Valamuli 19
19
Mlevhi ni txikaba txakwe
1Ku to maheka kambe ka ona masiku ale, ku nga ti si nga ni mfumeli ka Israyeli, taku ku txi maneka wamwamna wa Mlevhi, a nga ti ti luvela madhawani ka mmango wa ka Efrayime, a to ti tekela wamsikati wa txikaba, wa Bhetlehema ka Judha. 2Aniko awule wa txikaba a to maha wugango, se a txi thava, e tshumelela m'tini ka tate wakwe, kona Bhetlehema ka Judha, eyo a nga ya zumba kona masiku okari, a kudingana mune wa mitxima. 3Se mwamna wakwe a to khukha a txi mlondeta, kasi ku a txi ya womba-womba nayo mapswi a ku mkhongotela, ni kutshumela a txi wuya nayo; se a ti ti tekile dijaha dakwe ni timbongola timbidi, se awule wamsikati a to mteka a txi wulela nayo nyumbani ka tate wakwe, se mbimo yile tate wa kona a nga mmona, a to m'hingeta ngu kutsaka. 4Se tate wa msikati wakwe, a to mñola, a txi zumba nayo masiku mararu; se va to dya ni kusela, va txi otela koneho. 5Se ku to maheka taku ka ditshiku da wumune, ve phindula, se Mlevhi e wuka kasi ku a txi khukha, sekoko tate wa dihorana a to khene ka mwane wakwe: “Susula ngu txikhwemu txa dipawu, se msana keto mi na tsula.”
6Se va to khalahatsha, vedya ni kusela ngu wumbidi wawe. Se tate wa dihorana a to khene ka wamwamna wule:
“Na ku kombela, tumela, ti to u zumba kambe wusiku wuwa, kasiku mbilu yako yi txi tsaka.”
7Aniko awule wa dijaha a to khukha a txi lava kutsula, kambe tate wa msikati wakwe a to mkurumeta ku a txi otela kambe ka wusiku wonewo. 8Se a di phindute ka ditshiku da wutxhanu kasi ku a txi tsula, tate wa dihorana a to khene:
Na kukombela: “Susula.”
Se va to zumba kala kugumani ka ditshiku, na va txi dya ngu wumbidi wawe.
9Sekoko wamwamna wule a to khukha kasi ku a txi tsula, ene, ni txikaba txakwe, ni dijaha dakwe; se tate wa msikati wakwe, a to m'gela ku khene:
“Wona taku ditambo diya kuswani, se wusiku wa hoka, na ku kombela taku u txi otela kambe kona hawa wusiku wuwa; nguko se ditshiku da guma, otela kona hawa wusiku wuwa, niku mbilu yako yi na tsake; se mangwana ni mabimbi-kutxa, mi na wuka mi txi tsula ditendani kwanu.”
10Aniko wamwamna wule kha tumela kuotela kambe hale wusiku wule, se a to khukha a txi tsula, kala eya hoka hafuhi ka Jebhusi (i ku Jerusalema), kumweko ni timbongola takwe tatimbidi ti di lulamisetwe, ni txikaba txakwe. 11Ngako koko, va ti hafuhi ni Jebhusi, na se ditambo di di swite ngutu, dijaha di to kha dona ka nyamne wa dona:
“A hi tsimbileni konkuwa, hi txi ya wulela ka didhoropa diya da Vajebhusi, hi otela kona wusiku wuwa.”
12Aniko nyamne wakwe a to mxamula a txi kha ene:
“Lambi, hi nga wuleleni ka didhoropa ni da dimwedo da vane, daku va i si nga da vanana va ka Israyeli, aniko hi na pindelela kala Gibheya.” 13A to khene kambe ka dijaha dakwe: “A hi tsimbileni, hi txi hoka ka wumwewo wa makhalo ale, hi txi ya otela Gibheya mwendo Rama wusiku wuwa.”
14Va to pinda koko va txi tsimbila veya masoni, va di hokile hafuhi ka Gibheya, i ku didhoropa da ka Bhenjamini, ditambo se di ti swite. 15Se va to khukha va txi ya otela kona Gibheya, wona wusiku wule; se ngako Mulevhi a di wulete, a to ya khalahatsha ha mtendelani ka didhoropa, nguko kha ka maneka ni wammweyo wa ku va amukela m'tini kwakwe, kasiku va txi ya otela kona wusikuwo.
16Se wona taku wamwamna wokari wo kumba a ti ti wuya ngu kuthumani thembweni kwakwe; se wamwamna wuwa i ti ti wa mmangoni ka va ka Efrayime, aniko i ti ti muwuyi wa Gibheya; sekoko vavamna va wukhalo wuwa i ti ti vanana va ka Bhenjamini. 17Mbimo yile ene a nga gula maso, a to wona m'thu wule ha mtendelani ka didhoropa; se txikosana txi nje kha txona:
“Uya hani, niku uta ngu hani kani?”
18Se ene a to mxamula a txi khene:
Hita ngu Bhetlehema ka Judha, hi ya madhawani ka mmango wa ka Efrayime, eyo ni nga velekelwa kona; nguko ni ti ko ya Bhetlehema ka Judha; kambe konkuwa ni ya Nyumbani ka Mkoma, nguko kha ku nga ni wammweyo wa ku ni amukela m'tini kwakwe, 19hi ni mwasi ni lihawu lo dyisela ka lona timbongola tathu, se ni dipawu ni vhinya sa kudingana ani, ni sa txithumi txako txa txisikati, ni sa dijaha di di tako ni sithumi sako; kha ku pwateki txilo ni txa tximwetxo.
20Sekoko txikosana txile txi to kha txona:
“Kudikha ku nave ni nawe; totshe ti ti no ku kelelela ni na ku mahela, aniko mi nga oteleni hamtendelani wusiku wuwa.”
21Se a to wuya navo nyumbani kwakwe, a txi ni nga lihawu ka timbongola; se vona va di sambile mikondo, va to dya ni kusela.
22Nga ti va di ha kutsakani timbiluni kwawe, wona taku ku to humelela migewu ya didhoropani (vavamna va i nga ti ti vanana va Bheliyali), yi randela nyumba, yi txi peketela ditimba; yi txi womba ka txikosana txile txa nyamne wa nyumba, yi txi kha yona: “Humisa hahanze m'thuyo a nga wulela nyumbanimo kwako, kasiku hi ta m'ziva.”
23Se wamwamna wule wa nyamne wa nyumba a to va hingeta, a txi va gela ku kha ene:
“Ahim-him vanathu! Na mi kombela, mi nga maheni kubiha ka ku nga eto; nguko m'thu wuwa ku a nga wulela nyumbani kwangu, mi nga maheni kubiha ka ku nga eto. 24Wonani taku ni na humisa hahanze dihorana dangu da mbiri, ni txikaba txa wamwamna wule, mahani kubiha, ni kuranda kwanu ngu vona; aniko ka wamwamna wuwa, mi nga maheni kubiha ka ku nga eto.”
25Aniko vavamna vale kha va lava ku mu engisa; sekoko Mulevhi wule a to teka txikaba txakwe a txi txi humisa hahanze; se vona va to txi ziva ni ku txi mahela wubihi ka wotshe wusiku kala di txi txa, se ngu kugwimba ka wuronga, va to mleka.
26Se di txi ya kutxani, awule wamsikati a to ta wa ha txikeni ka nyumba ya txikosana txile a nga ti ti ka yona nyamne wakwe, a txi zumba kona kala di txi txa. 27Se nyamne wakwe a di wukile ni mixo, a txi tula matimba a nyumba, e huma e londeta nzila yakwe, a to wona msikati wakwe wa txikaba a di txotxowolo ha txikeni ka nyumba, manza akwe ma di hamtshunzutini. 28Se ene a to m'gela ku kha ene:
“Khukha hi txi tsula.” Aniko wamsikati kha xamula txilo. Sekoko a to m'veka txitimwi ka mbongola, se a txi khukha wule wa dijaha e tsula m'tini kwakwe. 29Ngako a di hokile koko m'tini kwakwe, a to teka mesa, se a txi teka txikaba txakwe, e txi wilela ngu digumi da sihango ni simbidi, a txi si rumela ka totshe tihunzu ta ka Israyeli. 30Se ku to maheka taku, ni wihi wu a nga txi ti wona, a ti ti khene:
“Kha ti zivi kumaheka to nga tiya, kambe kha ti zivi kuwonwa, kukhukhela ka ditshiku dile vanana va ka Israyeli, va nga huma ngu ditikoni ka Egipta, kala ka ditshiku da nyamsi; vekisani mhaka yiya timbiluni kwanu, mi txi wila mhaka ya kona.”
Currently Selected:
Valamuli 19: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.