Ezekhiyele 42
42
Tinyumba timbidi hafuhi ni Dithepele
1Msana keto, a to ni humisa hahanze, niya ka wukhalo wa hahanze, ngu didhawa da nzila ya wulambwe; se e ni yisa ka tinyumba ti nga ti ti ngu masoni ka wukhalo wo mbi na txilo, ti nga txi maneka masoni ka nyumba, ngu didhawa da wulambwe. 2Txike txa wulambwe txi ti ni kulapha ka dizana wa mikono; se kuanama i ti ti ka mtxhanu wa magumi wa mikono. 3Ngu masoni ka magumi mambidi a mikono, ku nga ti ti ni m'hubhe wa mndani, ni masoni ka m'hubhe wa mtendela ku nga ti ti ni m'hubhe wa hahanze, ku ti ti ni wukhalo wo tshuriselwa wo rendekelana ni wumwani wukhalo wo tshuriselwa, wa sitezi siraru. 4Se ngu masoni ka tinyumba ku ti ti ni wukhalo wa digumi da mikono kuanama, ngu didhawa da mndani, ni nzila ya mkono wumwewo; se sike sa kona si ti ti rendekete didhawa da wulambwe. 5Tinyumba ta txitimwi i ti ti to patana ngutu; nguko ahawa, makhalo o tshuriselwa ma ti ti tekile wukhalo wa hombe ngutu, kupinda ale a hahatshi, ni ale a hagari ka nyumba. 6Nguko tona i ti ti ta sitezi siraru, kambe ti si nga ni tisika kufana ni tisika ta tigumbagumba; ngu mhaka yeto, kukhukhela hahatshi ti txo songa kupinda ta hahatshi ni ta hagari. 7Se diguma dile di nga ti ti ngu hahanze, ngu masoni ka tinyumba, ka nzila ya kuya ka ligumbagumba, masoni ka tinyumba di ti ti ni mtxhanu wa magumi wa mikono kulapha. 8Nguko kulapha ka tinyumba ti ti nga ti ti ka ligumbagumba la hahanze, i ti ti ka mtxhanu wa magumi wa mikono; se masoni ka dithepele ku ti ti ni dizana wa mikono . 9Ngu didhawa da hahatshi ka tinyumba tiya, ku ti ti ni txike ngu didhawa da wutxani, ngako u txi wulela ka tona ngu ligumbagumbani ka hahanze. 10A kheno ko anama ka diguma da ligumbagumba ka nzila ya wutxani, masoni ka wukhalo wa didhawa, ni masoni ka nyumba, ni kona ku ti ti ni tinyumba. 11Se nzila ya masoni ka tona, i ti yo fana ni tinyumba, kambe yi ti rendekete ka nzila ya wutxani; madingano ni kulapha ka kona, ni kuanama ka kona i ti toneto; ni sike so huma ngu sona si ti fana ni so wulela ngu sona, madingano ni kufana ka ona, ni madingano ni sike so wulela ngu sona. 12Nga kule sike so wulela ngu sona tinyumbani, si nga ti ti rendekete nzila ya wulambwe, ku ti ti ho kambe txike txo wulela ngu txona ngu txitimwi ka nzila, ka nzila ya masoni ka diguma da txinene, ka nzila ya wutxani, ngako ku txi wulelwa ngu ka tona.
13Sekoko a to khene kwangu:
Tinyumba ta wuphemba ni tinyumba ta wulambwe, ti manekako ka wukhalo wa didhawa da kusawuleka, ndinyumba to sawuleka, emo vaphaxeli va no dyela kona silo so sawuleka ngutu; va na veka kona eyo silo so sawuleka ngutu, ni miningelo ya kudyiwa, ni ya kudivalelwa ka sionho, ni ya kudivalelwa mnandu; nguko wukhalo mbwo sawuleka. 14Ngako vaphaxeli va txi wulela, kha va na mbi huma ka wukhalo wo sawuleka, va txi ya ka ligumbagumba la hahanze, aniko va na veka kona syambalo sawe sile va nga thuma ngu sona, nguko sona ngu sawuleka; se va ti ambeka simwani syambalo, va txi tshuketa ka wukhalo wu lumbako vathu.
Mipimo ya wukhalo wa Dithepele
15Se a di hetile kupimeletela mndani ka dithepele, a to ni humisa ngu nzila ya ditimba do rendekela nzila ya wutxani; se a to pima hahanze ka kona. 16A to pima didhawa da wutxani ngu litshava lo pima ngu lona: 500 wa tipimo a nga pima ngu litshava lo pima ngu lona. 17A to pima kambe didhawa da wulambwe: 500 wa tipimo ngu litshava lo pima ngu lona. 18A to pima kambe didhawa da wuphemba: 500 wa tipimo ngu litshava lo pima ngu lona. 19A to horoloka eya ka didhawa da wuphemba, eya pima 500 wa tipimo ngu litshava lo pima ngu lona. 20A to pima otshe madhawa a mune; kambe ku ti ti ni diguma madhawani, da 500 wa tipimo kulapha, ni 500 kuanama, kasi kuabanisa so sawuleka ni so nyenyeza.
Currently Selected:
Ezekhiyele 42: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
