Valamuli 18
18
Mika ni lihunzu la ka Dhani
1Ka ona ale masiku, ku ti si nga ni mfumeli Israyeli, se ka masiku oneyo lihunzu la ka Dhani, li ti ti lava ditiko do aka ka dona; nguko kala ka dona ditshiku dile, va ti sanzi kuabaniselwa ditiko, hagari ka tihunzu ta ka Israyeli. 2Se vanana va ka Dhani, va to rumela ngu ka lihunzu lawe, mtxhanu wa vavamna va tindena, va mihinganoni kwawe, va kuta ngu Zora ni Exitawoli, kasi kuya xola ni kuya ziva ditiko; se va to va gela ku kha vona: “Tsulani mi ya zivisisa ditiko.” Va to tsula mmangoni ka Efrayime, kala m'tini ka Mika, eho va nga ya otela kona. 3Se mbimo yile va di hafuhi ni nyumba ya Mika, va to pfa dipswi da dijaha dile da Mulevhi; ve tshuketela hafuhi, va txi ya kha vona: “I mani a nga kutisa hawa kani?
Njitxani u mahako kona hawa, niku nji txani u ku natxo kona hawa kani?”
4Se ene a to va xamula ku khene:
“I Mika a nga ni mahela tiya ni tiya; ene koko wa holela, se ani na mthumela ka wuphaxeli.”
5Sekoko va to m'gela va txi kha vona:
“Ti di ngeto, wotisa ka Txizimu, kasi ku hi ziva ti to mwendo nzila yi hi yi tekako, yi na hi bhindulela.”
6Se mphaxeli a to va xamula a txi khene:
“Tsulani ngu kudikha; nguko nzila yi mi nga yi teka yi masoni ka Mkoma.”
7Sekoko vavamna vale va mtxhanu va to khukha ve tsula Layisi; se va to wona taku vathu vale va nga ti tiho hagari ka dona va ti ti tsani, madingano ni tolovelo ya Vasidhoni, vo ti malalela ni kuthembana; ku ti si nga ni mfumeli ni wammweyo, waku ngu mhaka yokari, a txi xupha ni wammweyo ka ditiko dile; kambe va ti ti kule ni Vasidhoni, se va ti si nga ni mhaka ni mmwani m'thu. 8Sekoko va to tshumelela ka vanawe, kona Zora ni Exitawoli; se vanawe va to va wotisa va txi kha vona: “Miwomba txani anu kani?” 9Se vona va to kha vona:
“Khukhani, he tsimbileni hi txi ya va wukela; nguko hi xote ditiko, se hi wona ti to dinene ngutu; mi ngadi mi verela txani kani? Mi nga kanakaneni kutsula mi txi ya teka ditiko diya. 10Mbimo yile mi no ya hoka, mi na ya mana vathu vo thembeka, kambe ditiko ndo anama ngutu; nguko Txizimu txi di ningete manzani kwanu; mbukhalo wu ku si pwatekiko ni txa tximwetxo, ka sile si kuho ha mafuni.”
11Sekoko ku to khukha vavamna va lihunzu la ka Dhani, ngu Zora ni Exitawoli, va di xomile matxhari. 12Se va to kwela va txi ya gova Kiriyate-Jeyarimi, kona Judha; ngu mhaka ya eto, wukhalowo va to wu dhana ku i Mahane-Dhani, kala ka ditshiku da nyamsi; wukhalowo wu maneka msana ka Kiriyate-Jeyarimi. 13Se kukhukhela konaho, va to tshawunyeta mmango wa Efrayime, kala va txi ya hoka nyumbani ka Mika.
14Sekoko vavamna vale va mtxhanu va nga ya xola ditiko da Layisi, va to xamula ka vanawe va txi kha vona:
“Ina ma tiziva taku, tinyumba mule ku ni efodhe yimweyo, ni titerafime, ni txithombe tximwetxo txo vatwa, ni tximwani txo wumbwa kani? Wonani koko konkuwa, ati mi no ti maha.”
15Sekoko va to tsula veya hoka nyumbani ka dijaha dile da Mulevhi, i ku nyumbani ka Mika, se va to mlosa. 16Se vavamna vale va 600, i nga ti ti vanana va ka Dhani, na va ti xomile matxhari, va to zumba txidingeni. 17Sekoko na va di kwelete vavamna vale va mtxhanu, avale va nga ti tsute kuya xola ditiko, va to wulela nyumbani, veya teka txithombe txo vatwa, ni efodhe, ni titerafime, ni txithombe txo wumbwa, na mphaxeli a di emile ha txidingeni, kumweko ni 600 wa vavamna vale va nga ti xomile matxhari. 18Ngako vona va di wulete koko nyumbani ka Mika, va di tekile txithombe txo vatwa, ni efodhe, ni titerafime, ni txithombe txo wumbwa, mphaxeli a to khene kwawe:
“Njitxani mi mahako kani?”
19Se vona va to kha vona kwakwe:
“Malala, veka dianza dako ha txisofuni, u txi hi londeta, u na va tate wathu ni mphaxeli wathu. Ina i txhuko kwako kumaha mphaxeli wa nyumba ya m'thu mmweyo, kupinda kumaha mphaxeli wa lihunzu ni wa liveleko la ka Israyeli kani?”
20Sekoko mbilu ya mphaxeli yi to tsaka, se a to teka efodhe, ni titerafime, ni txithombe txo vatwa, e wulela hagari ka vathu. 21Ngu kumaha keto, va to tshembereka ve tsula, ve thangetisa vanana, sifuyo, ni thundu, masoni kwawe. 22Se na va di kule ni nyumba ya Mika, vaakelani vale va nga ti ti tinyumbani ka hafuhi ni nyumba ya Mika, va to rambana ve londeta vanana va ka Dhani. 23Se va to kwangula, va di msana ka vanana va ka Dhani, se va ka Dhani va to tshembereka va txi kha vona ka Mika:
“Njitxani u ku natxo, kuza u ramba vathuvo kani?”
24Sekoko ene a to kha ene:
“Mi ni tekete sizimu sangu, asi ni nga ti khandela mi tsula naso, kumweko ni mphaxeli; nji txani txi nga ni salela kambe konkuwa kani? Mi ni wotisisa kutxani taku: Njitani u ku natxo kani?”
25Aniko vanana va ka Dhani va to m'gela tiya:
“U nga hi mahe ti to hi pfa dipswi dako, kasi ku vavamna va txihenyisani, va si thuki va txi mi tshikulela, se awe u txi luzekelwa ngu wutomi wako, ni wutomi wa va mwayani kwako!”
26Ngu kumaha keto, vanana va ka Dhani, va to teka nzila yawe, se Mika, ngako a txi wona ti to va na ni mtamo ngutu kupinda ene, a to tshumela, a txi tsula m'tini kwakwe.
27Vona koko va to teka sile Mika a nga ti ti khandete, ni mphaxeli wule a nga ti ti nayo, va txi ta Layisi, ka vathu vo ti malalela ni kuthembeka, va txi va dayela ngu matxhari, se va txi hisa didhoropa ngu mndilo. 28Kha ka nga maneka ni wammweyo wo dingana ku va lamulela, nguko va ti ti kule ni Sidhoni, kambe va ti si nga ni mhaka ni vamwani vathu, se didhoropa di ti ti mkovani, hafuhi ni Bheti-Reyobhi; msana keto, va to aketa didhoropa, va txi zumba ka dona. 29Se Didhoropa diya va to di dhana ngu ditina daku i Dhani, madingano ni ditina da Dhani, tate wawe, a nga velekwa ngu Israyeli, na ngu kukhatani ka kona koko, ditina da didhoropa diya i ti ti Layisi. 30Se vanana va ka Dhani va to ti emisela txithombe txile txo vatwa, se Jonatani, mwana Gerisoni, mwana Manasi, ene ni vanana vakwe, va to maha vaphaxeli va lihunzu la ka Dhani, kala ka ditshiku da kukhoziswa ka ditiko. 31Ngu kumaha keto, txithombe txile txo vatwa txile txo mahwa ngu Mika, va to ti emisela, ka otshe masiku ale Nyumba ya Txizimu yi nga txi maneka kona Silo.
Currently Selected:
Valamuli 18: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.