Mitengo 32
32
Tihunzu ti ti nga sala wutxani ka mnambo wa Jordhani
(Dhewuteronome 3:12-22)
1Se vanana va Rubheni ni vanana va Gadhi, va ti ti ni sifuyo so tala ngutu; se va woni ditiko da Jazeri ni ditiko da Gileyadhi, kasi kuva makhalo a sifuyo. 2Va tota koko vanana va Gadhi ni vanana va Rubheni, ve ta gela Mosi, ni mphaxeli Eleyazari, ni vahombe va msengeletano, va txi kha vona:
3Atarote, ni Dhibhoni, ni Jazeri, ni Ninira, ni Hesibhoni, ni Eleyale, ni Sebhani, ni Nebho, ni Bheyoni, 4ditiko di Mkoma a ngadi tsayisa masoni ka msengeletano wa ka Israyeli, ditiko da sifuyo; se sithumi sako si ni sifuyo. 5Va to kha vona kambe: Ngako hi di mani kukateka masoni kwako, hi ninge ditiko diya athu sithumi sako, di maha thomba yathu, kambe u nga hi txhatukise mnambo wa Jordhani.
6Aniko Mosi a to wotisa vanana va Gadhi ni vanana va Rubheni, a txi khene:
Vananu va na tsula kulwani, se anu mi lava kuzumba hawa kani? 7Ngu kutxani anu mi thidhelisa timbilu ta vanana va ka Israyeli, kasi ku va si tsuli ka ditiko di Mkoma a nga va ninga dona kani? 8Ngu toneto, va nga maha va tate vanu, mbimo yi ni nga va ruma ngu niya Kadhesi-Bharneya kuya wona ditiko diya. 9Na va di hokile ka mkova wa Esikole, ve wona ditiko da kona, va to thidhelisa timbilu ta vanana va ka Israyeli, kasi ku va si tsuli ka ditiko dile Mkoma a nga ti va ningile.
10Sekoko ka ditshiku dile, Mkoma a to lumeka txiviti, se e xambanya, a txi khene: 11#Wona ni ka: Mit. 14:26-35. Kha ditshuri, vavamna vale va nga wuya ngu Egipta, va magumi mambidi a malembe kuya masoni, kha va na mbi di wona ditiko di ni nga xambanyela Abrahamu, ni Isaake, ni Jakobe, nguko kha va timisela ve ni londeta. 12Hahanze ka Kalebhi, mwana Jefoni, wa Mukenezi, ni Joxuwa, mwana Nune, ngu vona va nga timisela, ve londetela Mkoma. 13Ngu toneto, ku to tura kuhenya ka Mkoma, e wukela va ka Israyeli, e va maha ve tsimbila ve txheka, liza li guma lotshe liveleko lile li nga ti mahile wubihi, masoni ka Mkoma. 14Se anu vathu va sionho, anu mi nga teka wukhalo wa vatate vanu, kasi ku miya masoni ngu kuturisa kutsukula ka Mkoma, e hambana ni Isayeli. 15Ngako mi txi leka ku mlondeta, nene a na tshumela kambe e va leka votshe vale va ku txiwulani, se a na va xasela.
16Sekoko va to ya ka Mosi veya m'gela ku kha vona:
Hi na aka hawa sibala sa sifuyo sathu, ni didhoropa da vanana vathu. 17Kambe athu hi na xoma matxhari, hi kuluvetela hi thangela va ka Israyeli, hiza hi teka makhalo awe, se ngu mhaka ya vazumbi va ditiko, vanana vathu va na sala ka madhoropa a mtamo. 18Kha hi na mbi wuya mitini kwathu, an'ze kuza vanana va ka Israyeli ve teka ditiko, mmwani ni mmwani ka thomba yakwe. 19Nguko kha hi na mbi va ni thomba hagari kwawe, akhe mtxhatuko ka Jordhani, hambi kuya masoni; nguko yathu thomba, hi na yi mana wutxani, ka mtxhatuko wa Jordhani.
20Sekoko Mosi a to khene kwawe:
Ngako mi txi mahisa eto, mi xoma matxhari, miya yimbini masoni ka Mkoma, 21mmwani ni mmwani wanu a nga xoma, e txhatuka mnambo wa Jordhani, masoni ka Mkoma, ve tutumisa valala va ku masoni kwawe. 22Se ditiko di na vekwe hahatshi masoni ka Mkoma, ngu msana, mi na wuya mi ta zumba mi di divaletwe, masoni ka Mkoma ni masoni ka Israyeli. Ngu kona ditiko diya di no maha danu, masoni ka Mkoma; 23se ngako mi si mahisi eto, mi na va mi di onhile masoni ka Mkoma;#32:23 Mwendo: Kambe ti ziveni taku sionho sanu si na mi tumbulisa. sionho sanu si na mi tumbulisa, kambe mi na tsayiswa ngu mhaka ya sionho sanu. 24Akelani madhoropa timenzani tanu, ni sibala sa tinvuta tanu, mahani ti ti humako txisofuni kwanu.
25Sekoko vanana va Gadhi, ni vanana va Rubheni, va to womba ka Mosi va txi kha vona:
Athu sithumi sako hi na maha ngu ha nyamne wangu a nga ruma ngu kona. 26Timenzani tathu, vasikati vathu, thomba yathu, ni sihari sathu sotshe, si na va madhoropani ka Gileyadhi. 27Aniko sithumi sako si na txhatuka, mmwani ni mmwani a di xomile kuya kulwani, masoni ka Mkoma, nga ti nyamne wangu a nga wombisa tona.
28 # Wona ni ka: Dhewut. 3:18-20; Jox. 1:12-15. Sekoko Mosi a to ruma dipswi ngu mhaka yawe ka mphaxeli Eleyazari, ni ka Joxuwa, mwana Nune, ni ka misungo ya tinyumba ta vatate, va lihunzu la vanana va ka Israyeli. 29Se Mosi a to khene kwawe:
Ngako vanana va Gadhi ni vanana va Rubheni va txi txhatuka ni nanu mnambo wa Jordhani, mi yalwa yimbi masoni ka Mkoma, mi sikota kuteka ditiko di maha danu, va ningeni ditiko da Gileyadhi, di maha dawe; 30Kambe ngako va si txhatuki ni nanu va di xomile veya kulwani, ni vona va na ningwa wukhalo ditikoni ka Kanana.
31Se vanana va Gadhi ni vanana va Rubheni, va to xamula va txi kha vona:
Ati Mkoma a nga womba ka sithumi sakwe, hi na ti maha. 32Athu hi na txhatuka, hi di xomile, masoni ka Mkoma, hiya ditikoni ka Kanana, kambe hi na lumbwa ngu thomba mtxhatuko ka Jordhani.
33Ngu toneto, Mosi a to teka ditiko da Sihoni, mfumeli wa Vaamori, ni ditiko da Oge, mfumeli wa Bhasani, e ninga vanana va ka Rhubeni, ni vanana va ka Gadhi, ni vamwani va lihunzu la ka Manasi, mwana Josefa; ni madhoropa a dona, ni madhoropa awa ma nga ti di ranganyetile. 34Vavamna va ka Gadhi va to aka tinyumba ta Dhibhoni, ni ta Atirote, ni ta Aroweri; 35Ni Atirote-Xofani, ni Jazeri, ni Jogibhiya; 36Se Bhate-Nimra, ni Bhate-Haroni, madhoropa a mtamo, ni sibala sa tinvuta. 37Se vanana va ka Rubheni, va to aka tinyumba Hesibhoni, ni Eleyale, ni Kiriyatayime. 38Se, Nebho, ni Bhahali-Meyoni, va txitxile matina, ni Sibhima. Se ve ninga mamwani matina, ka madhoropa awa va nga ma aketa.
39Se vanana va Makiri, mwana Manasi, va to tsula Gileyadhi, veya tutumisa votshe Vaamori va va nga ti hanya ka ditiko diya, ve di teka. 40Ngu toneto, Mosi a to ningela ditiko da Gileyadhi ka Makiri, mwana Manasi, e zumba ka dona. 41Se Jayiro, mwana Manasi, a to teka mikhokhola yakwe, e yi dhana ti to i Havhote-Jayiro. 42Se Nobha a to teka didhoropa da Kenati, ni mikhokhola ya kona; a to di dhana ku i Nobha, i ku ditina dakwe.
Currently Selected:
Mitengo 32: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.