Ezekhiyele 41
41
1Sekoko a to ni yisa dithepeleni, eya pima tisika: Mtxhanu wa mikono ni wumwewo kuanama ka didhawa dimwedo, ni mtxhanu wa mikono ni wumwewo kuanama ka dimwani, i nga ti ti kuanama ka nyumba. 2Se kuanama ka txike i ti ka digumi da mikono; se madhawani ka txike, mtxhanu wa mikono ka didhawa dimwedo, ni mtxhanu ka dimwani; kambe a to pima kulapha ka mune wa magumi a mikono, se kuanama nga magumi mambidi a mikono.
3Se a to wulela nyumbani e pima sika ya ha txikeni: Ya mikono yimbidi; se txike: Mtxhanu wa mikono ni wumwewo, kuanama ka txike, mtxhanu wa mikono ni yimbidi. 4Kambe a to pima kulapha ka kona: Magumi mambidi a mikono, se kuanama magumi mambidi a mikono, masoni ka dithepele; se a to khene kwangu:
Akuwa, ngu Sawuleka ka Kusawuleka.
Makhaveti o khigetwa ka maseta a Dithepele
5Se a to pima diseta da dithepele: Mtxhanu wa mikono ni wumwewo, kuanama ka tinyumba ta madhawani, mune wa mikono, ngu kotshe hahanze ka dithepele. 6Se tinyumba ta madhawani, nyumba txitimwi ka nyumba, i ti magumi mararu a tinyumba ni tiraru, ti nga ti wulela ka diseta dile di nga ti gwesa dithepele ngu tinyumba ta madhawani ti nga ti ti di ranganyetile, kuva ti txi tsana ngu ona, nguko ti si tsana ngu diseta da dithepele. 7Kambe ku ti ti ni kuanama ka hombe, ni kuranganyeta tinyumba ta madhawani ni kuya masoni, nguko mkawu wa dithepele wu ti ti gulekile ngutu, ka otshe madhawa a dithepele; ngu kumaha keto, dithepele di ti ti ni kuanama ka hombe ngu txitimwi; se ngu ka nyumba ya hahatshi kuya txitimwi, ngu hagari. 8Se ni to wona taku ngu hahanze, dithepele di ranganyetilwe ngu makhalo o guleka; eko i ti ti sitsaniso sa tinyumba ta madhawani, ta lipimo la litshava lotshe: Mtxhanu wa mikono. 9Kuanama ka diseta da tinyumba ta madhawani ngu hahanze i ti ti ka mtxhanu wa mikono; se aha ku nga lekwa ku si nga ni txilo, i ti ti wukhalo wa tinyumba ta madhawani, ti nga ti ti hafuhi ni dithepele. 10Se ngu hagari ka tinyumba ku ti ti ni kuanama ka magumi mambidi a mikono, ngu kotshe hahanze ka dithepele. 11Sike sa tinyumba tile ta madhawani, si ti rendekete kheno ko mbi na txilo; txike tximwetxo ka nzila ya wuphemba, se tximwani txike ka didhawa da wulambwe; kasi kuanama ka wukhalo wule wo mbi na txilo, i ti ti ka mtxhanu wa mikono madhawa otshe.
Nyumba ya didhawa da mswa-ditambo
12Nyumba yiya ni yona yi ti ti ka wukhalo wule wo abaniswa, ka dikhona da nzila ya mswa-ditambo, wa kuanama ka mtxhanu wa magumi ni magumi mambidi wa mikono; se diseta da mswa-ditambo da kuanama ka mtxhanu wa mikono ngu madhawani; kulapha ka kona i ti ti ka mtxhanu wa mikono ni mune.
Mipimo yo enela ya Dithepele
13Se a to pima dithepele, da kulapha ka dizana wa mikono, kumweko ni wukhalo wo abaniswa, ni nyumba, ni maseta a kona: Dizana wa mikono. 14Kambe kuanama ka masoni ka dithepele, ni ka wukhalo wo abaniswa ngu kuya wutxani, ka didhawa dimwedo ni dimwani: Dizana wa mikono. 15Se a to pima kulapha ka nyumba, masoni ka wukhalo wo abaniswa, wu nga ti ti ngu msana, ni mikawu ya kona didhawa dimwedo ni dimwani: Dizana wa mikono, ni dithepele da mndani ka kona, ni mihubhe ya mtendelani.
Mazumbelo a Dithepele
16Mitshunzuti ni mafasitela o songa, ni mule ko tshuriselwa ngu msana kotshe kakuraru, ngu masoni ka msasimo, ku ti ti tshuletwe ngu mapulango madhawani ka kona; eko kukhukhela hahatshi kala ka mafasitela; ni ona mafasitela ma ti ti tshuletwe; 17kala ka wukhalo wa txitimwi ka ditimba, ni ka dotshe diseta di nga horoloka ngu mndani ni hahanze, kotshe ngu tipimo ta kona, 18se ku ti ti mahilwe ngu makerubhima ni mapulango a mitxhese yi nga ti ti hagari ka dikerubhima ni dikerubhima, dikerubhima dimwedo ni dimwani di ti ti ni tikhohe timbidi, 19i ku khohe ya wamwamna yi ti ti rendekete didhawa da mtxhese, se khohe ya txingonyamwana ka mtxhese wa dimwani didhawa; ti mahisile tona eto ka otshe madhawa a nyumba. 20Kukhukhela hahatshi kala txitimwi ka txike, ni disetani ka dithepele, ku ti ti veketetwe makerubhima ni mitxhese. 21Misasimo ya dithepele i ti ti ya mune wa madhawa o dingana.
Se masoni ka nyumba yo sawuleka, ku ti ti ni sa zumbelo yo fana ni misasimo.
Txiluvelo txa mapulango
22Txiluvelo txa mapulango i ti ti txa kudemba ka mikono yiraru, kulapha ka txona i ti ti ka mikono yimbidi, kambe txi ti ti ni makhona a kona; se txitsaniso ni maseta a kona i ti ti sa mapulango; se a to ni gela ku khene:
Ayiya i meza yi yi ku masoni ka Mkoma.
Matimba
23Se dithepele ni nyumba yo sawuleka si ti ti ni matimba amambidi. 24I ti ti ditimba do abaniswa ngu madhawa mambidi, madhawa mambidi; mambidi ka ditimba dimwedo ni mambidi ka dimwani. 25Kambe kumahilwe ka ona, matimba ale a dithepele, makerubhima ni mitxhese, nga tile ma nga ti ngu tona ha ka maseta, na ku di ni mnaneko wo dhimba wa dipulango, masoni ka m'hubhe ngu hahanze ka kona. 26Ku ti ti ni mafasitela o songa ni mitxhese, ka dimwedo ni dimwani da madhawa a m'hubhe, kumweko ni ka tinyumba ta dithepele, ni ka minaneko yile yo dhimba.
Currently Selected:
Ezekhiyele 41: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
