Johani 20
20
Kuwuka ka Jesu ngu kufani
(Matewu 28:1-10; Marku 16:1-8; Luka 24:1-12)
1Ka ditshiku do khata ka divhiki, ku di ngadi phum, Mariya, wa Magdhala, a to vindukela a txi ya diyivani, se a txi ya mana dirigwi di di thavisilwe ha diyivani. 2Se e tutuma a txi ya gela Pedro ni mmwani mgondiswa wu Jesu a nga ti m'dhunda, a txi khene kwawe: “Va thavisile Mkoma diyivani, se kha ni kuzivi amu va nga mu veka kona.”
3Sekoko Pedro a to khukha kumweko ni mmwani mgondiswa, ve tsula diyivani. 4Va ti tutuma votshe ngu wumbidi wawe, kambe mgondiswa wule mmwani, i nga ti wa livilo kupinda Pedro, a to mu siya msana, a txi thanga ene a txi hoka diyivani. 5Se ngako ene a di namile e solela, a to wona tinguwo to basa ti di vekilwe hahatshi, kambe kha wulela. 6Se Simoni Pedro, a nga txi londeta ngu msana, a to bwaka nene, se e wulela diyivani a txi wona tinguwo ti di vekilwe hahatshi, 7Kambe nguwo yi va nga ti mphutete ngu yona msungo yi ti sa vekwa wukhalo wumwewo ni timwani, aniko yi ti petetwe yi vekwa ngu phuho, yona yokha. 8Sekoko mgondiswa wule mmwani a nga thanga ene e hoka diyivani, nene a wulete, a txi ti wona, se a txi kholwa. 9Nguko kha ditshuri va ti sanzi ku ti manisisa ti to Ene a ti fanela kuwuka ngu ka vakufa, madingano ni kuwomba ka Mibhalo. 10Se vagondiswa va to tshumela ve tsula mwani.
Jesu ngako a txi ti wonekisa ka Mariya wa Magdhala
(Matewu 28:9-10; Marku 16:9-11)
11Mariya a ti emile hahanze, hafuhi ni diyiva, a txi dila. Se a di ngadi a txi dila, a to nama e solela diyivani, 12e wona tingelozi timbidi, ti di ambate so basa, na ti di khalahatshile ka wukhalo wuwa txirumbi txa Jesu txi nga ti otelisilwe kona, yimweyo yi di ngu misungoni, yimwani yi di ngu minengeni. 13Ti wombile kwakwe ti txi kha tona: “Wamsikati, u dilela txani kani?” Ene a to khene ka tona: “Nguko va thavisile Mkoma wangu, se kha ni kuzivi amu va nga mu veka kona.” 14Ku ti ngako a di wombile eto, a to tshembereka a txi wona Jesu a di emile, kambe asi mu zivi ti to i Jesu. 15Jesu a txi khene kwakwe: “Wamsikati, u dilela txani kani? U lava mani kani?” Ene, ngu kupimisa ti to i mxayisi wa thembwe ya siluva, a to khene kwakwe: “Mkoma, ngako i di awe u nga mu thavisa, ni gele ahawa u nga mu veka kona, ni na ya mu teka.” 16Jesu a to mu gela ku khene: “Mariya!” Ene a to tshembereka, a txi womba ngu Txihebheru, a txi khene: “Rabbuni!” Ati ti wombako ku “M'gondisi.” 17Jesu a to khene kwakwe: “U nga ni gwese, nguko kha ni nzi kuya ka Tata. Aniko tsula ka vanathu, u txi ya va gela, u txi khawe: Na kwela, ni ya ka Tate wangu, i ku Tate wanu; ka Txizimu txangu, i ku Txizimu txanu.” 18Mariya wa Magdhala a to ya gela vagondiswa, a txi khene: “Ni woni Mkoma, ngene a nga ni gela tiya.”
Jesu ngako a txi ti wonekisa ka vagondiswa
(Matewu 28:16-20; Marku 16:14-18; Luka 24:36-49)
19Minovani ka ditshiku dile, i ku ditshiku do khata ka divhiki, vagondiswa va ti maneka va di tshanganile ka wukhalo wokari, va txi ti sekela matimba, ngu kuthava Vajudha. Se Jesu e wulela, a txi ema hagari kwawe, a txi va losa ngu mapswi awa: “Kudikha ku nave ni nanu!” 20A di wombile toneto, a to va komba manza ni didhawa dakwe. Vagondiswa va to tsaka ngu kuwona Mkoma. 21Ene a to engeta a txi khene: “Kudikha ku nave nanu! Nga ti Tate a nga ni ruma, nanani na mi ruma.” 22A di wombile tiya, a to va futetela, na a txi khene: “Amukelani Moya wo Sawuleka. 23#Wona ni ka: Mat. 16:19; 18:18. Ka vale mi no va divalela sionho, va na divalelwa; ani vale mi no mbi va divalela sionho, kha va na mbi divalelwa.”
Jesu ni Tomasi
24Tomasi, mmweyo wa vale va Digumi ni Vambidi, awule a dhanwako ku i Dhidhimo, a ti si nga ho navo, mbimo yi a nga ta Jesu. 25Vamwani vagondiswa va mgete, va txi kha vona: “Hi woni Mkoma!” Aniko ene a to khene kwawe: “Ani ngako ni si woni mu ka manza akwe timbowo ta sipikiri, ngako kambe ni si wuleti litiho langu mu ka timbowo ta sipikiri, ni kuveka dianza dangu ha didhawani kwakwe, kha ni na mbi kholwa.”
26Ku di pindile mtxhanu wa masiku ni mararu, va to tshangana kambe vagondiswa nyumbani, se Tomasi a ti ti ho nene. Ku di sekilwe matimba, a to ta Jesu, a ta ema hagari kwawe, na a txi va losa kambe ngu mapswi awa: “Kudikha ku nave ni nanu!” 27Ngu msana a to gela Tomasi, a txi khene: “Tisa litiho lako ahawa, u txi wona manza angu; tshuketisa dianza dako, u txi di beta ha didhawani kwangu, u nga swe kambe u txi ti maha mkaneti, aniko kholwa.” 28Se Tomasi a to khene: “Mkoma wangu ni Txizimu txangu!” 29Jesu e tshumela a txi khene kwakwe: “Akuwa u nga ni wona, wa kholwa. Va katekile avale va kholwako, hambi va sa wona!”
Ati di nga bhalelwa tona dibhuku diya
30Simwani sidiwukiso sasingi asi mahile Jesu masoni ka vagondiswa, asiya si nga mbi bhalwa ka dibhuku diya. 31Kambe timhaka tiya ti nga bhalwa, ti bhaletwe ku mi txi kholwa ti to Jesu ngene Kristu Mwanana wa Txizimu, ni tito, ngu kukholwa kuwa, mi na mana kuhanyiswa ngu ditina dakwe.
Currently Selected:
Johani 20: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
Johani 20
20
Kuwuka ka Jesu ngu kufani
(Matewu 28:1-10; Marku 16:1-8; Luka 24:1-12)
1Ka ditshiku do khata ka divhiki, ku di ngadi phum, Mariya, wa Magdhala, a to vindukela a txi ya diyivani, se a txi ya mana dirigwi di di thavisilwe ha diyivani. 2Se e tutuma a txi ya gela Pedro ni mmwani mgondiswa wu Jesu a nga ti m'dhunda, a txi khene kwawe: “Va thavisile Mkoma diyivani, se kha ni kuzivi amu va nga mu veka kona.”
3Sekoko Pedro a to khukha kumweko ni mmwani mgondiswa, ve tsula diyivani. 4Va ti tutuma votshe ngu wumbidi wawe, kambe mgondiswa wule mmwani, i nga ti wa livilo kupinda Pedro, a to mu siya msana, a txi thanga ene a txi hoka diyivani. 5Se ngako ene a di namile e solela, a to wona tinguwo to basa ti di vekilwe hahatshi, kambe kha wulela. 6Se Simoni Pedro, a nga txi londeta ngu msana, a to bwaka nene, se e wulela diyivani a txi wona tinguwo ti di vekilwe hahatshi, 7Kambe nguwo yi va nga ti mphutete ngu yona msungo yi ti sa vekwa wukhalo wumwewo ni timwani, aniko yi ti petetwe yi vekwa ngu phuho, yona yokha. 8Sekoko mgondiswa wule mmwani a nga thanga ene e hoka diyivani, nene a wulete, a txi ti wona, se a txi kholwa. 9Nguko kha ditshuri va ti sanzi ku ti manisisa ti to Ene a ti fanela kuwuka ngu ka vakufa, madingano ni kuwomba ka Mibhalo. 10Se vagondiswa va to tshumela ve tsula mwani.
Jesu ngako a txi ti wonekisa ka Mariya wa Magdhala
(Matewu 28:9-10; Marku 16:9-11)
11Mariya a ti emile hahanze, hafuhi ni diyiva, a txi dila. Se a di ngadi a txi dila, a to nama e solela diyivani, 12e wona tingelozi timbidi, ti di ambate so basa, na ti di khalahatshile ka wukhalo wuwa txirumbi txa Jesu txi nga ti otelisilwe kona, yimweyo yi di ngu misungoni, yimwani yi di ngu minengeni. 13Ti wombile kwakwe ti txi kha tona: “Wamsikati, u dilela txani kani?” Ene a to khene ka tona: “Nguko va thavisile Mkoma wangu, se kha ni kuzivi amu va nga mu veka kona.” 14Ku ti ngako a di wombile eto, a to tshembereka a txi wona Jesu a di emile, kambe asi mu zivi ti to i Jesu. 15Jesu a txi khene kwakwe: “Wamsikati, u dilela txani kani? U lava mani kani?” Ene, ngu kupimisa ti to i mxayisi wa thembwe ya siluva, a to khene kwakwe: “Mkoma, ngako i di awe u nga mu thavisa, ni gele ahawa u nga mu veka kona, ni na ya mu teka.” 16Jesu a to mu gela ku khene: “Mariya!” Ene a to tshembereka, a txi womba ngu Txihebheru, a txi khene: “Rabbuni!” Ati ti wombako ku “M'gondisi.” 17Jesu a to khene kwakwe: “U nga ni gwese, nguko kha ni nzi kuya ka Tata. Aniko tsula ka vanathu, u txi ya va gela, u txi khawe: Na kwela, ni ya ka Tate wangu, i ku Tate wanu; ka Txizimu txangu, i ku Txizimu txanu.” 18Mariya wa Magdhala a to ya gela vagondiswa, a txi khene: “Ni woni Mkoma, ngene a nga ni gela tiya.”
Jesu ngako a txi ti wonekisa ka vagondiswa
(Matewu 28:16-20; Marku 16:14-18; Luka 24:36-49)
19Minovani ka ditshiku dile, i ku ditshiku do khata ka divhiki, vagondiswa va ti maneka va di tshanganile ka wukhalo wokari, va txi ti sekela matimba, ngu kuthava Vajudha. Se Jesu e wulela, a txi ema hagari kwawe, a txi va losa ngu mapswi awa: “Kudikha ku nave ni nanu!” 20A di wombile toneto, a to va komba manza ni didhawa dakwe. Vagondiswa va to tsaka ngu kuwona Mkoma. 21Ene a to engeta a txi khene: “Kudikha ku nave nanu! Nga ti Tate a nga ni ruma, nanani na mi ruma.” 22A di wombile tiya, a to va futetela, na a txi khene: “Amukelani Moya wo Sawuleka. 23#Wona ni ka: Mat. 16:19; 18:18. Ka vale mi no va divalela sionho, va na divalelwa; ani vale mi no mbi va divalela sionho, kha va na mbi divalelwa.”
Jesu ni Tomasi
24Tomasi, mmweyo wa vale va Digumi ni Vambidi, awule a dhanwako ku i Dhidhimo, a ti si nga ho navo, mbimo yi a nga ta Jesu. 25Vamwani vagondiswa va mgete, va txi kha vona: “Hi woni Mkoma!” Aniko ene a to khene kwawe: “Ani ngako ni si woni mu ka manza akwe timbowo ta sipikiri, ngako kambe ni si wuleti litiho langu mu ka timbowo ta sipikiri, ni kuveka dianza dangu ha didhawani kwakwe, kha ni na mbi kholwa.”
26Ku di pindile mtxhanu wa masiku ni mararu, va to tshangana kambe vagondiswa nyumbani, se Tomasi a ti ti ho nene. Ku di sekilwe matimba, a to ta Jesu, a ta ema hagari kwawe, na a txi va losa kambe ngu mapswi awa: “Kudikha ku nave ni nanu!” 27Ngu msana a to gela Tomasi, a txi khene: “Tisa litiho lako ahawa, u txi wona manza angu; tshuketisa dianza dako, u txi di beta ha didhawani kwangu, u nga swe kambe u txi ti maha mkaneti, aniko kholwa.” 28Se Tomasi a to khene: “Mkoma wangu ni Txizimu txangu!” 29Jesu e tshumela a txi khene kwakwe: “Akuwa u nga ni wona, wa kholwa. Va katekile avale va kholwako, hambi va sa wona!”
Ati di nga bhalelwa tona dibhuku diya
30Simwani sidiwukiso sasingi asi mahile Jesu masoni ka vagondiswa, asiya si nga mbi bhalwa ka dibhuku diya. 31Kambe timhaka tiya ti nga bhalwa, ti bhaletwe ku mi txi kholwa ti to Jesu ngene Kristu Mwanana wa Txizimu, ni tito, ngu kukholwa kuwa, mi na mana kuhanyiswa ngu ditina dakwe.
Currently Selected:
:
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.