapha i ti ti ka mtxhanu wa magumi wa mikono, ni kuanama ka magumi mambidi a mikono ni mtxhanu. 34Se mihubhe ya kona yi ti ti ka mtendela wa hahanze; kambe ku ti ti ni mitxhese amu ka tisika ta kona, ka didhawa dimwedo ni dimwani; se kuguleka ka kona i ti ti ka mtxhanu wa sivango ni siraru.
M'hubhe wa mndani ka kona: Ditimba da wulambwe
35Sekoko a to ni yisa ka ditimba da wulambwe, se a txi di pima madingano ni tipimo tiya; 36sinyumbana sa kona ni tisika ta kona, ni mihubhe ya kona; kambe ku ti ti ni mafasitela o ranganyeta; kulapha i ti ti ka mtxhanu wa magumi wa mikono, ni kuanama ka magumi mambidi a mikono ni mtxhanu.
37Se tisika ta kona ti ti ti ka mtendela wa hahanze; kambe ku ti ti ni mitxhese amu ka tisika ta kona, ka didhawa dimwedo ni dimwani; se kuguleka ka kona i ti ti ka mtxhanu wa sivango ni siraru.
Tinyumba hafuhi ni ditimba da wulambwe
38Nyumba ya kona ni txike txo wulela ngu txona, si ti ti hafuhi ni tisika ta mihubhe, yile va nga txi kuwula ka yona miningelo ya kuhiswa. 39Ka m'hubhe wa ha txikeni, ku ti ti ni timeza timbidi ka didhawa dimwedo, ni timbidi ka dimwani, kasi kudayela ka tona miningelo yo hiswa, ni mningelo wa kudivalelwa ka txionho, ni mnandu. 40Se ngu didhawa do kwela ngu dona kuya ditimbani ka wulambwe, ku ti ti ni timeza timbidi; ka dimwani didhawa di nga ti ti ka m'hubhe wa ditimbani, ku ti ti ni timeza timbidi. 41Mune wa timeza ka didhawa dimwedo, ni timwani ta mune ka dimwani didhawa; madhawani ka ditimba, mtxhanu wa timeza ni tiraru, va nga ti daya ka tona sifuyo. 42Se mune wa timeza ta mningelo wa kuhiswa, i ti ti ta marigwi o vatelwa; kulapha nga mkono wumwewo ni hafu, ni kuanama ka mkono wumwewo ni hafu, ni kuguleka ka mkono wumwewo; txitimwi ka timeza, ku ti ti vekwa so daya ngu sona sifuyo sa mningelo wa kuhiswa, ni sa mphaxo. 43Se madhawani ka kona, ku ti ti ni kulapha ko dingana mune wa titiho, ti di vekilwe ngu mndani ka kona ti ranganyeta; kambe txitimwi ka timeza ku ti ti ni nyama ya mningelo.
44Ngu hahanze ka ditimba da mndani ka kona, ku ti ti ni tinyumba ta vaembeleli, ka mtendela wa mndani, wu nga ti ti ngu didhawa ka txike txa wulambwe, ngu kurendekela nzila ya wuphemba. 45Se ene a to khene kwangu: Nyumba yiya yi nga rendekela ka nzila ya wuphemba, nja vaphaxeli vo xayisa dithepele. 46Aniko nyumba yile yo rendekela ka nzila ya wulambwe, nja vaphaxeli vale vo xayisa txiluvelo; avava mbanana va Zadhoki, va tshuketako ka Mkoma, i ku vamwevo va vanana va ka Levhi, kasi ku mthumela.
M'hubhe wa mndani ka kona, ni Dithepele
47Se a to pima mtendela: Kulapha ka dizana wa mikono, ni kuanama ka dizana wa mikono, mune wa madhawa o dingana; txiluvelo txi ti ti ngu masoni ka dithepele. 48Sekoko a to ni yisa ka m'hubhe wa dithepele, eya pima sika yimweyo ni yimweyo ya m'hubhe: Mtxhanu wa mikono ka didhawa dimwedo, ni mtxhanu wa yona ka dimwani kambe; kuanama ka txike nga mikono yiraru ka didhawa dimwedo, ni yirarau ka dimwani didhawa. 49Kulapha ka m'hubhe i ti ti ka magumi mambidi a mikono, se kuanama i ti ti ka digumi da mikono ni wumwewo; ku ti ti kwelwa ngu sivango; kambe ku ti ti ni tiphande hafuhi ni tisika, phande yimweyo ka didhawa dimwedo, ni yimwani ka dimwani.
Currently Selected:
Ezekhiyele 40: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
