Vafilipiya 3
3
Nzila ya ditshuri ya kuhanyiswa
1Ngu kugwitisa, vanathu, tsakani ngu ka Mkoma. Kha ti ni karati kuengeta ni mi bhalela toneto ta timweto, nguko eto ti vhuna ku mi tsanisa. 2Ti woneleni ka timbwa, ti woneleni ka vamahi va to biha, ti woneleni ka va wukwera wa makuhu. 3Ava va nga ya wukwerani ngu ngathu, hi khozelako Txizimu ngu Moya wa txona; hi ti pfalisa ngu ka Jesu Kristu, hi si veki kuthemba kwathu ka nyama, 4hambiko ani ni ku ni fanelo ya kuthemba ni yona nyama. Nguko ngako wokari a txi alakanya kutithemba apune, ani ni fanela kupinda ene, 5#Wona ni ka: Mith. 23:6; 26:5; Var. 11:1. ni yisilwe wukwerani ka ditshiku da wutxhanu ni mararu, ni wa lixaka la ka Israyeli, ka lihunzu la ka Bhenjamini, Muhebheru, mwanana wa Vahebheru, ngu mu ka milayo ni mfarisi, 6ngu mu ka kukhutala, ni mxanisi wa Dibanza, ngu mu ka wululami wa Mlayo, ni maneka ni si nga ni mnandu. 7Asi i nga ti dibhindu, kwangu, ni si woni si si vhuni txilo ngu mhaka ya Kristu. 8Ngu ditshuri, sotshe ni si wona si si vhuni txilo, ngako ni txi si dinganisa ni lisima la kuziva Kristu Jesu, Mkoma wangu. Ngu mhaka yakwe, sotshe ni si tshotshile, kambe ni si wona i di nzambwa, kasiku ni mana Kristu; 9se ni maneka ni di kwakwe, na i si nga ngu mhaka ya kululama kwangu, kutako ngu ka mlayo, aniko ngu mhaka ya kululama ku kuhumako ngu ka likholo ka Kristu; kululama kuwa kutako ngu ka Txizimu akuwa ku tsaniswako ngu likholo. 10Ngu kota yeto, ni na sikota ku m'ziva, ene ni mtamo wa kuwuka kwakwe, ni txi sengela nayo kuxanisekani kwakwe, ni txi dinganiswa nayo kufani kwakwe, 11na ni txi emela ti to mwendo nani ni nga mana kuwuka ka vafi. 12Hi nga ti to ni hetile mthumo, mwendo kumana wusawuleki, aniko na khutala ni txi ya masoni ka nzila yangu, kasiku mwendo ni nga mana kuhetiseka, nga ti nani ni nga manwa ngu Kristu Jesu. 13Vanathu, kha ni pimisi ti to ni hokile magwito, aniko njilo tximwetxo ni txi mahako. Ngu kudivala ati ti ku msana, ni tutuma ngu kukarateka ni londeta asi si ku masoni, 14ni tsimbilisa kuya magwito, kala kuya mana txhatxhazelo ya kuxula, ayi ni dhanelwako yona nzumani ngu Txizimu, ditinani ka Kristu Jesu. 15Ngu konaho, athu hi ku vahetiseki he zumbeni hi txi alakanya toneto; se ngako mi di ni mialakanyo yimwani, Txizimu txi na mi tuletela txona. 16Hambi i di keto, ka ti hi nga hoka ka tona, he simamiseni hi tsimbila ngu nzila yimweyo.
17 # Wona ni ka: 1 Vak. 4:16; 11:1. Vanathu, ti maheni vaeteteli vangu, mi txi wonisisa kha kwati avale va hanyisako ti mi ti wonako kwathu. 18Nguko vaho vavangi, ava va hanyako kota nga valala va txihambano txa Kristu. Ni bhulisanile ni nanu sikhati sasingi ngu vona, se konakuwa ni womba-womba ni txi dila. 19Magwito awe ngu kulova, nguko Txizimu txawe ngu mrumbu wawe. Va ti kukumukisa ngu sile si va thelako tingana, va khutalela tithomba ta mafu dwe. 20Aniko athu mwani kwathu ngu nzumani, ahawa hi rinzelako ti to a nata ngu kona muhanyisi Mkoma Jesu Kristu. 21Ene a na phindula mmidi wathu wa wusiwana, a txi wu maha wu txi fanana ni mmidi wakwe wa wudhumo, a txi wu ninga mtamo wo fana ni wule ene a fumako ngu wona sotshe simaha.
Currently Selected:
Vafilipiya 3: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.