Filimoni 1
1
Kulosa
1Ani Paulo, txibotxhwa ngu mhaka ya Jesu Kristu, ni mwanathu Timoti, hi bhalela awe Filimoni, m'vhuneteli wathu wo randeka ngutu, 2#Wona ni ka: Vakl. 4:17. ni ndiyathu Afiya, ni ndena kulothu Arkipo, ni ka Dibanza di di sengeletanako nyumbani kwako.
3Kateko ni kudikha si nave ni nanu, si txita ngu ka Txizimu Tate wathu, ni ka Mkoma wathu Jesu Kristu.
4Yotshe mbimo na bonga ka Txizimu txangu, na ni txi kualakanya mikombeloni kwangu. 5Nguko, na engisa va txi womba-womba ngu lirando lako, ni likholo li li ku ningako mtamo masoni ka Mkoma Jesu ni ka votshe vasawuleki. 6Ani ni kombela ti to likholo li u sengelako ka lona ni vamwani li na ku ninge kuziva totshe ti hi fanelako ku ti maha ngu lirando ka Kristu. 7Kha ditshuri, mwanathu, ni mani kutsaka ka hombe ni kuthavelelwa ngu mhaka ya lirando lako, nguko, mwanathu, timbilu ta vasawuleki ti tsanisilwe ngu ngawe.
Paulo a kombelela Onesimu
8Ngu konaho, hambiko ni ku ni yotshe fanelo ngu ka Kristu, ya ku ku kurumeta ati ti lavekako, 9ni randa kumaha ngu ku kukombela ngu lirando. Ani Paulo, wo kumba nga tiya, na kambe ni di ku khotelwani konkuwa ngu mhaka ya lirando la Jesu Kristu, 10#Wona ni ka: Vakl. 4:9. na ku kombela ngu mwanana wangu Onesimu, awu ni nga m'veleka ni di mkorani. 11Awu, kale a nga ti si vhuni txilo kwako, kambe, konkuwa, a vhunako ngutu, kwako ni kwangu.
12Na mtshumeta e wuya kwako; ati ti fanako ni ku kurumela mwanana wo veleka nipune. 13Ani ni ti navela ku m'zumbisa kheno ni nani, a txi kutsiveta ka mthumo wa ku ni vhunetela, ku khotelwani muwa ni ku kona, ngu mhaka ya Evhangeli. 14Aniko, kha na lava kumaha txilo, na ni sa thanga ngu kuengisana ni nawe, kasiku mthumo wako wa wunene wu si fananiswi ni wo kurumetwa, kambe u txi wonwa awe ti to u wu mahile ngu kuranda ka mbilu. 15Nguko, tximwani txikhati a tekilwe kwako ngu mbimonyana ya yidotho, kasiku u txi tshumela u mmana do gwita, 16na i si nga ngadi khumbi, aniko a txi va i di wu a pindako khumbi, mwanathu wo randeka, kambe ene mbwo randeka ngutu kwangu, ngutu-ngutu kwako nawe, a na va i di wo randeka ngu ka wuthu ni ka Mkoma. 17Ngu konaho, ngako u txi ni maha mngana-kuloni, mu amukele nga wo ni amukela ani nipune. 18Ngako ene a di ku luzisile txokari, mwendo kutxeneka txomaha, eto ti veke ka sikweneti sangu. 19Ani Paulo, ni ku bhalelako ngu txyanza txangu, ngani ni no dihela. Kha ni ku alakanyisi ti to na nawe u na ni txikweneti kwangu, txikweneti txa kona ngu ngawe ngu wutumbu wako. 20Ina, mwanathu, ni na mane kutsakiswa ngu ngawe ka Mkoma. Thavelela mbilu yangu ngu ka Kristu. 21Ni kubhalela na ni di ni kuthemba ko tsana ti to wa engisa, ni kuziva ti to u na maha to pinda ati ni ku kombelako.
Madingula o salisa
22Seni kambe, ni lulamisele wukhalo wo nata zumba ka wona, nguko ngu konaho ka mikombelo yanu, na themba ti to ni na tshumetwa ni txi wuya kheyo kwanu.
23Wa kudingula Epafrasi txibotxhwa kulothi ngu ka Kristu Jesu. 24#Wona ni ka: Mith. 12:12,25; 13:13; 15:37-39; 19:29; 27:2; Vakl. 4:10; 2 Tim. 4:10,11. Kumweko ni Marku ni Aristarkusi, ni Dhemasi ni Luka, sithumi kulothi.
25Kateko ya Mkoma wathu Jesu Kristu, yi nave ni moya wanu.
Currently Selected:
Filimoni 1: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.