Levhi 6
6
1 Mkoma a to womba kambe ka Mosi, a txi khene:
2Ngako m'thu wokari a txi onha, a txi wukela Mkoma, e kanganyisa ngu kwa mbi tshumeta ka mwakelani wakwe, asile a ku naso, mwendo ku mpela, mwendo ku mlambela, e ti tsimba ngutu ka mwakelani wakwe; 3mwendo a di rote txile txi ngadi mwalate, se a txi mlambela ngu kuxambanya makuhu, mwendo kumha ni txihi ka sotshe sile si onhisako m'thu, 4ti na maheka koko taku, ngako a di onhile e maneka a di ni mnandu, e tshumeta sile a nga pa, mwendo sile a nga lamba naso, ngu kutitsimba, mwendo sile a nga ti ti ningilwe ku si xayisa, mwendo sile so mwalala a nga si rola, 5mwendo ngu sotshe sile a nga xambanya ngu makuhu; se a na si tshumeta sotshe, e sanzekela ngu mpimwanyana wa wutxhanu; ngu ditshiku da mningelo wa kudivalelwa ka mnandu wakwe, a na si ningela ka nyamne wa sona. 6Se a na tisa ka Mkoma, hamba ya kwa mbi na txibawa ya mtxhambi, kasi ku va mningelo wakwe wa kudivalelwa mnandu; madingano ni ti u no ti wonisa tona, u si tisa ka mphaxeli. 7#Wona ni ka: Mit. 5:5-8. Kambe mphaxeli a na maha mningelo wa kudivalelwa ngu wona masoni ka Mkoma, se a na divalelwa ka totshe tile a nga maha ti txi mmanisa mnandu.
Miningelo yo hiswa
8 Mkoma a to womba kambe ka Mosi, a txi khene: 9Laya Aroni ni vanana vakwe u txi khawe: Mlayo wa mningelo wo hiswa ngu wuwa:
Mningelo wu na hiswa ha txiluveloni wotshe wusiku kala ni mixo, se wu na turiswa ngu mndilo ha txiluveloni. 10Se mphaxeli a na ambala syambalo sakwe sa linyu, a txi ambala dibhuluku da linyu, se a na thavisa dikhuma, msana ka kuva mndilo wu di tshokomisile mningelo wo hiswa ha txiluveloni, a txi di veka didhawa ka txiluvelo. 11Msana keto, a na ambula syambalo sakwe, a txi ambala simwani syambalo, se a na tsula ni dikhuma hahanze ka wugovelo, ka wukhalo wo basa.
12Mndilo koko wu na tura txitimwi ka txiluvelo, kha wu na mbi timeka; kambe mphaxeli a na engetela tikhuni ka wona mixo ni mixo, e veka kha kwati mningelo wo hiswa txitimwi ka txiluvelo, se ngu txitimwi ka kona a na hisa mafura, a miningelo ya mpatano. 13Mndilo wu na tura yotshe mbimo ha txiluvelo; kha wu na mbi timeka.
Miningelo ya timbewu
14Mlayo wa mningelo wa sakudya ngu wuwa: Wu na ningelwa ngu mmweyo wa vanana va Aroni ka Mkoma, masoni ka txiluvelo. 15Se a na tata dianza ngu mpupu wa wunene wa mningelo, ni mtona wa kona, ni dotshe dibaselo di di ku txitimwi ka mningelo wa sakudya; sekoko e wu hisa ha txiluveloni; ewo mbwo bhumula, ngu ku va i di wa txialakanyiso ka Mkoma. 16Se wule wu salako va na dya, Aroni ni vanana vakwe; sa kwa mbi tshumbela si na dyelwa wukhaloni ko sawuleka; si txi dyelwa mtendelani ka ditenda da msengeletano. 17So tshumbelwa kha si na mbi bhikwa; thomba yawe ngu yi ni nga va ninga ka miningelo yangu yo hiswa; nzo sawuleka ngutu, kufana ni mningelo wa kudivalelwa ka txionho, ni kufana ni kudivalelwa ka mnandu. 18Votshe vavamna hagari ka vanana va Aroni, va na dya sa mningelo wa sakudya; txi na va txileleto txa kwa mbi gwita ka tihunzu tanu, hagari ka miningelo yo hiswa ka Mkoma; ni wihi a no si gwesa a na sawuleka.
Mningelo mbimo ya kutotwa ka vaphaxeli
19 Mkoma a to womba kambe ka Mosi a txi khene: 20Awuwa mningelo wa Aroni ni vanana vakwe, va no ningela ka Mkoma, ka ditshiku dile wene a no totwa ku va mphaxeli: Mpimo wa wugumi wa efa wa mpupu wa wunene, ngu mningelo wa sakudya; hafu yimweyo ni mixo, yimwani hafu ni minova. 21Si na kanyangelwa ni mtona; amu ka dipani; se sitxuwu so bhikwa sa mningelo, u na maha ngu sona miningelo wo bhumula ka Mkoma.
22Vavamna va i ku ngamu ya vaphaxeli, ngu vona dwe va ku ni fanelo yo dya ni vona yona nyama yiya, nguko i nyama yo sawuleka. 23Ngu kumaha keto, wotshe mningelo wa mphaxeli wu na hiswa; kha wu na mbi dyiwa.
Mningelo wo thavisa txionho
24 Mkoma a to womba kambe ka Mosi, a txi khene: 25Gela Aroni ni vanana vakwe, u txi khawe: Mlayo wa kudivalelwa ka txionho ngu wuwa:
Ka wukhalo wule ku dawako mningelo wo hiswa, ku na dawa mningelo wa kudivalelwa ka txionho, masoni ka Mkoma; se wu sawulekile ngutu. 26Mphaxeli wule a no wu mingela ngu mhaka ya txionho, a na dya; wu na dyelwa ha wukhaloni ko sawuleka, ha mtendelani ka ditenda da msengeletano. 27Ni txihi txile txi no gwesa nyama yile, txi na sawuleka; ngako mnoha wa kona wu txi xwayela txyambalo txa m'thu wokari, u na kuwula txile txi nga txabwaketelwa, ka wukhalo wo sawuleka. 28Se khadi yile yo wumbwa yi na bhikelwa ka yona nyama; aniko ngako yi txi bhikelwa ka khadi ya koporo, yi na guvwa, ni kukuwulwa amu ka mati. 29Nyama yiya, yi na dyiwa ngu votshe vavamna vale i ku vaphaxeli; yi na va yi di sawulekile ngutu. 30Kambe kha ku na mbi dyiwa ni sa mphaxo ni wawumwewo wa kudivalelwa ka txionho, awule mnoha wa kona wu tiswako ditendani ka msengeletano, kasi ku ta sawulekisa nyumbani; wu nga dyiwe, wu na hiswe ha mndiloni.
Currently Selected:
Levhi 6: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.