Hoseya 10
10
Kukhundumuswa ka siluvelo sa wuhedheni kona Israyeli
1Israyeli m'vhinya wo txhuma ngutu; u veleka mihando ya wona; madingano ni kutala ka mihando ya wona, kufana ni toneto andisile siluvelo sakwe; mdingano ni kunona ka mafu, va mahile sifananiso sa sinene so wumbwa. 2Timbilu tawe ti abanekile; ngu kumaha keto, va na va ni mnandu; a na wilela siluvelo sawe, e khundumusa ni sifananiso sawe so wumbwa. 3Kha ditshuri, konkuwa va na kha vona: Kha hi na mfumeli, nguko kha hi thavi Mkoma; A di na hi mahela txani mfumeli kani? 4Va andisile mapswi, ve xambanya makuhu, ve maha txitumelelano; Konaho, yi na tshura mialakanyo ku nga txihya amu tithembweni. 5#Wona ni ka: 1 Vafu. 12:28-29. Vahanyi va Samariya va dhuswa ngu dirole da Bheti-Avheni, ngu kumaha keto, vathu va kona va na tilaya ngu mhaka yakwe, kufana ni vaphaxeli vawe (va nga ti tsaka ngu dona), se ngu mhaka ya wudhumo wu nga khukha ka dona. 6Nene Asiriya a na tekwa ku nga txiningo ka mfumeli Jerebhi; Efrayime a na vhilinganyeka, se Israyeli a nawa tingana ngu mhaka ya milayo yakwe apune. 7Mfumeli wa Samariya a na hoxotwa, kufana ni diphutu txitimwi ka mati. 8#Wona ni ka: Luk. 23:30; Mtu. 6:16. Se mimango ya Avheni, i ku txionho txa Israyeli yi na khundumuswa; mipa ni maxexo si na kula txitimwi ka siluvelo sawe; se va na kha vona ka mimango: Hi fenengeteni! Se ka simangwana: Welani txitimwi kwathu!
Txizimu txa tsayisa Israyeli
9Kukhukhela ka masiku a Gibheya, u onhile awe Israyeli; mi zumbile kona haleya; kulwa kona Gibheya ni vanana va wubihi kha ku na mbi mi juma. 10Ani ni na va tsayisa ngu mpimo wa kunavela kwangu; se matiko ma na va sengeletana me lwa navo, ngako va txi na sungwa ka sihambunyeto sawe.
11Nguko Efrayime dirole da dithokazi di nga fuywa, di dhundako kuhula; ni woni kutshura ka thamo yakwe; ni na mmaha e gadhwa Efrayime. Judha a na dima, kambe Jakobe a na zuzela. 12Tiphayeleni wululamo, mi funyela madingano ni wumbilu, dimani thembwe ya wudimo, nguko i mbimo yo lava Mkoma, kala kuza e ta, kunane kululama txitimwi kwanu. 13Mi dimile manyala, mi funyela wubihi, kambe mi dyite mihando ya makuhu.
Nguko u thembile nzila yako, ka mtalo wa tindena tako. 14Ngu toneto, hagari ka vathu vako ku na wuka dizunga da hombe, se yotshe mikhokhola yako mi na hoxotwa, ku nga Salimani a nga hoxota Bheti-Arbheli ngu ditshiku da yimbi; mame ahale a phatuletwe ni vanana vakwe. 15A na mi maha toneto Bheteli, ngu mhaka ya wubihi wanu; mfumeli wa Israyeli, ngu mabimbi-kutxa, a na hoxotwa do gwita.
Currently Selected:
Hoseya 10: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.