Valamuli 5
5
Ndando ya Dhebhora ni Bharake
1Se ka dona ditshiku dile, Dhebhora ni Bharake, mwana Abhinowami, va to embelela ndando va txi kha vona:
2“Nguko vathangeli va nga sikota kuthangela Israyeli,
ni vona vathu va nga ti ningela ngu kuranda kwawe va txi yalwa,
ngu mhaka yeto, dhumisani Mkoma,
3Anu vafumeli engisani! Anu vathangeli engisani!
Ani ni na dhumisa Mkoma ngu kuembelela,
Ni na embelela tindando, ni dhumisa Mkoma, Txizimu txa Israyeli!
4Awe Mkoma, mbimo yi u nga huma ngu Seyiri,
mbimo yi u nga ta ngu libalani ka Edhomi,
mafu ma to zinginika
nzuma yi to nisa mati,
se marefu ma to wisa mati.
5 # Wona ni ka: Eks. 19:18. Mimango yi nyivilikile masoni ka Mkoma,
ni wona mmango wa Sinayi, masoni ka Mkoma,
Txizimu txa ka Israyeli.
6Ka masiku a Samigari, mwana Anate
ka masiku a Jayeli,
tinzila ti ti mahile mapfhela,
vatsimbili va ti ti tsimbila ngu tinzila to gombonyeka.
7Ku to pwateka vathangeli hagari ka Israyeli,
kala kuza ani Dhebhora ni txi khukha,
ni txi khukha kota mame wa va ka Israyeli!
8Va ka Israyeli va to ti sawulela simwani sizimu sasiphya,
se koneko yimbi yi to wulela tinyumbani kwawe.
Hagari ka 40.000 wa vavamna va va ka Israyeli,
ku ti si nga ho ni wammweyo a nga ti ñote txitxhavangu mwendo ditxhari.
9Mbilu yangu yi bonga vathangeli va ka Israyeli,
a vale va nga ti ningela ngu kuranda kwawe kasi kuthumela ditiko.
Dhumisani Mkoma!
10Anu mi gadhako timbongola to basa,
anu mi khalahatshako ha matahoni,
ni nanu mi tsimbilako ngu tinzila, embelelani!
11Engisani diguwa da vale va abanako thomba yo yi mana yimbini,
va di ha sisimani ka mati.
Va dhumisa mithumo yo lulama ya Mkoma.
Mithumo yakwe yo lulama hagari ka va ka Israyeli.
Sekoko vathu va Mkoma va ti ya ema ha txikeni ka didhoropa.
12Wuka, wuka awe Dhebhora,
wuka, wuka u txi thula ndando;
khukha, awe Bharake, u txi thangela ava va nga ti ku ñote, awe mwana Abhinowami!
13Sekoko Mkoma a to ni maha ni fuma,
txitimwi ka vahombe, hagari ka vathu vale va nga sala;
Mkoma a to ni maha ni fuma txitimwi ka tindena.
14Nguko Efrayime a relete ka vaaki va Amaleki;
se msana kwako, wata Bhenjamini a hagari ka vathu vako;
manganakana ma relela ma txi ta ngu Makiri ni Zebhuloni,
va pinda va di ñote ndonga ya mabhalani.
15Vathangeli va Isakari va ti kumweko ni Dhebhora;
se Isakari a to londeta Bharake,
va to tsula veya hoka mkovani,
hafuhi ka milonga ya ka Rubheni,
kumahilwe makungo a hombe a mbilu.
16Ngu kutxani u txi zumba hagari ka mitxhambi,
u txi engisela maswati a vadyisi, kani?
Hafuhi ka milonga ya Rubheni,
kumahilwe makungo a hombe a mbilu.
17Gileyadhi a zumbile mtxhatuko ka Jordhani,
Dhani ngu kutxani u txi zumbela tingalavani kani?
Aseri a ti ti zumbile mambambe ka linene,
e ti zumbela sithoni kwakwe.
18Zebhuloni ditiko da vathu vale va si thaviko lifo,
kufana ni Naftali, txitimwi ka mimango ya txiwulani.
19Vafumeli va tile va txi ta lwa,
vafumeli Vakanana va lwite
ditikoni ka Tahanaki, mabambe ka mati a Megidhu,
aniko, kha va teka simaha sa kuhonyola sa silivhela.
20Tinyeleti ti lwite, txitimwi nzumani,
amu tinzilani ka tona ti lwite,
ti txi wukela Sisera.
21Txinambwana txa Kixoni txi va kukuletile,
mnambo wule wa kale, mnambo wa Kixoni.
Awe moya wangu, tsimbila u di tsani!
22Sekoko sitsendo sa mahantxhi si to pfala kukandetela ka sona hahatshi
na mahantxhi ma txi tutuma ni vagadhi va ona va mtamo.
23Ruketelani Merozi, kuwomba Ngelozi ya Mkoma,
ruketelani, ruketelani, vaaki va kona!
Nguko, kha vata ku ta lamulela Mkoma,
ku ta lamulela Mkoma, kumweko ni tindena.
24Jayeli, a katekile hagari ka vavasikati,
ene msikati wa Hebheri, mkeni.
Ene a katekile hagari ka vavasikati, vale va zumbako matendani kwakwe!
25Sisera a mkombete mati, se Jayeli a to mtisela masi;
a txi m'wuyisela masi a diwomba, amu ka digombe da wukoma.
26A tekile txikhongwani ngu dianza dakwe,
ngu dianza dakwe da txinene a ñote hamela yo nemela ya vatshuli.
A gogotete txikhongwani ha msungo ka Sisera, a txi wu dhoda,
a txi bhandisela msungo mbimo yi a nga gogotela txikhongwani e wu dhoda.
27Sisera a to nama mikondoni kwakwe a txiwa,
a towa a txi naka-naka;
a to nama hagari ka mikondo, a txi wa;
ahale a nga nama kona, koneho a fete kona.
28Mame wa Sisera a to solela ngu ha difasitelani e wona,
se a txi dila a di hadifasitelani, a txi khene:
Txikotxikani txakwe txi swela ngu txani kuwuya kani?
Ngu kutxani mahantxhi akwe ma txi swela kubwaka kani?
29Vasikati vo txariha va m'zinda va to mxamula;
se nene apune a to ti xamula a txi khene:
30Va nava va di kuphakelani ka si va nga handa kani?
Wamwamna wammweyo, ina kha ningwa dihorana dimwendo mwendo mahorana mambidi, kani?
Tinguwo to rungelwa ngu kutshuriselwa, nda Sisera,
tinguwo to rungelwa ngu kutshuriselwa to bombisa thamo ya msikati wakwe.
31Valala vako va na fuvise tona eto, awe Mkoma!
Aniko, avale va kurandako, va na fanane ni ditambo,
ngako di txi sisimuka ngu wotshe mtamo wa dona.”
Se ditiko di to dikha, amu ka mune wa magumi a malembe.
Currently Selected:
Valamuli 5: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.