Génesis 14
14
Abram yaklauwi Lot yak laihwi yakwi
1Kidika mani balna yak, Amrafel kidika Sinar kingni dai, dawak Arioc kidika laih Elasar kingni dai, Quedorlaomer kidika laih Elam kingni dai, dawak Tidal kidika laih Goim kingni dai. 2Adika balna laih Bera nining yak wār kalbabauna dai, Sodoma kingni nining yakat, Birsa nining yak, Gomorra kingni nining yakat, dawak Sinab nining yak, Adma kingni, dawak Semeber nining yak, Zeboim kingni dawak kaput bik Bela kingni niningyak bik, dawak kidika tawanni laih ayangni ūk duwadai, Zoar. 3Adika witni yakat singka balna kidika, witingna kalbauyang ahalni duduwa kidika aslah ududuhna dai Sidim sauni langni yakat, kidika yakat kuduh Kuma Dauna kidika. 4King Quedorlaomer yaklauwi taihwi duna dai kurih 12, kaunah kurih 13 laihwa yakat, adika kingni singka balna kidika yaklalauna dai witing niningyakat kalbauna atnin. 5Kidika kaupak kurih ūk laihwa yakat, king balna Quedorlaomer karak aslah balna dai kidika uina dai Astarot Karnaim pāni yakat, dawak kidika yakat refaítas balna niningna yakat minitna bayayakna dai; kidika usnit kat Ham pāni yakat zuzita balna niningna yakat minit bayayakna dai, dawak emita balna yakat bik minitna bayayakna dai Save-quiriataim pāni yakat, 6dawak horeo balna niningna yakat minitna bayayakna dai, Seir asangnipas yakat, dawak uiwi uina dai Parán wanilang kat, kidika laihwi kauhmak wanilang yaihnit yakat ki. 7Dawak Quedorlaomer witing nawatwi kaina, dawak witing karak bangdai kidika balna bik, dawak En-mispat yakat uina, dawak kidika pāni ayangni ūk bik duwi Cades. Dawak witingna taninapas yakat ais bangkidika bitik laih daukakalna dai amalecitas balna panina yakat, dawak amorreo balna yakat bik sihm kaput diyayamna dai, Hazezon-tamar sauni yakat yalalahwa balna dai yakat.
8-9Kaput laih Sodoma dawak Gomorra kingni balna, Adma, Zeboim, dawak Bela balna kidika Sidim sauni langni yakat uina dai. Kidika yakat adika kingni singka balna adika kalbabauna; Quedorlaomer, Tidal, Amrafel dawak Arioc, balna niningna yakat, adika king ūk arungka balna kidika laih Elam, Goim, Sinar dawak Elasar sauni balna kidika kingni balna dai. 10Sidim sauni langni bitik kidika pa kudungni manas duwadai, bahang kidika laih tar manahdai, bahang Sodoma dawak Gomorra kingni balna kidika war kalbabauwa kidika kaupak maīri malawang atwi kiri uiwi kidika pāni kudungni yakat bubukna. Dawak king ūk balna laih asangpas yakat kiri yaklalana.
11Minit bayakyang muihni balna kidika yaklauwi kasnin dini balna dawak di balna minit nunuhni dai kidika bitik duwi uina, Sodoma dawak Gomorra kau bangdai kidika, dawak kidika pāni kaupak mahka uina. 12Lot kidika Sodoma yakat yalahwadai bahang, Abram āniwalas kidika, witing bik laihwi duwi uina dai, dini balna bitik. 13Kaunah kidika kaupak muih al as kiri yaklana dai kidika kaiwi Abram yakat kalyulna, bahang Abram laih amorreo muihni Mamre kirahni asangnipas yakat yalahwadai. Mamre laih Escol dawak Aner wirahni al dai, bahang witingna laih Abram ilpni kakawadai.
14Abram dakana witing walasni Lot kidika laihwi duwi uiwi silak yakat āna duwabangki, bahang witing dini yamyang balna walaninabis ūni pas kau batanh dadana balna kidika bitik uduhna, bahang bitik kat 318 dai, dawak kidika balna karak kalahwi king balna yakat uiwi uina Dan tawanni kat. 15Pukta, kidika muihni balna isningna aiwas kat Abram witing muihni balna karak kalpakwi king balna niningnakauh kalbabauna, dawak uiwi uina Hoba pāni kat, kidika laih Damasco tawanni nuhni kaupak tingpal niningyakat ki, 16di balna duwi uina dai kidika bitik laihwi dakyayakna. Kaput laih Abram yaklauwi āniwalas Lot kidika laihwi yakna. Kaput bik laih laihwi yakna yayal balna dawak muih ūk balna bik.
Melquisedec yaklauwi Abram yakatblisin kalana
17Dawak Abram nawatwi kaina, Quedorlaomer dawak king balna witing karak bangdai kidika niningna yakat kalbauwi minit bayakna usnit kat, dawak Sodoma kingni kidika kalahwi kalpapakna Save sauni langni yakat, kidika laih King Sauni Langni. 18Dawak Melquisedec bik kalahna, witing kidika laih Salem kingni dai, dawak bik Papang sumalniyang nuhni as dai, bahang plawar busna dawak wain bik yakna, 19dawak Abram yakat blisin kalawi aput yulna:
“Papang makau sakkidikablisin mawarang,
kisang dawak sau yamna kidika;
20dawak Papang makau sakkidikaayangni nuhni yamna karang,
witing yaklauwi mawak waihmala balnaminit bayaknaman kidika.”
Kaput laih Abram yaklauwi di balna dakyakwi duna dai kidika kaupak salap sahyakwi Melquisedec yakat kalana.#Hib 5:6-7:17. 21Usnit kat Sodoma kingni yaklauwi Abram yakat kalyulna:
—Man muih balna kidika yatah, dawak dini balna kidika laih dutah.
22Kaunah Abram yaklauwi nangnitlana:
—Dawan ayangni kau yaktik yultayang, Papang makau sakkidika, dawak witing yaklauwi makau kisang dawak sau bik yamna kidika, 23man dima kidika as bik dutas-awaki, trit wahni kidika awas bik suski wahni as bik dutas awaki, yang lawik di duyang yamnayang yatnam awas yulni. 24Yang di as bik dukih yāwas ki, kaunah diki yamyang balna kakasna kidika manah laih. Muih ahal yang mikdadana balna kidika laih witingna duninna kidika laih duduwarang ki, yuldarang kat, Aner, Escol dawak Mamre, witingna laih dinina duduwarang.
Currently Selected:
Génesis 14: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
