Valamuli 3
3
Vathu va va nga sala Kanana
1Ayiya koko, ngu yona mifumo yi Mkoma a nga yi siya, kasi ku ngu yona e duka Israyeli, i ku votshe vale va nga mbi ziva totshe tiyimbi ta Kanana. 2Ku mahela ku tiveleko ta vanana va ka Israyeli, ngu tona ti na gonda kulwa yimbi, ngutu-ngutu tilveleko tile ti nga si yi zivi yimbi. 3Mtxhanu wa vathangeli va Vafilista, ni votshe Vakanana, ni Vasidhoni, ni Vahevhi, vale va nga ti akile mmangoni ka Libhanoni, kukhukhela mmangoni ka Bhahali-Hermoni kala ka txike txa Hamati. 4Avava koko, va sate kasi ku ngu vona Mkoma e duka va ka Israyeli, kasi kuziva ti to mwendo va na engisa sirumo sakwe, sile a nga ti leletete vatate vawe, ngu txisofu txa Mosi. 5Se vanana va ka Israyeli va di akile hagari ka Vakanana, ni Vaheti, ni Vaamori, ni Vaferezi, ni Vahevhi, ni Vajebhusi, 6va to teka vanana vamahorana va vamatiko va txi maha vasikati vawe, se ni vona ve ningela vanana vawe vamahorana ka mazambi a vamatiko; aniko va to khozela sizimu sawe.
Otoniyeli e lwela va ka Israyeli
7Se vanana va ka Israyeli va to maha kubiha masoni ka Mkoma, ve divala Mkoma, Txizimu txawe, aniko ve thumela Vabhahali ni Asterote. 8Sekoko kuhenya ka Mkoma ku to wukela Israyeli, aniko ene a to va xavisa ngu dianza da Kuzani-Rezatayimi, mfumeli wa Mesopotamiya; se vanana va ka Israyeli va to thumela Kuzani-Rezatayimi, mndani ka mtxhanu wa malembe ni mararu. 9Se vanana va ka Israyeli va to peka huwa ka Mkoma, se Mkoma a to wusa mtxhatxhisi ka vanana va ka Israyeli, ene a to va txhatxhisa: I ku Otoniyeli, mwana Kenazi, mnanda wa Kalebhi. 10Se Moya wa Mkoma wu to ta txitimwi kwakwe, se a to maha mlamuli wa Israyeli, a txi huma eya yimbini; se Mkoma a to ningela Kuzani-Rezatayimi, mfumeli wa Siriya, manzani kwakwe; se dianza dakwe di to simama di wukela Kuzani-Rezatayimi. 11Sekoko ditiko di to humula mune wa magumi a malembe; se Otoniyeli, mwana Kenazi, a to fa.
Awudhi e lwela va ka Israyeli
12Hambi keto, vanana va ka Israyeli va to engeta kumahetela kubiha masoni ka Mkoma; sekoko Mkoma a to ninga mtamo ka Egloni, mfumeli wa Mowabhi, wo wukela va ka Israyeli, nguko va nga maha kubiha masoni ka Mkoma. 13Se Egloni a to patana ni vanana va ka Amoni ni Vaamaleki, ve tsula ve yalwa ni va ka Israyeli, ve teka didhoropa da Mitxhese. 14Se vanana va ka Israyeli va to thumela Egloni, mfumeli wa Vamowabhi, digumi da malembe ni mtxhanu ni mararu. 15Sekoko vanana va ka Israyeli va to peka huwa ka Mkoma, se Mkoma a to va wusela mtxhatxhisi, i ku Ewudhi, mwana Gera, wa ka Bhenjamini, wamwamna wa libhabha. Se vanana va ka Israyeli va to rumela txiningo ngu dianza da Ewudhi ka Egloni, mfumeli wa Vamowabhi. 16Se Ewudhi a to tshula ni ditxhari do lotwa madhawa mambidi, da mpimo wa hafu ya metru kulapha ka dona, a txi di khweketa ngu hahatshi ka syambalo sakwe, ka nyonga yakwe ya txinene. 17Se a to heleketa txiningo txile ka Egloni, mfumeli wa Vamowabhi; kambe Egloni i ti ti wamwamna wo ena ngutu. 18Se ku to maheka taku, a di gwitile kuningela txiningo, a to tshumeta vathu vale va nga ti rwate txiningo. 19Hambi keto, a to tshumela ngu wukhalo wu ku ku ni sithombe so vatwa, hafuhi ni Giligali, a txi khene:
“Ni na ni mhaka yi ni lavako ku ku lengela, awe mfumeli. Egloni a to womba a txi khene: Malala. Se votshe vale va nga ti ti wonetela, va to khukha masoni kwakwe.”
20Se Ewudhi a to wulela nyumbani mu mfumeli Egloni a nga ti khalahatshile kona ekha, a txi pepa, se Ewudhi a txi khene:
“Ni na ni dipswi da Txizimu do kugela.”
Se mfumeli a to khukha a txi ema. 21Sekoko Ewudhi a to nawuluta dianza dakwe da txibhabha, e teka ditxhari di nga ti ti ka nyonga yakwe ya txinene, a txi mthola ngu dona hamrumbu, 22aha koza di wulela ni txiti txa kona, se mafura ma to fenengeta ditxhari (nguko kha thavisa ditxhari hamrumbu); se ku to huma ni nzambwa. 23Sekoko Ewudhi a to huma eya mu ka m'hubhe, se a to msekela matimba a nyumba, a txi ma khota. 24Se ngako ene a di humile, sithumi sa Egloni si to ta mmona, se si wona ti to matimba a nyumba ma sekilwe; si txi kha sona: “Mwendo ene o ti ruma amu txibhiyani kwakwe ko pepela kona.” 25Se va to rinzela veza ve karala, aniko mfumeli a ti si tuli matimba a nyumba ya txitimwi; sekoko va to teka khiya va txi tula, aha va nga wona mfumeli wawe a di kwapa-kwapa hahatshi, a di fite.
26Se Ewudhi a to huluka, vona va txi ngadi ve verela, nguko ene a pindile ngu hagari ka sithombe so vatwa, a txi tutumela kuya Seyira. 27Se ku to maheka taku mbimo yi ene a nga wulela, a to veta mipundu a di mimangoni ka Efrayime; se vanana va ka Israyeli va to relela kumweko nayo ngu mimangoni, na ene a di masoni kwawe. 28Se a to va gela tiya:
“Ni londeteni, nguko Mkoma a ningete valala vanu Vamowabhi, manzani kwanu”; va to relela va txi mlondeta, se ve tsiva mabelo a kukhukhela Jordhani kuya Mowabhi, va si tumeli ni wammweyo a txi txhatuka ngu kona. 29Se ka mbimo yoneyo, va to daya 10.000 wa vavamna, votshe i ti ti vo ena ngutu, kambe votshe i ti ti vavamna va tindena; kha ka huluka ni wammweyo. 30A khozisisilwe eto Mowabhi kedo ditshiku, hahatshi ka dianza da Israyeli; se ditiko di to dikha mndani ka mtxhanu wa magumi ni magumi mararu a malembe.
Samigari e lwela va ka Israyeli
31Msana ka Ewudhi ku to londeta Samigari, mwana Anate, a nga daya 600 wa vavamna va Vafilista, ngu tshoka ya simbi yo gola ngu yona tihomu; kambe a txhatxhisile Israyeli.
Currently Selected:
Valamuli 3: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.