Jona 2
2
Mkombelo wa Jona
1Se Jona, a to kombela ka Mkoma, Txizimu txakwe, a di mndani ka txihaka.
2A txi khene:
Kupandisekani kwangu ni dite ka Mkoma,
se ene a to ni xamula;
ni di mndani ka txihaka ni kwangute,
se awe u engisile dipswi dangu.
3Nguko awe u ni rinzile amu ka diziva,
hagari ka tinene,
se mati o khulunga ma to ni ranganyeta;
otshe mavimbi ako ni kubhwabhwamela kwako,
si pindile ngu txitimwi kwangu.
4Se ani nokha ni ti khani:
Ni rinzilwe kule ni khohe yako;
hambi keto, ni na engeta ni wona dithepele dako do sawuleka.
5Mati ma to ni randela, meza me manela m'hefemulo wangu,
kuhokoma ku ni khumbunyetile do gwita,
se mwasi wa matini wu ni tombetete ha msungo kwangu.
6Ani ni relete kala kuya hoka makhatoni ka mimango,
matimba a tisimbi a ha mafuni ma tutumile, me ta ni tsivela do gwita;
aniko awe u txhatxhisile wutomi wangu kutimelani,
Awe Mkoma, Txizimu txangu!
7Mbimo yile moya wangu wu nga ti ti tsivala mndani kwangu,
ani ni ku alakanyile Mkoma;
se mkombelo wangu wu to wulela kwako,
dithepeleni kwako ko sawuleka.
8Avale va ti ningetetelako ka ti ti si vhuniko txilo,
va leka wumbilu wa Mkoma vapune.
9Aniko ani ni na kuninga miphaxo ngu dipswi do bonga,
a ti ni nga xambanya ni na ti maha;
kuhanyiswa kuta ngu ka Mkoma!
10Sekoko Mkoma a to womba-womba ka txihaka, se txona txi to kosa Jona ha mafuni.
Currently Selected:
Jona 2: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.