Levhi 5
5
Timhaka to dingana kuningela mphaxo
1Se ngako m'thu a txi dhanelwa kuya fakaza mhaka yokari, a nga yi wona mwendo a nga yi ziva, aniko a txi lamba kuwomba, sekoko eyo m'thu a na rwala txionho txakwe;
2mwendo ku ngako m'thu a txi gwesa txokari txa nzambwa, hambi asi ti zivi, kufana ni kugwesa txirumbi txa txihari txa nzambwa, txa txitinga mwendo txo fuywa, mwendo txo tsimbila ngu dibindi, i di txa nzambwa, eyo m'thu ana ni mnandu, mbwa nzambwa;
3hambi ku ngako m'thu a txi gwesa ni yihi nzambwa ya mmwani m'thuyo, neneyo m'thu ana ni mnandu wa nzambwa;
4ni kungako m'thu, na asi ti zivi ka txonetxo txikhati, a txi xambanya ti to a na maha ta tinene mwendo to biha ka mmwani m'thu, se ngu msana e tiziva ti a nga maha, neneyo m'thu ka mhaka yoneyo ana ni mnandu.
5M'thu wu a nga onha ka mhaka yihi ni yihi, a fanete kutitshanza ka tile a ku ni mnandu ka tona. 6Se a fanete e maha mningelo ka Mkoma, kasi kudivalelwa txionho txi ene a nga txi maha, ngu txinvutata txa mkati mwendo phongo, mphaxeli a na mmahela mhamba yo divalelwa txionho txi ene a nga txi maha.
7Aniko, ngako m'thu a txi pwata mningelo wa nvuta mwendo wa phongo, wa sikota kuningela ka Mkoma, ngu mhamba ya txionho txakwe, matuva mambidi mwendo mavhondo mambidi, a situvani, kasi ku dimwedo di txi va mhamba ya txionho, dimwani di txi va mhamba yo hiswa. 8Se a na ma yisa ka mphaxeli, kasi ku ene mphaxeli, a na khata ngu kumaha mhamba ya kudivalela txionho; se a na teka dimwedo e di sukuruta msungo ngu ha thamoni, aniko asi khatuli. 9Se ngu mnoha wa wule wa kudivalela txionho, a na xwayela ha disetani ka txiluvelo, ani mnoha wu wu salako a na wu theletela hafuhi ka txiluvelo. Ayiya i mhamba yo kuwula txionho, txi a nga tximaha, se a na divalelwa. 10Aniko ngu da wumbidi a na maha mhamba yo hiswa, nga ti mlayo wu rumako tona. Mphaxeli a na maha ngu dona mhamba yo kuwula txionho txi a nga txi maha, se a na divalelwa.
11Aniko, a txi tandeka kumana matuva mambidi, mwendo mavhondo mambidi a situvani, a nga sikota kumaha mhamba yo basisa txionho txi a nga tximaha, ngu mune wa makilu a mpupu wa wunene. Aniko a nga thuke e thela mtona txitimwi ka wona, hambi ku wu vekela dibaselo, nguko mhamba yiya, nja txionho. 12Se a na tisa mpupu ka mphaxeli awu a no wela dianza do tala, e wu hisa ha txiluveloni, wu txi maha txialakanyiso ka Mkoma; mningelo wa kuthavisa txionho. 13Mphaxeli a na maha mhamba yo basisa txionho ngu wona, txionho txi m'thu eneyo a nga txi maha, txionho txihi ni txihi txi na divalelwa. Mpupu wuwa wu no sala, mbwa mphaxeli, nga ti kumahwako ngu mningelo wa sakudya.
Miphaxo yo thavisa minandu ya sionho
14Se Mkoma a to womba ka Mosi a txi khene:
15Ngako m'thu wokari a txi hambanisa mlayo ngu kulunduma amu ka miningelo ya Mkoma, sekoko a fanete kutisa ka Mkoma, kasi kudivalewa txionhotxo txa kulunduma, hamba ngu ka mtxhambi wakwe, yo mbi na txibawa. Mpimo wa kunemela wu wu dinganako kuhumiswa wa silivhela, wu ku ni fanelo yo ningelwa, madingano ni mipimo yi yi thumiswako mu dithepeleni, kasi kudivalela txionho. 16Ngu kumaha keto, a na dihisa ngu kuhumisa ka mtxhanu male, yo dinganisa sile so sawuleka a nga ti tekile, se a na si yisa ka mphaxeli; ngu msana, mphaxeli, ngu txinvutana txa kudivalela txionho txa m'thu wule, a na maha mhamba ya kudivalelwa ka txionho.
17Se ngako m'thu a di onhile ngu kumaha to biha, e tsulupeta mlayo wokari wa Txizimu, e maha ti ti si faneliko kumahwa, hambi asi ti zivi, a na va ni txionho, kambe a rwate mnandu. 18A fanete kuteka hamba yo mbi na txibawa, e yi yisa ka mphaxeli, madingano ni txionho txakwe. Se mphaxeli a na maha mhamba yo kuwula txionho txi a nga txi maha ngu kulunduma, se ene a na divalelwa. 19I mhamba yo divalela mnandu; kha ditshuri ka Txizimu, a ti manisile mnandu.
Currently Selected:
Levhi 5: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.