Vafilipiya 2
2
Kutinamisa ni kuguletwa ka Kristu
1Ngu toneto, ngako ku diho kuthavelelana ngu ka Kristu, ni kumalatelana ngu lirando, ni mpatano wa Moya, ngako ku diho wuxinji ni kuxanisekelana, 2tatisani kutsana kwangu, kasiku mi va ni myalakanyo yo fana, lirando limwelo, mbilu yimweyo ni moya wumwewo. 3Mi nga maheni to maha ngu kukanetana hambi kutikulisa, aniko thumani ngu kutiveka hahatshi, mi si alakanyi ti to ma pinda vamwani ngu wunene. 4Kha kulaveki ti to mmwani ni mmwani a txi khatalela si i ku sakwe dwe, aniko mmwani ni mmwani a na khatalele ni sa vamwani.
5Hagari kwanu, kulaveka mi zumba mi di ni mapimo a Kristu Jesu:
6Ene, hambiko i ku Txizimu ngu wutumbu wakwe,
kha lava kuhumelelisa wuzimu wakwe,
7aniko ene ngu kuranda kwakwe,
a tekile txiemo txa txithumi,
e ti fananisa ni vathu,
a txi ti wonekisa kota nga m'thu.
8A txi ti veka hahatshi ene apune,
e ti maha muengisi wa mlayo
kala kufa ngu lifo la txihambano.
9Ngu toneto, Txizimu txi mu guletile ngutu,
txi mninga ditina
di di ku txitimwi
ka otshe matina;
10kufela ku, ha ditinani ka Jesu,
otshe mazolo ya vale va ku txitimwi nzumani
ni ya vale va ku ha mafuni,
ni ya vale va ku hahatshi ka mafu,
me mu khizamela;
11se totshe tidimi ti fanela kuhuwelela
ti to Jesu Kristu ngene i ku Mkoma
kasi ku na dhumiswa Txizimu Tate.
Kuphatima nga tinyeleti ta nzumani
12Ngu konaho vo randeka ngutu kwangu, anu mi engisisako yotshe mbimo, thumani ngu txithavo ni kudhudhumela mi thumela kuhanyiswa kwanu, i si nga kumaha eto dwe, ngako ni di kumweko ni nanu, aniko ngutu-ngutu konkuwa ni ku kule ni nanu. 13Kha ditshuri Txizimu ngu txona txi mahako ti to mi xuva ni kuthuma kuranda ka txona.
14Thumani totshe mi si ngungurukeli ni kuphikizana, 15#Wona ni ka: Dhewut. 32:5. kasiku mi va mi si nga ni txisolo na mi di basile, mi va vanana va Txizimu vo mbi na nzambwa, hagari ka liveleko lo soholoka, na li di xangile; mi fanete kuphatima hagari kwawe, nga malambu ha mafuni; 16mi humelelisa Dipswi da wutomi, eto ti nava i di kupfaliswa kwangu ka Ditshiku da Kristu, nguko ni na va ni sa tutuma ni kuthuma mahala.
17Aniko, hambi idiku mnoha wangu wo theketwa ngu mphaxo wa mhamba, ni kuthumela likholo lanu, na nengela ni va ni tsaka kumweko ni nanu motshe; 18se na nanu nengelani mi va mi tsaka kumweko ni nani, ngu mhaka ya toneto.
Txhatxhameto ya Timoti ni Epafrodhito
19Na themba ngu ka Mkoma Jesu ti to ni na mi rumela Timoti, kasiku nani ni mana kutsaniswa ngu kuamukela mahungu a wutomi wanu. 20Nguko kha ni nga ni mmwani m'thu wa mbilu ya kufana ni yangu, awu a sikotako ku mi khatalela. 21Votshe va khatalela wutomi wawe, i si nga timhaka ta Jesu Kristu. 22Kasi i di ene, anu ma yi ziva mithumo yakwe: Ene, nga mwanana wu a thumisanako ni tate wakwe, a thumile kumweko ni nani ka mthumo wa Evhangeli. 23Ngu toneto, ngene ni verelako ku mi rumela, kunukunuko ni no tiziva ti ti no ni humelela. 24Na themba ngu ka Mkoma ti to nanani mbayimbayi ni nata kheyo kwanu.
25Konkuwa ni woni ku ta laveka ni txi mi rumela Epafrodhito, mwanathu, txithumi kulothu ni disotxhwa kulothu, awu i ku txirumwa txanu txa kuta ni vhuna ka si ni si pwatako. 26Ene wa vilela ku mi wona motshe, kambe wa karateka ngu ku mi nga engisa ti to a ti lwala. 27Kha ditshuri a ti lwala, kambe a ti hafuhi ni kufa. Aniko Txizimu txi mu pfete wusiwana, txi ni pfela wusiwana ni nani, kasiku ni si pfi kupandiseka txitimwi ka kupandiseka. 28Ngu toneto, ni kuluvetile ni mrumela kwanu, kasiku ni tshumela ni tsaka ngu ku mu wona; nanani ni na renga kupandisekani kwangu. 29Ngu toneto, mu amukeleni, ngu ditina da Mkoma, na mi txi tsaka ngu yotshe mbilu, mi vekela txithavo vathu vo fana ni nene, 30nguko a zite e lava kufa ngu mhaka ya mthumo wa Kristu, asi khatali ngu kufa, kasiku e mi tsiveta ka tile mi si sikotiko ku ni vhuna ngu tona.
Currently Selected:
Vafilipiya 2: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.