Vagalatiya 4
4
1Se konkuwa ani na womba ku khani: Wu i ku txidya-thomba kungako i di ngadi m'dotho, kha hambani ni wu i ku txithumi, hambiko i ku nyane wa thomba yotshe. 2A na zumba hahatshi ka va va m'xayisako ni vawoneleti va thomba yakwe, kala kuhoka ditshiku di di nga sikelwa ngu tate wakwe.
3Mbimo yi hi nga ti sinzi kukula, moyani, nathu hi ti ti fana ni sithumi, hi fumwa ngu sa ha mafuni hawa. 4Mbimo yi txi nga hoka txikhati txa kona, Txizimu txi rumete Mwanana wa txona, a nga velekwa ngu wamsikati, a nga tumela kufumwa ngu Mlayo, 5#Wona ni ka: Var. 8:15-17. kufela kutirula avale va nga ti hahatshi ka Mlayo, ti to ni nathu hi mana kumaha vanana va Txizimu. 6Se ngako mi ku vanana, Txizimu txi rumete timbiluni kwanu Moya wa Mwanana wa txona, awuwa wu kwangulako wutxi: “Abba, Tata!” 7Ngu mhaka yeto, khuswi u di txithumi, aniko u mwanana. Ngako u ku mwanana, u txidya-thomba ngu kateko ya Txizimu.
8Kambe, kale ngu ku ambi ziva Txizimu txa ditshuri, mi khozete sizimu so va i si nga sa txilo. 9Aniko konkuwa, ngako mi txi zivako Txizimu, mwendo, ngu mawombelo a txhuko, ngako mi ziwako ngu Txizimu, ti mahisa kutxani kutshumela kambe mi ya ka sa ku ambi na mtamo ni sa wusiwana, mi lava ku ti maha sithumi sa sona kani? 10Ma vekisa kha kwati masiku ni mitxima ni tinguva ni malembe. 11Na thava ti to na nda va ni di timisete mikaralo ngu nganu mahala.
Paulo a khutalela Vagalatiya
12Na mi khongotela, vanathu, ti to mi fana ni nani, kufana ni kuwa nani ni nga phinduka ni txi fanana ni nanu. Kha ma ni onhela ngu ta txilo. 13Ma tiziva ta tinene ti to malwati ma nga ni ninga mbimo ya kuta khata ku mi txhumayela Evhangeli. 14Kambe anu kha ma komba ku ni nyenya mwendo ku ni vengela, hambiko malwati angu i nga ti txiduko kwanu; aniko mi ni amukete kota mtumi wa Txizimu, kota nga Jesu Kristu apune. 15Se konkuwa ku hanini kutsaka kwanu kani? Nguko ni nga mi mahela wufakazi wa tito, idiku i ti kale kwanu, hambi maso anu nga mi di ma xokote mi txi ni ninga. 16Se konkuwa ni phindukile ni txi maha mlala kwanu, nguko ni nga mi gela ditshuri kani?
17Vathu vale vamwani va mi khutalelako, kukhutala ku va ku nako ngu nganu, hi nga ka ditshuri; ati va lavako tona ngu ku mi hambanisa ni nani, kasiku anu mi khutalela vona. 18Aniko ati i ku tona, khutalelani wunene yotshe mbimo, mi nga maheni wunene ngu kuva ni di hafuhi ni nanu dwe. 19Vanavangu, na pandiseka ta tinene ngu nganu, kufana ni wamsikati wu a lumwako ngu kulava kuhefemula, kala kuza txiemo txa Kristu txi woneka hagari kwanu. 20Ni ti navela kumaneka ni di konkheyo kwanu, kasi kuwombawomba ni nanu ngu yimwani nzila, nguko kha ditshuri na karateka ngu nganu.
Paulo a fananisa ngu Hagari ni Sara
21Anu mi lavako kufumwa ngu Mlayo, hingani ni gela, mwendo ma tiziva ti Mlayo wu wombako tona kani? 22#Wona ni ka: Gen. 16:15; 21:2. Nguko Mlayoni kubhatwe ti to Abrahamu a velekile vanana vambidi va mazambi; mmweyo a velekile ni msikati wu i nga ti khumbi, mmwani a velekile ni msikati wu wo tekana nayo, i nga ti si nga khumbi. 23Se mwanana wa wamsikati wule wa khumbi, a velekilwe ngu kuranda ka nyama, kasi mwanana wa wule wo tekwa a velekilwe ngu mhaka ya txithembiso. 24Ahawa ku ni txidinganiso; vavasikati vava, kunene, nzitumelelano sa simbidi: Txitumelelano txo khata ngu txi txi khukhelako Sinayi; ngu txi txi velekako vanana va wukhumbi: I Hagari. 25Se Hagari i mmango wa Sinayi, ditikoni ka Arabhiya; ene njifananiso txa Jerusalema wa konkuwa, a manekako wukhumbini kumweko ni vanana vakwe. 26Aniko Jerusalema wa nzumani, eyo a khululekile, ngene i ku mame wathu, 27nguko ti bhatwe va txi kha vona:
“Tsaka, awe txifule, awe u ku si nga ni vanana;
peka mkulungwani wa litsako, awe u si ziviko kulumwa ka kuveleka;
nguko mbavangi ngutu vanana va wule a nga lekwa,
kupinda va wule a ku ni mwamna.”
28Kasi anu, vanathu, kufana ni Isaake, nanu mi vanana va txithembiso. 29Aniko, kufana ni txikhati txa kale awule wo velekwa ngu kuranda ka nyama a nga ti ti vengela wu a nga velekwa ngu Moya, i ngadi toneto kala ni nyamsi.
30 # Wona ni ka: Gen. 21:10. Kambe mibhalo yi womba txani kani? Yi womba tito: “Tovela wamsikati wa khumbi ni mwanana wakwe, nguko mwanana wa khumbi, kha na mbi dya thomba kumweko ni mwanana wa wule wo tekwa.” 31Ngu toneto, vanathu, athu kha hi nga vanana va wule wa khumbi, aniko hi vanana va wule wo tekwa.
Currently Selected:
Vagalatiya 4: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.