Rute 4
4
Bhowazi a tekana ni Rute
1Se Bhowazi a to tsula habanzani, a txi ya khalahatsha kona; wona taku, awule wa mtiruli a nga ti wombawombile ngu ngene Bhowazi, a ti ti pinda, se a txi m'gela ku khene:
“He mawe, ngono ngu kheno, se hi nga khalahatsha hawa.”
Se a to jika a txi ya hale eya khalahatsha.
2Sekoko Bhowazi a to dhana digumi da vavamna hagari ka madhota a didhoropa, a txi khene:
“Hi nga khalahatshani hawa.”
Se vona va to khalahatsha. 3Sekoko a to womba ka mtiruli, a txi khene:
“Didhawa da thembwe yile i nga ti ti ya Elimeleki, mwanathu, a yi xavisile Nowemi, wule a nga wuya ngu ditikoni ka Mowabhi. 4Se ani ni lavile ku kuzivisa mhakeyo, taku: Yi tekele masoni ka vazumbi va ditiko, ni masoni ka madhota a vathu vangu. Se ngako u txi lava ku yi tirula, yi tirule; aniko ngako u si ti lavi ku yi tirula, ni gele, kasiku ani ni txi tiziva, nguko kha nga ho mmwani wa ku yi tirula, hahanze kwako, se msana kwako, ngani.”
Sekoko ene a to khene:
“Ani ni na yi tirula.”
5Aniko Bhowazi a to khene:
“Ka ditshiku di u no teka thembweyo manzani ka Nowemi, u na teka kumweko ni Rute, wa ni Mowabhi, msikati wa mfi, kasi kuwusa ditina da mfi txitimwi ka thomba yakwe.”
6Sekoko mtiruli a to khene:
“Ani kha ni na mbi mtirula, kasiku ni si onheteli thomba yangu; yi tirule awe ka wukhalo wangu, nguko ani kha ni na mbi sikota ku yi tirula.” 7Se txihena txiya txi ti ti ho ngu kale, ka Israyeli, txaku, ngako m'thu a txi lava kuleka thomba, a ti ti tsanisa mhaka ngu kuthavisa kathula, se a txi yi ningela ka mmwani; awuwa i ti ti wufakazi ditikoni ka Israyeli.
8 # Wona ni ka: Dhewut. 25:9. Mtiruli koko a to khene ka Bhowazi: “Yi amukele awe thombeyo, njako.” Se a to thavisa kathula.
9Sekoko Bhowazi a to womba ka madhota ni ka votshe vathu, a txi khene:
Mi tifakazi nyamsi taku ni amukete manzani ka Nowemi, sotshe sile si nga ti lumba Elimeleki, ni sa Kiliyoni, ni sa Mahaloni; 10ni ti to kambe na amukela Rute, wa Mowabhi, i nga ti ti msikati wa Mahaloni, a txi maha msikati wangu, kasi kuwusa ditina da mfi, txitimwi ka thomba yakwe, kasiku ditina da mfi di si fuvi hagari ka vanawe, ni ha banza ka wukhalo wawe; ka tiya, nyamsi mi tifakazi.
11 # Wona ni ka: Gen. 29:31--35:18. Se votshe vathu vale va nga ti ti ha banza, ni madhota, va to kha vona:
Hi tifakazi; Mkoma a na mahe ti to awu wamsikati a wulelako nyumbani kwako, a txi fanana ni Rakeli ni Leya, avale ngu wumbidi wawe va nga aka nyumba ya ka Israyeli; kateka ngutu amu ditikoni ka Efrata, u txi maha wa ditina da nduma amu Bhetlehema. 12#Wona ni ka: Gen. 38:27-30. Se nyumba yako yi ne nga nyumba ya Farezi, (awule a nga velekwa ngu Tamari ditikoni ka Judha), ka liveleko li Mkoma a no kuninga ka dihorana diya.
13Ngu kumhaka keto, Bhowazi a to amukela Rute, e maha msikati wakwe; se ene a to patana nayo, kambe Mkoma a to katekisa Rute a txi veleka mfana. 14Sekoko vavasikati va to kha vona ka Nowemi:
“A na dhumiswe Mkoma, a nga mbi leka ku kuninga mtiruli nyamsi, niku ditina dakwe di nave ni nduma ka Israyeli! 15Ene a na va mmalateli wa moya wako, ni ku kuxayisa amu kukumbani kwako, nguko mane wako, awule a ku dhundako, a mvelekile, kambe Rute mbwa mnene kupinda mtxhanu wa vanana ni vambidi.”
16Se Nowemi a to teka mwanana, a txi mkhutarela, e maha txikhonje txakwe. 17Se vaakelani vakwe va txisikati va to mraya ditina, va txi kha vona:
“Nowemi a veleketwe mwanana wa m'zambi.”
Se ditina dakwe va to m'dhana ku i Obhedhi.
Awuwa i tate wa Jese, tate wa Dhavhidha.
18Tiveleko ta Farezi koko ngu tiya: Farezi a to veleka Esironi, 19se Esironi a to veleka Aroni, se Aroni a to veleka Aminadhabhe, 20se Aminadhabhe a to veleka Nahasoni, se Nahasoni a to veleka Salimoni. 21Se Salimoni a to veleka Bhowazi, se Bhowazi a to veleka Obhedhi, 22se Obhedhi a to veleka Jese, se Jese a to veleka Dhavhidha.
Currently Selected:
Rute 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.