Levhi 19
19
Yimwani milayo
1 Mkoma a to womba kambe ka Mosi, txi khene: 2Womba ka wotshe msengeletano wa vanana va ka Israyeli, u txi khawe:
Mahani vathu vo sawuleka, nguko ani, Mkoma, Txizimu txanu, ni wo sawuleka. 3Mmweyo ni mmweyo a na thave tate wakwe ni mame wakwe, e vekisa Masabbata tangu. Ani ngani Mkoma, Txizimu txanu!
4Mi nga tshumeleleni ka sithombe, kambe mi nga ti maheleni sizimu sa tisimbi: Ani ngani Mkoma, Txizimu txanu!
5Ngako mi txi maha mningelo wa mhamba ya mpatano ka Mkoma, wu maheni ngu fanelo, kasi ku wu txi amukeleka. 6Mi fanete kudya mhambeyo, ka ditshiku dile mi phaxako ngu dona, mwendo ka ditshiku da mangwanani ka kona, asi sisalako kala ka ditshiku da wuraru, si fanete si txi hiswa ha mndiloni. 7Asi sidyiwako ka ditshiku da wuraru, soneso sa yila, asi si mahako ti to mhamba ya kona yi si tumelelwi. 8Awule a yi dyako a na rwala mnandu, nguko a nyenyezisile wukhalo wo sawuleka wa Mkoma; se a na tovelwa hagari ka vathu va ka kwawe.
9Ngako mi txi elula timbewu tithembweni kwanu, mi nga eluleni kala kotshe magwito ka thembwe, kambe mi nga yeni mi txi ya roletela vanyamtshodwe, msana ka kuva mi di gwitile kuelula siyalo. 10U nga lavetele asi sisalako amu ka thembwe yako ya mivhinya, msana ka kuva ku di elutwe, hambi kuroletela mauvha ale ma nga tshomoka. U fanete u txi leka misalela ka sisiwana ni ka valuveli! Ani ngani Mkoma, Txizimu txako!
11Mi nga peni, mi nga dyeleleni, mi nga wombeni makuhu kasi kukanganyisa mkwanu. 12Mi nga xambanyeni makuhu ngu ditina dangu, nguko mi nga nyenyezisa ditina da Txizimu txanu. Ani ngani Mkoma!
13U nga xuphe mkwanu kambe u nga mpele sakwe; muholo wa mthumo wu a thumako u nga zumbe nawo manzani kwako, kala ditshiku da mangwana.
14U nga ruketele m'thu wu i ku diphanzeve, kambe u nga veke txitshingelelo masoni ka dibhofu. Xonipha Txizimu txako: Ani ngani Mkoma!
15Mi nga hambaniseni mhaka kulamulani kwanu; u nga wone khohe ya wule i ku txisiwana, kambe u nga khatalele nyatithombe; u fanete kulamula mkwanu ngu kululama!
16U nga phaye livengo hagari ka va ka kwanu; u nga mangalele mwakelani wako, eza e mana phango. Ani ngani Mkoma!
17U nga vengele wa ka kwanu mbiluni kwako; mkawuke ngako ti txi laveka, u si wi txionhoni ngu mhaka yakwe.
18 # Wona ni ka: Mat. 5:43; 19:19; 22:39; Mar. 12:31; Luk. 10:27; Var. 13:9; Vag. 5:14; Jak. 2:8. U nga pandiseke, kambe u nga ve ni txiviti ngu vathu va ka kwanu, aniko randa mwakelani wako nga ti u ti randisako tona awe upune. Ani ngani Mkoma!
19U na vekisa sileleto sangu; u nga leke txifuyo txako txi kandwa ngu txifuyo txa limwani lixaka; u nga phaye thembweni kwako mixowo yimbidi yo hambana ya timbewu, kambe u nga ambale nguwo yo lukwa ngu mixowo yimbidi yo hambana.
20Ngako wamwamna wokari a txi otela ni wamsikati wu i ku khumbi, i di txikaba txa mmwani wamwamna, wamsikatiyo kha na mbi tirulwa hambi kutxhatxhiswa, ngu wumbidi wawe va na tsayiswa, aniko kha va na mbi dawa, nguko wamsikati a ti sinzi kutxhatxhiswa. 21Wamwamna eneyo a na tisa hamba masoni ka Mkoma, ha txikeni ka ditenda da msengeletano, kasi ku ta maha mningelo wa mhamba yo dihela txionho. 22Ngu mningelo wa mhamba, mphaxeli a na maha mhamba yo dihela txionho txa wule wamwamna ngu hamba yile, masoni ka Mkoma, ngu txona txionho txile, se txionho txi na divalelwa.
23Ngako mi txi wulela ka ditiko di ni nga mi thembisa, mi txi phaya mindonga yi yi ningako mihando yo dyiwa, ya tixaka ta tingi to hambana; amuwa ka malembe mararu, mihando ya kona yi na va i di makhutu; ngu toneto mi nga yi dyeni. 24Kambe ka dilembe da wumune, yotshe mihando yi sawulekile, yi na va yi txi mahwa mningelo ka Mkoma, kasi ku m'bonga. 25Se ka dilembe da wutxhanu, mi na va mi txi dya mihando ya kona, kasiku mindonga yi txi veleka mihando yayingi, ani ngani Mkoma, Txizimu txanu.
26Kha mi na mbi dya nyama yi yi ku ni mnoha; kha mi na mbi wotisa ka nyamsoro, kambe kha mi na mbi xaxuva ka nyatixolo!
27Mi nga ti yoleni ngu kurendelekisa magwito ka misisi, kambe mi nga ti yoleni madhawani ka txiletu. 28Mi nga ti txhaveleni, hambi ku ti lova ha mmidi kwanu, ngu mhaka ya kufa: Ani ngani Mkoma!
29U nga nyenyezise mwanana wako wa dihorana, ngu ku mkujetela ti to e maha wugelegele, nguko ditiko di nga ti ningetetela amu ka wugelegele, di txi tala ngu wubhemba. 30Vekisani Masabbata yangu, mi va ni txithavo ka nyumba yangu yo sawuleka: Ani ngani Mkoma!
31Mi nga yeni ka vanyamsoro, hambi ka vanyatixolo, mi nga thuke mi txi ya ka vona, nguko mi nga ti nyenyezisa: Ani ngani Mkoma, Txizimu txanu.
32Khukha u txi ema, u komba txithawo ka wule a ku ni msungo wa wunvi, u txi xonipa m'thu wule i ku wa hombe. Thava Txizimu txako: Ani ngani Mkoma.
33Se ngako mluveli a txi ta zumba ka ditiko danu, mi nga mxupheni. 34Mluveli wule a zumbako ni nanu a na va a txi xayiswa ku nga mmweyo wa va ka kwanu, u na mranda nga ti u ti randisako tona awe upune, nguko nanu mi ti valuveli ditikoni ka Egipta: Ani ngani Mkoma, Txizimu txanu!
35Mi nga maheni wukanganyisi kulamulani kwanu, hambi ka mpimo wo nemela ni wa kulapha ka simaha! 36Mi nava ni sikalo sa sinene, ni marigwi amanene, efa ya yinene, ni hini ya yinene. Ani ngani Mkoma, Txizimu txanu, ni nga mi humisa ditikoni ka Egipta!
37Mi na vekisa sotshe sileleto sangu, ni kulondisa yotshe milayo yangu: Ani ngani Mkoma!
Currently Selected:
Levhi 19: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.