Valamuli 4
4
Dhebhora ni Bharake
1Aniko vanana va ka Israyeli, va to simama va maha kubiha masoni ka Mkoma, msana ka kufa ka Ewudhi. 2Se Mkoma a to va ningela manzani ka Jabhini, mfumeli wa Kanana, a nga ti fumela Hazori; se Sisera i ti ti nduna ya dibutho da kona, awule a nga ti akile Haroseti-wa vamatiko. 3Sekoko vanana va ka Israyeli va to peka huwa ka Mkoma, nguko Jabhini a ti ti ni 900 wa sikotxikani sa tisimbi, kambe a xuphile vanana va ka Israyeli mndani ka magumi mambidi a malembe.
4Se Dhebhora, mprofeti wa txisikati, kata Lapidhoti, i ti ti mlamuli wa ka Israyeli ka yona yile mbimo. 5Kambe a ti ti zumba hahatshi ka mitxhese ya Dhebhora, hagari ka Rama ni Bheteli, mimangoni ka Efrayime, se vanana va ka Israyeli va ti ti ya kwakwe kasi kuya lamulwa ngu ngene. 6Se a to rumela kuya dhana Bharake, mwana Abhinowami, wa Kedhesi ka va ka Naftali, a txi m'gela ku khene:
“Ina Mkoma, Txizimu txa ka Israyeli, kha kuruma a txi khene: Tsula u ya sengeleta vathu mmangoni ka Tabhori, kambe teka 10.000 wa vavamna, hagari ka vanana va ka Naftali ni vanana va ka Zebhuloni kani? 7Se Sisera, mthangeli wa dibutho da Jabhini ni na mndindela kwako, kumweko ni sikotxikani sa kona, ni dibutho da kona, txinambwanani ka Kixoni, kambe ni txi mningela manzani kwako.”
8Sekoko Bharake a mxamute ku khene:
“Ngako u txi tsula ni nani, ni na tsula; aniko ngako u si tsuli ni nani, na mbi tsula.”
9Se Dhebhora a to khene:
“Kha ditshuri, ni na tsula ni nawe, aniko nduma kha yi na mbi va yako ka nzila yi u yi tekako; nguko Mkoma a na ningela Sisera manzani ka wamsikati.” Se Dhebhora a to khukha e tsula ni Bharake, va txi ya Kedhesi. 10Sekoko Bharake a to ramba va ka Zebhuloni ni va ka Naftali, va txi ya Kedhesi, kumweko ni 10.000 wa vavamna; se Dhebhora a to tsula kumweko nayo.
11Se Hebheri, mkeni, a ti ti hambanisile ni Vakeni-kulowe, i ku vanana va Hobhabhe, tate wa Mosi ngu ka msikati wakwe, kambe a ti ti gwimbile matenda akwe, kala mkusuni ka Zahananimi, hafuhi ni Kedhesi.
12Va to womba va txi zivisa Sisera, va txi kha vona: Bharake mwana Abhinowami, a kwete mmangoni ka Tabhori. 13Se Sisera a to tshanganisa sotshe sikotxikani sakwe sa 900, sa tisimbi, e ramba votshe vathu vakwe va yimbi, kukhukhela Heroseti-wa-vamatiko, kala mlongani ka Kixoni.
14Sekoko Dhebhora a to khene ka Bharake:
Ti lulamisele nguko nyamsi ngu dona ditshiku di Mkoma a no ningela Sisera manzani kwako. Ina Mkoma hi nga ene a thangelako masoni kwako kani? Konaho Bharake a to relela ngu mangoni ka Tabhori ni 10.000 wa vavamna. 15Mkoma a to hangalasa Sisera ni sotshe sikotxikani sakwe, ni votshe vathu vakwe va yimbi masoni ka Bharake. Sisera a to ndaka a txi jatama ngu ka txikotxikani txakwe, e tutuma ngu mikondo. 16Bharake a to tutumisa vathu va yimbi kala Heroseti-wa-vamatiko. Dotshe dibutho da yimbi da Sisera di to xulwa, di txi khoziswa ngu ditxhari, ni wammweyo asi huluki.
17Sisera a to thava a txi tutuma ngu mikondo, a txi ya ditendani ka Jayeli, msikati wa Hebheri, mkeni, nguko ku ti ti ho kudikha hagari ka Jabhini mfumeli wa Hazori, ni nyumba ya ka Hebheri, mkeni. 18Jayeli a to huma a txi hingeta Sisera, a txi khene kwakwe:
“Wulela nyamne wangu u nga thave, zumba kumweko ni nani!” Sisera a to wulela ditendani kumweko nayo, se Jayeli a to mfenengeta ngu didhamba. 19Sisera a to womba ka wamsikati a txi khene:
“Ni he mati amadotho o sela na ku kombela ngutu ni pfa ditora.” Ene a to tula msava wa didhowo, wu nga ti ti ni masi, a txi mninga e sela, e tshumela a txi mfenengeta kambe. 20Se Sisera a m'gete a txi khene:
Ema ha txikeni ka ditenda, se ngako ku txi ta m'thu a txi ta ku wotisa a txi khene: Waho m'thu wokari hawa kani? U na xamula u txi khawe ahim-him.
21Aniko Jayeli, msikati wa Hebheri, a to dula txikhongwani txa ditenda, a txa teka hamela, e tshuketa hafuhi ngu kumbzingamela, e txi gogotela hambanza ka Sisera, txi txi dhoda kala txi zima hahatshi ha mafuni. Nguko ene a ti ti otete wukohe wa hombe, ngu kukarala, a so fisa toneto.
22Konako ku to humelela Bharake a txi londisa Sisera. Jayeli a to huma a txi m'hingeta a txi m'gela tiya:
Ngono ni ta kukomba wamwamna wu u mlavako. Ene a to ta kwakwe, e ta wona ti to Sisera a fite, ni txikhongwani txi nga gogotelwa hambanza kwakwe.
23Txizimu txi khozisile Jabhini, mfumeli wa Kanana, masoni ka vanana va ka Israyeli. 24Vanana va ka Israyeli va to simama va txi lwa ni Jabhini, mfumeli wa Kanana ditshiku ni ditshiku veza ve mfuvisa.
Currently Selected:
Valamuli 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.