Génesis 22
22
Papang yaklauwi Abraham kasak kulninlani duwa kidika laihwi talwi
1Ma as as bayakwakat, Papang yaklauwi Abraham kasak kulnin lani duwa kidika laihwi talna. Bahang witing ayangni kau yakwi kalyulna, dawak, witing yaklauwi nangnitlana:
—Akat sakyang.
2Dawak Papang yaklauwi kalyulna:
—Man walanbis al aslah Isaac kidika dutah, man dalani talaman kidika, dawak Moriah sauni yakat yawah. Man kidika yakat yawa karauni kauna sakripais bustah, yang lawik namangkaki asangni tuna yakat.
3Kidika payahwak, Abraham witing mapiris yaklauwi biriniku dangni ilna; dawak sakripais yamnin kuhni dakwi dawi kiuna Papang yaklauwi kalyulna pāni dai yakat, bahang walanibis Isaac karak uina dai, kaput bik laih dini yamyang bu duwi kiuna. 4Ma bās laihwak, Abraham witing naikaupak talna dai Papang yaklauwi kalyulna pāni kidika. 5Dawak dini yamyang balna yakat diyulna:
—Manna laih akat wattanauh biriku balna karak. Yang dawak muihbin al adika karak manah baisa takitna yakat yawanaki, dawak Papang yakat mikitna yultik datik, wattik nawattik aiwanaki.
6Kaput laih Abraham witing karauni kauna sakripais busnin kuhni kidika duwi Isaac salahni yakat ilwi; usnit kat kuhbil dawak kuhpau duna, dawak albu uina. 7Kidika usnitkat Isaac yaklauwi Abraham yak kalyulna:
—¡Papang!
—¿Ais dukih mawih walakbis al? —Abraham yaklauwi kalyulna.
Isaac yaklauwi kalyulna:
—Talah, mayang kuh sahna dawak kuhpau bik dudi, kaunah ¿angkat sak yah sakripais karauni kauna busnin sīpnibin kidika?
8—Papang yaklauwi yakwi mayawarang karauni kauna busnin sakripaisni kidika, yang walakibis bin —papangni yaklauwi kaput kalyulna.
Dawak witingna albu ban lapakwi uina. 9Papang yaklauwi diyulna pāni yakat uiwi kakawakat, Abraham witing sakripais busnin pāni as yamna dawak kuh sahna bik mahka minit yakat ilna, usnitkat witing walanibis yakat sitna, dawak sakripais busnin pāni yakat ilna,#Jm 2:21. kuh minit yakat; 10kaunah kidika minitni yak kuhbil walanibis witing walanibis kidika sakripais busnin yamwak, 11Dawan innisal kidika makau kisang kaupak kalyulna:
—¡Abraham, Abraham!
Abraham yaklauwi biri nangnitlana:
—Akat sakyang.
12Insal yaklauwi kalyulna:
—Muihbin al yakat dutni as bik kalyamwinih, kat amanglatayang man Papang yamanidutaman, kat walambis aslah kidika yanin yultas-awasman dai.
13Abraham witing yamni talwak sīp almuk as tamni balna kidika damasni yakat diwitna sakdai; kaput laih witing kiwi sīpni almuk kidika duwi sakripais karauni kauna buswa kidika yamna dai, witing walanibis busnin dai pāni yakat.#Hib 11:17-19. 14Adika usnit kat Abraham yaklauwi adika pāni ayangni pakna: “Dawan yaklauwi dukih dini kidika yuwi.” Kidika bahang warmani kat bik baisa aput yulwi: “Asang yakat dukih dini kidika Dawan yaklauwi yuwi.”
15Dawan innisal kidika makau kisang kaupak watwi kalyulna Abraham yakat, 16bahang aput yulna:
—Dawan yaklauwi aput yulna: ‘Man adika yamnaman bahang, walambis al aslah kidika yang kau yanin yultas-awasman dai bahang, yang alas ayangki kau yaktik yultayang 17blisin mahni māki. Yamting kat man sulama balna kidika makau kisang yala balna mahni kapat karang, dawak bik kuma kungkau kauhnimak balna mahni kapat bik karang.#Hib 6:13-14; 11:12. Baisa minit yakat, witingna yaklauwi waihninala balna yakat tataihwa kidika laih ban kaput karang, 18nisan balna bitik sau akat bangkidika blisin duduna karang witingna munah,#Ap.w 3:25; Gal 3:8. kat yang yulki daka yamnaman bahang.’
19Dawak Abraham wat nawatwi kiuna dini yamyang balna wawatna pāni yakat. Usnitkat witingna bitik kalpakwi Beerseba yakat uina, kidika yakat Abraham watwi yalahna dai.
Nacor walanbis balna
20Ma as as bayakwakat, Abraham yul dakana, Milca bik walanbis ahal kalana Nacor yak. Nacor kidika laih Abraham wirahni al dai. 21Tatuna batahnna kidika laih Uz dai; usnit batahnna kidika laih witing wirahni Buz, kidika kaupak batahnna Kemuel, bahang witing laih Aram papangni dai. 22Kidika usnityak batahnna kidika laih Quesed, Hazo, Pildas, Jidlaf dawak Betuel. 23Dawak Betuel lāih Rebeca papangni dai. Adika walanbis ahal tiaskaubās adika Milca yaklauwi Nacor yakat kalana dai, Abraham wirahni yakat.
24Baisa minit yakat Nacor laih walanibis yakna dai Reúma kaupak walaninabis yayakna, kidika laih witing ialni kaupak. Bahang kidika balna laih adika ki: Teba, Gaham, Tahas dawa Maaca.
Currently Selected:
Génesis 22: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
