Joyeli 1
1
1Dipswi da Mkoma, di nga rumelwa ka Joyeli, mwana Petuwele.
Mtungu wa humbi ni txihala
2Engisani tiya anu madhota,
kambe pfisisani motshenu vaaki va ditiko:
Ina ti humelete tiya ka masiku anu kani?
Mwendo kambe ka masiku a vatate vanu kani?
3Xawutelani matimu awa ka vanana vanu,
se vanana vanu ka vanana vawe,
ni vanana vava ka limwani liveleko.
4Asi si nga siwa ngu mpungu,
si dyitwe ngu humbi,
se asi si nga siwa ngu humbi, si dyitwe ngu sitoto,
ni si si nga siwa ngu sitoto, si dyitwe ngu titxhowani.
5Vhumukani anu madevi, mi dila;
pekani huwa motshenu
mi selako vhinya,
ngu mhaka ya vhinya ya yiphya
nguko ya thaviswa mkanani kwanu.
6 # Wona ni ka: Mtu. 9:8. Nguko ditiko dimwani di kwelete ka ditiko dangu,
da mtamo kambe da kwa mbi balwa;
makwasa a dona, makwasa a ngonyamo,
di ni titshaya to fana
ni ta ngonyamo ya makati yo kumba.
7Di mahile m'vhinya wangu wu fuviswa,
se di kwamute mabanzi a mkuwu wangu,
se di kwamulete otshe, di txi ma tshotsha hahatshi;
madhavi a wona di ma kwalalisile.
8Dila nga m'horana wotuma wo ambekwa masaka,
ngu mwamna wa wuphya wakwe.
9Ku wilisilwe mningelo wa sakudya,
ni sa kusela Nyumbani ka Mkoma;
vaphaxeli, i ku sithumi sa Mkoma, va pandisekile.
10Thembwe yi fuvisilwe,
se mafu ma ha kupandisekani;
nguko fulaho yi fuvisilwe,
vhinya ya yiphya yi omile, ni mafura ma pwateka.
11Vadimi va ti thela tingana,
vaphayi va vhinya va kuma
ngu mhaka ya fulaho ni sevhadha;
nguko kuelula ka thembweni ku gumile.
12M'vhinya wu omile, mkuwu wu wunile;
mromani ni wona, ni mtxhese ni m'hapula;
yotshe mindonga ya txitinga yi omile,
hambi litsako li omile ka vanana va vathu.
13Ti khutareleni mi ti dilela anu vaphaxeli;
kumani anu vathumeli va txiluvelo;
wulelani mi pinda mi di ambate masaka,
ni wusiku anu, vathumeli va Txizimu txangu;
nguko miningelo ya sakudya ni sa kusela si nga wilwa,
nza nyumbani ka Txizimu txanu.
14Ti sawuleleni kutitona,
nuwelani ditshiku da kutsimbisela,
sengeletani madhota ni votshe zumbako ditikoni muwa,
Nyumbani ka Mkoma, Txizimu txanu,
se mi txi dila ka Mkoma.
15 # Wona ni ka: Isa. 13:6. Yowe! Ditshiku dile!
Nguko ditshiku da Mkoma di hafuhi,
di nata kufana ni kufuvisa ka wu wa Mtamo-wotshe.
16Ina sakudya kha sa wilwa hi txi si wona kani?
Kutsaka ni kuembelela,
nyumbani ka Txizimu txathu kani?
17Mbewu yi sinete hahatshi,
sisangala si haxutwe, mathala ma wisilwe,
nguko fulaho yi omile.
18Eto si dilisako tona sifuyo!
Mitxhambi ya tihomu ta vamakati ya kanganyiseka,
nguko kha yi nga ni ko dya kona;
ni yona mitxhambi ya tinvuta ya hetwa.
19Na dila kwako awe Mkoma,
nguko mndilo wu hisile wudyiselo wa txiwulani,
se dituro di tshokomisile yotshe mindonga ya txitinga.
20Ni sotshe sihari sa txitinga sa dila kwako;
nguko minambo yi omile,
se mndilo wu hisile wudyiselo wa txiwulani.
Currently Selected:
Joyeli 1: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.