Vahebheru 1
1
Dipswi da Txizimu ngu Mwanana wa txona
1Txizimu, ngu sikhati so tala ni mamahelo o tala, txi wombawombile kale ka vatate vathu, ngu sisofu sa vaprofeti, 2Konkuwa, masikwanano, txi wombawombile kwathu, ngu Mwanana wa txona, awu txi nga mmaha txidya-thomba txa sotshe, awu kambe txi nga maha nzuma ni mafu ngu ngene. 3Ene, ngako i ku liwoningo la wudhumo wa Txizimu, ni txikombiso txa wudhumo wa txona, awu a hiketako sotshe simaha ngu mtamo wa dipswi dakwe, msana ka kuva a di gwitile kukuwula sionho, a ti ya zumba txineneni ka wuhombe wa Nyatxitimwi nzumani 4Mwanana mbwa hombe ngutu kupinda tingelozi, Txizimu txi mningile ditina da hombe, kupinda tona. 5#Wona ni ka: Mas. 2:7; 2 Sam. 7:14; 1 Mak. 17:13. Nguko, ngu ka yihi ngelozi Txizimu txi nga womba txi txi kha txona: “Awe u Mwanana wangu, ni ku velekile nyamsi,” kani? Na kambe txi txi kha txona: “Ani ni na va ni di Tate wakwe, ene a na va Mwanana wangu,” kani? 6Na kambe, ngako Txizimu txi rumela Mwanana wa txona ha mafuni txi ti kha txona: “Totshe tingelozi ta Txizimu ti na mkhozele.” 7#Wona ni ka: Mas. 104:4 (LXX). Se ngako Txizimu txi txi womba ngu tingelozi, txi ti kha txona: “Txizimu txi mahile tingelozi ta txona kota mimoya, ani sithumi sa txona, txi si mahile midhikila ya mndilo.” 8#Wona ni ka: Mas. 45:6-7. Kambe ngako txi txi womba ngu Mwanana, Txizimu txi wombisa tiya: “Txiluvelo txako, awe Txizimu, txi tsani kala kupinduka, se ndonga yako ya wukoma i ndonga ya kululama. 9U randile wululami, u txi venga wubihi; ngu toneto, Txizimu, Txizimu txako, txi ku totile mafura a litsako kupinda votshe vangana vako.” 10Se txi txi kha txona: “Ngawe, Mkoma, u nga va nga mafu kukhatani; tinzuma nitona mthumo wa manza ako. 11Sotshe si na lova, kambe awe khu na magwito; sotshe si na sakala kufana ni syambalo. 12Sotshe u na si peta kufana ni didhamba, si na kutxuka kufana ni syambalo, kambe awe u ku eneyo wammweyo, wutomi wako kha wu na mbi guma.” 13Mwendo ngu ka yihi ngelozi, Txizimu txi nga yi gela, hambi ditshiku da dimwedo, txi txi kha txona: “Khalahatsha txineneni kwangu, kala kuza ni maha ava i ku valala vako txikhigelo txa mikondo yako,” kani? 14Ina tingelozi totshe hi nga mimoya yi yi thumako mithumo, ayi yi nga rumelwa kuthumela avale va fanelako kuamukela thomba ya kuhanyiswa, kani?
Currently Selected:
Vahebheru 1: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
