Rute 3
3
Wunene wa Bhowazi
1Se masale wa kona Nowemi a to khene:
“Mwanangu, ina kha ti laveki ti to ni txi ku lavela wukhalo wo humula ka wona, kasiku u txi zumbiseka kani? 2Ina Bhowazi wule u nga ti ti ni mahorana akwe, hi nga dixaka dathu kani? Wona taku, a na ya hula sevhadha ha didhandoni kwakwe wusiku wuwa. 3Ngu mhaka yeto, samba, u txi tola mafura, u txi ambala simaha sako, u relela didhandoni, aniko u nga ti zivekise ka wamwamna, kala kuza a txi gwita kudya ni kusela. 4Se mbimo yi a no tsula kuya otela, u na wonisisa wukhalo wule a no otela ka wona; sekoko wulela, u txi vhunungula mikondo yakwe, u otela konaho, se ene a na kugela ati u fanelako ku ti maha.”
5Se Rute a to mxamula a txi khene:
“Ni na maha totshe ti u ni gelako.”
6Sekoko Rute a to relela eya didhandoni, eya maha madingano ni totshe ti masale wakwe a nga mleletisa tona. 7Bhowazi ngako a di dyite ni kusela, na mbilu yakwe yi di tsakile, a to ya otela hafuhi ni mmumbu wa sevhadha; sekoko Rute a to ta ngu kunyanimela, a txi ya vhunungula didhamba ngu mikondoni ka Bhowazi, a txi otela. 8Se ku to maheka taku ngu hagari ka wusiku, wamwamna wule a to dhuka, a txi wuka ngu kuthava; se e wona wamsikati a di otete minengeni kwakwe.
9Se ene a to khene:
“Ngawe mani kani?”
Se Rute a to khene: Ngani Rute, txithumi txako; fenengeta txithumi txako koko ngu didhamba dako, nguko awe u mtiruli.
10Se ene a to khene:
“Mkoma a na ku katekise, mwanangu; u mahile kha kwati wunene wuwa wako wo gwitisa, kupinda wo khata, nguko khwa lava kulondeta dizambi ni da dimwedo, da nyatithombe mwendo da txisiwana. 11Se konkuwa, mwanangu, u nga thave; ni na ku mahela totshe ti u nga ti womba, nguko vathu votshe va didhoropa dangu, va tiziva ti to u wamsikati wamnene. 12#Wona ni ka: Rut. 2:20. Kambe konkuwa, ditshuri ngutu ati to ani ni mtiruli, aniko aho mmwani mtiruli wa hafuhi ngutu kupinda ani. 13Zumba hawa wusiku wuwa, se mangwana ni mixo, ngako ene a txi kutirula, ndinene, ene a na kutirule; aniko ngako asi ti lavi ku kutirula, Mkoma a hanyako, ani ni na kutirula! Otela hawa, kala mangwana.”
14Rute a to otela koko mikondoni ka Bhowazi, kala ni mixo; se a to wuka va sanzi kuzivana, nguko Bhowazi a ti ti khene: “Ti nga zivaneke taku wamsikati wokari a tile ha didhandoni.”
15A to khene kambe:
“Tisa nguwo yi u nga fenengela u txi yi ñoleta.”
Se ene a to yi ñoleta, se Bhowazi a to pima mtxhanu wa tipimo ni wumwewo ya sevhadha, se a txi mrweka; sekoko a to wulela didhoropani.
16Se Rute a to hoka ka masale wakwe, wule a nga khene:
“Ti mahisile kutxani kani mwanangu?”
Se Rute a to xawutela totshe ti wule wamwamna a nga mmahela.
17A to khene kambe: “Sevhadha yiya ya mtxhanu wa tipimo ni wumwewo, ngene a nga ni ninga, a txi khene: U nga tshumele u txi ya ka masale wako, u si nga ni txilo.”
18Sekoko Nowemi a to khene:
“Thutha mwanangu, kala kuza u ziva ti yi no gwitisa tona mhaka; nguko awuwa wamwamna kha na mbi humula, kala kuza nyamsi a txi heta mhaka yiya.”
Currently Selected:
Rute 3: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.