Vagalatiya 3
3
Mwendo Mlayo mwendo likholo
1Oh! Vagalatiya, maphuphulunu, i mani a nga mi xenga, anu vava Jesu Kristu a nga txhumayelwa masoni kwanu, nga mi to mu wona a txi gogotelwa ha txihambanoni, kani? 2Hi ngani ni gela mhaka yiya: Mi amukete Moya ngu mhaka ya kuvekisa Mlayo mwendo ngu mhaka ya kuamukela mahungu a likholo, kani? 3Kasi mi maphuphulu o nga tiya? Anu mi nga khata ngu Moya, se konkuwa i mmidi wu mi hokisa kuhetisekani kani? 4Ati ta hombe ti nga mi humelela ti nga va i di ta walo kani? Tona kha ta nga va ta walo! 5Awule a mi ningako Moya, a txi maha sidiwukiso hagari kwanu, ina a maha eto ngu mhaka ya kuvekisa Mlayo mwendo ngu mhaka ya kuva mi di engisile mahungu a likholo kani? 6#Wona ni ka: Gen. 15:6; Var. 4:3. Nguko “Abrahamu a khotwe ka Txizimu, se ngu kota yeto, a manekile i di wo lulama.”
7 # Wona ni ka: Var. 4:16. Ngu konaho, ti ziveni ti to ava va kholwako ngu vona i ku vanana va Abrahamu. 8Mibhalo ni yona, ngu kusongolela ku ti wona ti to Txizimu txi na hundulusa vamatiko ve maha valulami ngu kukholwa, yi zivisile ka Abrahamu mahungu awa amanene, yi txi kha yona: “Yotshe mifumo yi na katekiswa ngu kota yako.” 9Ngu toneto, ava va kholwako va katekiswa kumweko ni Abrahamu, i ku dikholwa.
10Nguko vavekisi va Mlayo, votshe va maneka hahatshi ka kuruketelwa, nguko ti bhatwe taku: “A ruketetwe wuhi ni wuhi asi vekisiko sileleto sotshe si si nga bhalwa dibhukuni ka Mlayo.” 11Ti ha kubasani tito, ngu mhaka ya Mlayo, awalo wu a no va a di lulamile masoni ka Txizimu, nguko ti bhatwe va txi kha vona: “Awule i ku wo lulama, ngu kukholwa a na hanya.” 12Ngu konaho Mlayo ni likholo kha si tsimbili ngu nzila yimweyo; nguko Mlayo wu womba tiya: “M'thu a hanya ngu kuvekisa sileleto sa Mlayo.”
13Kristu a dihile kasiku a txi hi tirula ka dikhombo da kuruketelwa ngu Mlayo, ene a ti mahile wo ruketelwa ha wukhaloni kwathu, nguko Mibhalo yi kha yona: “A na ruketelwe wuhi ni wuhi a nga hayekwa ha phandeni.” 14Atiya ti mahekile kufela ku kateko ya Abrahamu yi txi hokela vamatiko ngu Jesu Kristu, se ngu konaho nathu hi txi mana kuamukela ngu likholo wona Moya, i ku txihiwa txi txi nga thembiswa.
Mlayo ni txithembiso
15Vanathu, ni na mi dinganisela ngu txiheno txa kuhanya ka m'thu: Ngako txitumelelano txokari txi di mahilwe ngu tifanelo txi tsana, awalo wu a sikotako ku txi fuvisa, hambi kuengetela timwani txitimwi ka txona. 16Se sithembiso si mahilwe ka Abrahamu ni liveleko lakwe; Mibhalo kha yi wombisi ku “tiveleko takwe,” nga to va ta vathu vavangi; aniko yi ti “ni ka liveleko lako,” ati ti wombako m'thu mmweyo, i ku Kristu. 17Ati ni wombako ngu tiya: Txitumelelano txiya txi nga tsaniswa kale ngu Txizimu kha txi na kufuviswa ngu Mlayo, awu wu nga ta msana ka 450 wa malembe, ni txithembiso txa kona kha wu na ku txi fuvisa. 18#Wona ni ka: Var. 4:16. Nguko, ngako thomba yi txi ningwa ngu mhaka ya kuveketa Mlayo, kha yi ngadi yi ningwa ngu mhaka ya txithembiso; kasi Txizimu txi ningile Abrahamu thomba ngu txithembiso dwe. 19Idito, Mlayo wu thumile txani kani? Wu ningilwe msana ka mbimo ngu mhaka ya wuhambunyeti, kuza kuhumelela lixaka li, txithembiso txi nga mahelwa lona. Mlayo wu tisilwe ngu tingelozi manzani ka mtshanganisi.#3:19 Mtshanganisi: Paulo ahawa a womba Mosi. 20Se mtshanganisi kha tshanganisi m'thu mmweyo dwe. Kasi Txizimu txona njimwetxo dwe.
Mthumo wa Mlayo
21Ngako i di toneto, Mlayo wu lwa ni sithembiso sa Txizimu kani? Lambi! Nguko, idiku ku ti ko ningwa mlayo vathu, awu wu sikotako kuhanyisa, kunene vathu va ndi na maha valulami ngu kuvekisa mlayo. 22Aniko mibhalo yi womba ti to sotshe si sungilwe ngu txionho, kasiku txithembiso txi ningwa ka va va tumelako ngu kukholwa ka Jesu Kristu.
23Na likholo li sinzi kuhoka, hi ti ti seketwe hahatshi ka Mlayo, hi txi rinzela kuwonekiswa ka lona likholo. 24Ngu konaho, Mlayo ngu wona wu nga va m'gondisi wathu kala kuhoka ka Kristu, ti to hi mana kumahwa valulami ngu likholo. 25Se li di hokile likholo, kha hi swi hi txi fumwa ngu m'gondisi.
26Nguko anu motshe mi vanana va Txizimu ngu kukholwa ka Kristu Jesu. 27Motshenu mi nga bhabhatiselwa kwakwe Kristu, mi ambate Kristu. 28Kha kuswi ku di ni Mujudha mwendo Mugriki, kha ku na khumbi mwendo mthuseki, kha ku na wamwamna mwendo wamsikati, nguko motshenu mi vamwevo ngu ka Kristu Jesu. 29#Wona ni ka: Var. 4:13. Se ngako mi di va ka Kristu, ngu konaho mi liveleko la Abrahamu, mi sidya-thomba ngu mhaka ya txithembiso.
Currently Selected:
Vagalatiya 3: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.