Génesis 23
23
Sara dauwak nununa
1Sara witing kurih 127 sangka dai, 2kaput laih witing dauna Quiriat-arba yakat, yuldarang kat Hebrón tawanni nuhni Canaán sauni kau yakat. Abraham kaidana Sara dauna kidika yulni, dawak kulnin bukna bik duna dai. 3Usnit kat witing yaklauwi kalahwi kiwi, kidika pāni kau hitita balna bangyakat diyulna:
4—Yang manna pasmangna yakat pa ūk muihniyang kaunah,#Hib 11:9,13. sau ū as yabakantanang yang yalki dauna kidika nukuh.#Ap.w 7:16.
5Dawak hitita balna biriwi nangnitlalana:
6—¡Plisma yanadakah! Man laih yangna paskingna akat Papang yaklauwi walwi yakna as man. Bahang man yalma kidika sau-ū tanit yamni yakat nutah, kat yangna kaupak as bik dikahtas karang.
7Kaput dawak Abraham hitita balna muhnina yakat yaklauwi rispik sainni as yamna, 8dawi diyulna:
—Rahm manna dukih manawakat yang yalki kidika akat nuna atnik, plismana Efrón, Zohar walanibis yakat yang yulki kalyultanauh, 9Macpela kinipala sulihni kidika yang akat yabakanwang, witing sauni kungkau kidika. Witing pāni sulihni minit ampus kat bitik palni laih minit lautik kalaki, kaput laih adika pāni akat sau-ū as yang diki pakkarang.
10Efrón, hitita muihni kidika witingna pasningna yakat sakdai bahang, Abraham yakat nangnitlawi yulna; kaunah witing yulna kidika laih muih bitik dakanin, dawak bik tawan nuhni dūrni ahni kau muih balna bayayakwa kidika bitik dakaninna yulna dai:
11—¡Dikah, yang dakiwan, plisma! Sau pis as yang lawik dauh māki, dawak kidika pāni kau pa sulihni sakkidika. Pa aslah muihni balna yangna adika witnis yang lawik dauh matayang kidika. Man yalma kidika yakat nutah.
12Dawak Abraham watwi witing kidika pāni muihni balna yakat rispik sainni yamna dai 13dawak Efrón yakat nangnitlana, muih balna bangkidika bitik muhnina yakat:
—¡Plismana yadakanauh manna! Kalmana dinit yakat buktik yultayang sauni kidika minit lalahni adika dutanauh, dawak kidika usnit kat yang yalki kidika sau yakat nuki.
14Kaput dawak Efrón yaklauwi nangnitlana:
15—Yadakah dakiwan: sauni kidika laih lalah 400 ki, bahang kidika yulni wat wat yuldaskarang, kaput bahang man yalma kidika nutah.
16Kaput laih Abraham witing lauwi kalanin kidika yamni kulna Efrón yakat yak, hitita balna muhnina yakat, dawak lalahni kulwi kalana. 17Kaput laih Efrón sauni Macpela yakat pakdai dai kidika, Mamre kaupak makilwa niningyakat, yuldarang laih, sau pīsni kidika dawak pa sulihni kidika, kaput bik pan balna bangkidika bitik kidika sauni yakat, 18Abraham dini kalna dai. Hitita muihni balna laih witingna witnis dai kaput bik laih tawan nuhni dūrni yaihnit munah bayayakwa balna bitik laih witnis dai.
19Kidika usnit Abraham witing yalni Sara kidika nuna Macpela sauni pīsni yakat kipala sulihni as kau, Mamre kaupak makilwa nining kau yakat, dawak kidika pāni ayangni ūk kau bik amanglana ki, Hebrón, bahang kidika laih Canaán yakat pakki. 20Kaput laih kidika sauni, pāni sulihni dai kidika bik, hitita balna yaklauwi kalbakakanna witing yalni Sara kidika nuna atnin.
Currently Selected:
Génesis 23: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
