Levhi 18
18
Kutsimbwa ka kwa mbi tekana ngu mlayo
1 Mkoma a to womba kambe ka Mosi, a txi khene: 2Gela msengeletano wa ka Israyeli sileleto siya:
Ani ngani Mkoma, Txizimu txanu! 3Mi nga maheni ati va mahako Vaegipta, vale mi nga hanya navo ka masiku ale ma nga pinda, hambi tile va mahako Vakanana, vathu va ditiko dile ni lavako ku mi yisa ka dona, hambi kulondeta mikhuwo yawe. 4Mi fanete kuxayisa mithetho yangu ni milayo yangu: Ani ngani Mkoma, Txizimu txanu. 5#Wona ni ka: Neh. 9:29; Eze. 18:9; 20:11-13; Luk. 10:28; Var. 10:5; Vag. 3:12. Mi fanete kuxayisa milayo yangu ni mithetho yangu, nguko yona ya tsanisa wutomi, ka wule a yi londetako! Ani ngani Mkoma!
6Ni wammweyo wamwamna a nga thuke e otela ni wamsikati wu i ku mnoha wumwewo nayo, a txi tumbula wumbwiri wakwe. Ani ngani Mkoma! 7U nga thuke u vhunungula wumbwiri wa tate wako ni wa mane wako! I mame wako, u nga vhunungule wumbwiri wakwe!
8U nga thuke u otela ni msikati wa tate wako.
9U nga thuke u otela ni ndiyako i ku mwanana wa tate wako mwendo wa mame wako, awu a nga velekwa ha m'tini mwendo awule a nga velekelwa hahanze! U nga vhunungule wumbwiri wakwe.
10U nga otele ni mtukulu wako wa muhorana, wo velekwa ngu mwanana wako wa mfana mwendo wa muhorana; nguko wumbwiri wakwe, mbwako.
11U nga thuke u otela ni mwanana wamsikati wa tate wako, awu a nga velekwa ngu tate wako, nguko i ndiyako. U nga vhunungule wumbwiri wakwe.
12U nga thuke u otela ni ndiya ya tate wako, nguko i hahani wako.
13U nga thuke o otela ni mkoma mwendo mnanda wa mame wako. Nguko mbamame vako.
14U nga thuke u otela ni msikati wa tatanyani wako, nguko nene i mame wako.
15U nga thuke u otela ni mamanyani wako, nguko msikati wa mwanana wako. U nga vhunungule wumbwiri wakwe.
16U nga otele ni msikati wa mwananu; nguko mbumbwiri wa mwananu.
17U nga vhunungule wumbwiri wa wamsikati wokari, ni wa mwanana wakwe; hambi mwanana wa dihorana wa mwanana wakwe wa mfana, mwendo mwanana wa dihorana wa mwanana wakwe wa dihorana, nguko maxaka a ditshuri; ndingana ta hombe.
18U nga tekane ni wamsikati ni mwanawe, u vangisa wukhuxu, u txi vhunungula wumbwiri wako ni wakwe, a txi ngadi a txi hanya.
19U nga thuke u otela ni wamsikati wokari, ngako a di ni mitxima, nguko ngu mnyenyezisa! 20#Wona ni ka: Levh. 20:10. U nga thuke u otela ni msikati wa mwakelani wako, nguko u nga ti totela manyala kumweko nayo. 21U nga ningele ni mmweyo wa vanana vako, va txi mahwa mphaxo ka Moloke; nguko ngu nyenyezisa ditina da Txizimu txako! Ani ngani Mkoma!
22Ni wuhi wamwamna a nga thuke a txi otela ni mwamna kulowe, a txi mmha wamsikati, i mhaka yo yila!
23 # Wona ni ka: Eks. 22:19; Levh. 20:15-16; Dhewut. 27:21. U nga thuke u txi otela ni txihari; nguko ngu ti nyenyezisa; wamsikati nene a nga ti ningele ka txihari, kasi ku e otela natxo, nguko ti bihile.
24Mi nga ti bihiseni ngu kumahetela tona timhaketo, nguko va ti bihisile toneto vathu vale ni va tovelako masoni kwanu. 25Ditiko di nyenyezile, se ani ni tsayisa wubihi wa dona, aniko ditiko di na kosa vaaki va dona. 26Kambe mi fanete kulondeta milayo yangu ni mithetho yangu, mi si maheteli timhaka to thisa hagari kwanu, anu vanyamne va ditiko, kumweko ni valuveli. 27Nguko vaaki vale va nga hanya kukhatani, anu mi sinzi kumaneka ka dona ditiko diya, va ti ti mahetela timhaka to thisa to nga toneto, va txi di nyeta ngu kubiha kwawe. 28Kasi ku ditiko diya di si mi kosi nanu, ngu kumaneka mi txi di nyenyezisa ngu kubiha kwanu, nga kule di nga kosa vaaki vale va nga hanya ka dona, na anu mi sinzi ku va ho. 29Kkambe wule a no va a txi mahetela timhaka to nyenyeza, a na tovelwa hagari ka vathu va ka kwawe. 30Ngu toneto, xoniphani sileleto si ni nga mi mahela, mi si londeteli mikhuwo yo biha, ayile va nga yi mahetela vale va nga thanga vona, na mi sinzi kumaneka anu, nguko mikhuwo yoneyo yi nga mi nyenyezisa. Ani ngani Mkoma, Txizimu txanu.
Currently Selected:
Levhi 18: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.