Rute 2
2
Rute ngako a txi lavetela sitxatxa
1Se Nowemi a ti ti ni dixaka da mwamna wakwe, i nga ti wamwamna wa mtamo, a di ni tithomba, wa liveleko la ka Elimeleki. Ditina dakwe i ti ti Bhowazi.
2Se Rute wa Mowabhi, a to womba ka Nowemi a txi khene:
Ni tumelele ku ni txi ya thembweni kuya lavetela sitxatxa, msana ka wule a no ya ni siza a txi ni amukela. Se masale wakwe a to mxamula a txi khene:
“Tsula mwanangu.”
3A to tsula koko, eya roletela sitxatxa thembweni, ngu msana ka vaeluli; se a to kateka, e mana didhawa da thembwe ya Bhowazi, i nga ti ti wa liveleko la Elimeleki.
4Se wona taku Bhowazi a to ta ngu Bhetlehema, a txi ta womba ka vaeluli a txi khene:
“Mkoma a nave ni nanu!” Se vona va to mxamula ku kha vona:
“Mkoma a na ku katekise!”
5Msana keto, Bhowazi a to wotisa ka dijaha dakwe, i nga ti mthangeli wa vaeluli, a txi khene:
“I mwana mani dihorana diya kani?”
6Se dijaha dile di nga ti vekilwe kuthangela vaeluli, di to xamula di txi kha dona:
Adiya ndihorana da ka Mowabhi, di nga wuya ni Nowemi ngu ditikoni ka Mowabhi. 7Dona di to kha dona: “Ni tumelele ni txi lavetela sitxatxa hagari ka tinyanda ta fulaho, ngu msana ka vaeluli. Ngu mhaka keto, dona di tile, kukhukhela ni mixo di maneka hawa kala ni konkuwa, hahanze ka mbimoanyana, a nga ya humula mtsudini.”
8Sekoko Bhowazi a to khene ka Rute:
Khu engisi mwanangu kani? U nge ya lavetela ka yimwani thembwe, ni ka kudotho u nga pinde hawa; aniko aha u na patana ni mahorana angu. 9Maso ako ma na wonisisa ka thembwe yi va no elula ka yona, se u na tsimbila ngu msana kwawe; ni leletete ka majaha ti to va si ku gwesi. Ngako u txi pfa ditora, tsula ka tidhuwa tile, u txi ya sela mati ale ma nga rekelelwa ngu majaha.
10Sekoko Rute a to wa ngu khohe, e khizama hahatshi, a txi m'gela ku khene:
“Ngu kutxani ni mana kukateka masoni kwako, aha koza u txi va ni kukhatala ngu ngani, ani ni ku wa matiko kani?”
11Se Bhowazi a to mxamula, a txi khene:
“Ni xawutetwe kha kwati, ati u nga ti maha ka masale wako msana ka kufa ka mwamna wako, ti to u lekile tate wako ni mame wako, ni ditiko dile u nga velekwa ka dona, u txi ta ka vathu va u nga ti si va zivi. 12Mkoma a na hakele mithumo yako, u txi amukela hakhelo yako ka Mkoma, Txizimu txa Israyeli, atxile u nga thavela mabhapini ka txona.”
13Se Rute a to khene ka Bhowazi:
“Ni na mane kukateka masoni kwako, awe nyamne wangu, nguko u ni thavelete ni womba-womba mbiluni ka txithumi txako, hambiko ani ni singako mmweyo wa sithumi sako sa txisikati.”
14Se ngu mbimo ya kudya, Bhowazi a to womba ka Rute, a txi khene:
“Tshuketa hawa u ta dya sakudya, u nakanisa txikhwemu txako ka vhinagre.”
Se ene a to khalahatsha hafuhi ka vaeluli, Bhowazi a to mninga phapha ya fulaho yo katingwa, a to dya e khura, si tshumela si txi sala. 15Se mbimo yi a nga khukha a txi lavetela, Bhowazi a to leleta ka majaha akwe, a txi khene:
“Mlekeni a txi lavetela ni mu ka tinyanda, kambe mi nga mkaratiseleni. 16Se tshomokisani matshanga okari, mi txi ma leka, kasiku e mana ku ma roletela, mi si mtsimbi.”
17Se Rute a ti ti lavetela thembweni mule, kala ni minova, a to hula sile a nga ti roletete, sa mpimo wolava kudingana ni efa yimweyo ya sevhadha. 18Se a to rwala e tsula naso didhoropani; se masale wakwe a to wona asi a nga ti si mani; Rute a to teka ni sakudya siya a nga ti si siyile e mninga. 19Sekoko masale wakwe a to m'gela a txi khene:
“Nyamsi u lavetete hani, niku u thumete hani kani? A na katekiswe awule a nga khatala ngu ngawe!”
Rute a to txhamusela ka masale wakwe, taku a thumile ni mani, a txi khene: “Wamwamna awule ni nga thuma nayo nyamsi, ditina dakwe i Bhowazi.” 20#Wona ni ka: Levh. 25:25. Sekoko Nowemi a to khene ka mane wakwe:
“A na katekiswe ngu Mkoma, awule asi lekiko kumaha wumbilu ka vale va hanyako ni vale va nga fa!”
Se Nowemi a to engeta a txi khene kwakwe:
Eyo wamwamna dixaka dathu da hafuhi, kambe mmweyo wa vatiruli vathu.
21Se Rute wa Mowabhi, a to khene: “A ni gete kambe a txi khene:
U na patana ni majaha ya ni ku nawo, kala kuza me heta kotshe kuelula ku ni ku nako.”
22Se Nowemi a to khene ka mane wakwe Rute:
“Ndinene mwanangu taku, u txi maneka kumweko ni mahorana akwe, kasiku u si manwi ka yimwani thembwe.”
23Ngu toneto, Rute a to ti pata ni mahorana a Bhowazi, kuva e roletela, kala kuza kuelulwa ka sevhadha ni fulaho ku txi guma; se a to zumba ni masale wakwe.
Currently Selected:
Rute 2: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.