Génesis 13
13
Abram, witing Lot karak kaldakwi kalalahna
1Abram witing Egipto kaupak kalahwi kiuna kat, yalni, di balna ais duwa balna dai kidika bitik, duwi kiuna, bahang witing Néguev sauni yak nawatwi kiuna, aniwalas Lot bik kiuna dai witing karak. 2Abram laih witing di duyang dai, gol duwadai, lalah duwadai, dawak tinglau bik mahni duwadai. 3Néguev kaupak tani nawatwi kiuna Betel tawanni kat kiwi kana, kidika kaupak witing nawatwi kiuna muhnilau Betel dawi Hai kidika walsah kau ūni labanni pakna dai yakat. 4Kidika pāni yak dai kuduh, muhnilau sakripais busnin pāni as yamna dai kidika Dawan yakat minit yulnin yulni.
5Lot bik di duyang dai, witing papani karak kapat dai, sīp, turuh yayal dawak witing karak muih balna bang kidika bik mahni dai; 6kaunah witing sakkidika pāni kidik aitani awasdai, tinglau mahni kidika kasninna dianin. Witingna baisa sip-awas dai ban albu yalahninna. 7Kat Abram tingnilau maintalyang muihni balna kidika dawak Lot tingnilau maintalyang muihni balna karak kalbabauwa dai. Dawak bik kidika mani balna yak cananeo muihni balna, ferezeo balna kidika yakat yalahwa dai. 8Dawak kaput bahang ma as kat Abram yaklauwi kalyulna Lot yak: “Man yang karak kalwanaih mayang, kidika bahang yamni awaski mapasking yakat kalbilnin lani kidika sakkarang kat, dawak bik yang tingkilau maintalyang muihni balna dawi man tingmalau maintalyang muihni balna pasyak bik kalbilnin kidika sakkarang kat. 9Yakat sau bitik kidika sakki, man walyakta dutah. Plisma yang kaupak naikau dakta alahwah. Man tingpal nining yakat yawama kat, yang wadah nining yakat yawaki; kidika awaskat man wadah nining yakat yawama kat, yang tingpal nining yakat yawaki.”
10Lot witing bitik lakwi talna sau langni balna kidika Jordán wasni kung balna kidika bahang witing talna Zoar tawannibin kat, bahang kidika sauni langni laih was manas duwa dai, dawak bik dipulu dahna sauni as#13.10 Dipulu dahna sauni: Y.y. dipulu dahna pāni Dawan dini, hibru kulnin lani laih, nuhni kalkulwa tanka.,#Gn 2:10. kapat dai. (Dawan yaklau Sodoma dawak Gomorra balna kidika dismukwas tanit kau dai yakat, pāni kidika sihm kapat dai.) 11Dawak Lot witing Jordán wasni kung langni dai kidika bitik duna, dawak, masar nining yak witing kiuna, sakdai yakaupak kalahwi. Kaput laih Abram dawi Lot karak kaldakwi kalalahna. 12Dawak Abram witing bik Canaán sauni yak kiwi yalahna, dawak Lot laih sau langni kau tawan nunuhni balna yaihnitna yakat kiwi yalahna, Sodoma tawanni nuhni yaihnit yakat, 13kidika pāni muihni balna bitik laih dudutni palni dai, Dawan yakat di dutni yamyang palni dai.
14Lot mahka kalahwi kiuna usnit yak, Dawan yaklauwi Abram yakat kalyulna: “Sakman pāni kidika kaupak, tingpal niningyak yamni talah, dawak wadah nining yak, makilwa nining yak dawak ma kawa nining yak talah; 15yang lawik adika sauni talaman kidika bitik man yak māki ban kaput atnin dawak sulama balna dinina bik karang.#Ap.w 7:5; Gal 3:16. 16Yang lawik yamting kat witingna kidika mahni palni sau yahamni balna kaput kakalna karang; sau yahamni kulnin sip-awas kapat, man sulama balna bik sip-awas karang kulnin. 17¡Lawah, dawak adika sauni pāni naini, dawak pirihta panuhni kidika īra awaihta talah, kat yang lawik manyak maki bahang!”
18Kaput Abram witing uni labanni dutwi duwi kiuna kirah asangnipas yakat al as ayangni Mamre yaihnityak, kaput bik Hebrón tawanni nuhni yaihnit yak. Kidika yakat sakripais busnin pāni as yamna Dawan risnipik kau.
Currently Selected:
Génesis 13: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
