Mitengo 31
31
Yimbi yo wukela Vamidhiyani
1Se Mkoma a to womba ka Mosi, a txi khene:
2Photela vanana va ka Israyeli ka Vamidhiyani; msana keto u na tsuliswa ka vathu vako.
3Mosi a to womba koko ka vathu, a txi khene:
Va na xome vokari va ka kwanu va txi yalwa ni Vamidhiyani, kasi kuya photela Mkoma ka Vamidhiyani. 4Lihunzu ni lihunzu ka toshe tihunzu ta ka Israyeli, li na rumela 1.000 yimbini.
5Se ku to rumelwa magumi a mazana a va ka Israyeli 1.000 ngu lihunzu limwelo ni limwani: 12.000 wa masotxhwa yimbini. 6Se Mosi a to va rumela yimbini 1.000 wa vona, ngu ka lihunzu limwelo ni limwani, ve tsula ni Finiyasi, mwana Eleyazari, mphaxeli, yimbini, ni siya so sawuleka, ni mipundu yo txharihisa manzani. 7Se va to lwa ni Vamidhiyani, nga ti Mkoma a nga rumisa tona ka Mosi; ve dayela votshe vavamna. 8Va to daya vamwani, kuleka vale va nga ti datwe, i ku vafumeli va Vamidhiyani, i ku Evhi, ni Rekemi, ni Zuri, ni Huri, ni Rebha, eko mtxhanu wa vafumeli va Vamidhiyani; ni Bhalahamu, mwana Bheyori, va nga m'daya ngu ditxhari.
9Kambe vanana va ka Israyeli, va to tsulisa wukhumbini vavasikati va Vamidhiyani, ni vanana vawe; ve teka ni sihari sawe sotshe, ni sifuyo sawe sotshe, ni totshe tithomba tawe. 10Se va to hisa ngu mndilo otshe madhoropa awe, ni tinyumba ta kona totshe, ni otshe mazumbo awe. 11Kambe va to teka sotshe so handwa, ni votshe vavamna ni sihari. 12Ve tisa ka Mosi ni ka mphaxeli Eleyazari, ni ka msengeletano wa vanana va ka Israyeli, tikhumbi, vo ñolwa, ni so handwa, dizumboni, tithembweni ka Mowabhi, ti ku hafuhi ni mnambo wa Jordhani, kona Jeriko.
Kuwuya ka dibutho da yimbi ya va ka Israyeli
13Aniko Mosi ni mphaxeli Eleyazari, ni votshe vahombe va msengeletano, va to huma ve va amukela hahanze ka dizumbo. 14Se Mosi a to henyela vathangeli va dibutho da yimbi, vathangeli va magumi a mazana, ni vathangeli va mazana, ava va nga wuya ngu yimbini. 15Mosi a to khene kwawe:
Ina mi lekile vavasikati votshe ve hanya kani? 16#Wona ni ka: Mit. 25:1-3. Wona taku, ngu vona vava va nga kuzetelwa ngu Bhalahamu, veza ve maha ti to vanana va ka Israyeli, ve onhela Mkoma, mhakani ka Peyori, se kumaneka txiruko hagari ka msengeletano wa Mkoma. 17Konkuwa koko, dayelani votshe vavamna, hagari ka vanana; kambe dayelani votshe vavasikati va va nga ziva wamwamna wokari, va txi otela nayo. 18Kambe votshe vanana va txisikati, ava va sanziko kuziva wamwamna wokari, va txi otela nayo, va lekeni ve hanya, va na maha vanu. 19Se anu zumbani hahanze ka dizumbo mtxhanu wa masiku ni mambidi; ni wuhi wu a nga daya m'thu wokari, mwendo ni wuhi wu a nga gwesa m'thu wokari wa kufa, ngu ditshiku da wuraru ni ditshiku da wutxhanu ni mambidi, mi na ti sawulekisa, anu ni tikhumbi tanu. 20Kambe mi na sawulekisa sotshe syambalo, ni sotshe syambalo sa madhowo, ni sotshe so mahwa ngu matoya a tiphongo, ni sotshe siya sa mapulango.
21Se mphaxeli Eleyazari a to khene ka vavamna vale va nga ti tsute ku yalwa:
Txileleto txa mlayo wu Mkoma a nga ruma Mosi, ngu txiya: 22Nzalama, silivhela, ni koporo, ni simbi, ni thini, ni mthovhu, 23sotshe sile si tsanako ha ka mndilo, mi na si pindisa ngu ha mndiloni, kasi ku si basa; hambi keto, si na kuwulwa ngu mati o sawuleka; aniko sotshe si si tsaniko ka mndilo, mi na si kuwula ngu mati. 24Kambe mi na kuwula syambalo sanu ngu ditshiku da wutxhanu ni mambidi, kasi ku mi txi na basa; se msana keto mi na wulela dizumboni.
Kuabaniselwa ka sile si nga honyolwa ka Vamidhiyani
25 Mkoma a to womba kambe ka Mosi, a txi khene:
26Teka mtengo wa si si nga ñolelwa, ka vathu ni sihari, awe ni mphaxeli Eleyazari, ni misungo ya vatate va msengeletano; 27se u abanisa sile so ñolwa ngu madhawa mambidi, ka vale vo sikota kha kwati kulwa, va nga huma veya yimbini, ni wotshe msengeletano. 28Sekoko ka Mkoma, u na teka nduwo ya vavamna va yimbi, avale va nga huma veya yimbini; amu ka 500, njimaha tximwetxo, ka vathu hambi ni ka tihomu, ka timbongola ni ka tinvuta. 29Se dimwani didhawa, mi na teka mi ningela ka mphaxeli Eleyazari, ka mningelo wo ndiwitelwa, ka Mkoma. 30Aniko ka hafu ya vanana va ka Israyeli, amu ka mtxhanu wa magumi, u na teka tximwetxo, ka vathu ni ka tihomu, ka timbongola ni ka tinvuta, ka sotshe sihari; se u na si ningela ka va ka Levhi, va ku ni mthumo wa kuwoneleta ditenda da Mkoma.
31Se Mosi, ni Eleyazari, mphaxeli, va to maha nga ti Mkoma a nga leletisa tona ka Mosi.
32Msana ka kuva masotxhwa ma di hungute sa ona ka sile ma nga honyola, asi si nga sala ngu siya: 675.000 wa tinvuta; 33Ni 7.200 wa tihomu; 34Ni 61.000 wa timbongola; 35se vavasikati va va nga mbi ziva wamwamna ve otela nayo, votshe i 32.000. 36Se hafu ya sile si nga sala si ningelwa ka masotxhwa i ti mpimo wa 337.500 wa tinvuta. 37Se ka tinvuta u na humisela Mkoma 675 wa tinvuta. 38Ka 36.000 wa tihomu; u na niga Mkoma mtxhanu wa magumi ni mambidi a tihomu ni timbidi; 39Ka 30.500 wa timbongola; u na ninga Mkoma mtxhanu wa magumi ni dimwedo, ni mbongola yimweyo. 40Se ka 16.000 wa vathu; u na ninga Mkoma, magumi mararu a vathu ni vambidi. 41Se Mosi a to ninga mphaxeli Eleyazari, siningo sile si nga humiselwa Mkoma, nga ti Mosi a nga rumiswa tona ngu Mkoma.
42Se hafu ya si Mosi a nga ninga vanana va ka Israyeli, si ti dingana ni si a nga ninga va va ngaya yimbini. 43Hafu yi a nga ninga msengeletano ngu yiya: 337.500 wa tinvuta; 44Ni 36.000 wa tihomu; 45Ni 30.500 wa timbongola; 46Ni 16.000 wa vathu; 47Ka hafu ya vanana va ka Israyeli, Mosi a to teka m'thu mmweyo ka mtxhanu wa magumi a vathu, ni ka sihari, e ninga Valevhi, i ku vona va nga ti xayisa M'dhuti wa Mkoma, nga ti Mosi a nga rumiswa tona ngu Mkoma.
Mningelo wa vathangeli
48Sekoko vathangeli va va nga ti tsimbitisa mabutho a yimbi a magumi a mazana, ni a dizana, va to ya ka Mosi, 49se va txi kha vona ka Mosi:
Sithumi sako si bate masotxhwa awa hi ma thangelako, se hi mani ti to vaho votshe, kha ku pwateki ni wammweyo kwathu. 50Ngu kumaha keto, va to tisa mningelo ka Mkoma, mmwani ni mmwani ngu ha a nga pimisa ngu kona:#31:50 Mwendo: sa lisima. Mihindo ya msuku, tiphera, masinda, tiketani, ni wusekenya.
51Se Mosi, ni Eleyazari, mphaxeli, va to amukela ngu kwawe, siya sa nzalama; sotshe i ti ti siya so mahwa kha kwati. 52Se yotshe nzalama ya mningelo wo ndiwitelwa, awu va nga ningela ka Mkoma, i 16.750 wa maxekele, a va tihunzu ni va mazana. 53(Vavamna va yimbi, mmweyo ni mmweyo a ti ti tekete sakwe). 54Mosi ni Eleyazari, mphaxeli, va to amukela nzalama ya vathangeli mabutho a yimbi ni ya mazana, ve si tisa ka ditenda da msengeletano, kasi kualakanyisa vanana va ka Israyeli, masoni ka Mkoma.
Currently Selected:
Mitengo 31: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.