Luk 16
16
Di yamyang as daniwan dini balna duwidutni yamna kidika
1Adika dini bik Jisas yaklau disainipil balna yakat diyulna dai: “Muih al di duyang as witing dini yamyang muihni as duwadai; dawak muih balna yaklau di duyang alni yakat uiwi kalyuyulna dai dini yamyang kidika laih dini yayamni balna kidika duwi dauh dismukwi. 2Daniwan kidika yaklau kalyulwak kiwak aput kalyulna: ‘¿Ais diniyah man yulma yayuyulwa kidika? Man ais wark yamnaman kidika yayultah, kat sip awaski baisa yang diki yamyang atnam.’ 3Di yamyang kidika laih aput kulna: ‘¿Ais yamkiyah waralaih yang dakiwan wark dis yadawa kidika? Yang paraski disyang di dahnin warkni yamna atnik, dawak bik asaldayang muih kau lalah yulna atnik. 4Amanglatayang amput yamtik wark dis datingkat muih balna ūnina yakat yaduninna kidika.’ 5Bahang daniwan yakat lalah kalaninna duduwa muihni balna yakat as diyulwak uina. Tatuna yakat kalyulwi dakana: ‘¿Dakiwan yakat ampus lauta kalanam dutamahn?’ 6Nangnitlana: ‘Disala tank 100 kalanik dutayang.’ Di yamyang kidika yaklau kalyulna: ‘Adika ki man launam dini kidika laih; bahang yalahta 50 manah ultah.’ 7Usnit kat ūk yakat kalyulwi dakana: ‘Dawak man laih, ¿ampus kalanam dutamahn?’ Kidika yaklau nangnitlana: ‘Plawar paun 100 kalanik dutayang.’ Di yamyang kidika yaklau kalyulna: ‘Adika ki man launam dini kidika laih; bahang ūk ultah 80 manah.’ 8Daniwan kidika laih amanglana dai dini yamyang dutni kidika witing kulnin lani amput di balna yamnin ridi dai kidika. Dawak witing silp lalahni warkni yulni balna yulwa mani kat, sau yakat yalalahwa muihni balna kidika kauh baisa ridi ki yaringni muihni balna kidika karak dawakat.
9“Yang yul manayultayang adika sauni ritsni dauh balna kidika dutanauh kaltalyang muihni yayamni duna atnamna yulni, ritsni balna kidika witwarang mani kat, muih as yaklau manna yakat manaduna atnin yulni ban kaput yalahnin ūni balna yakat.
10“Angdika muihni di bulah yakat rispik lani duwa kidika laih, di mahni yakat bik sihm rispik lani duwi; dawak angdika muihni di bulah yakat rispik lani dis kidika laih, di mahni yakat bik sihm rispik lani diski.#Mt 25:21; Lc 19:17. 11Kaput bahang, adika sauni ritsni dauh balna yakat manna rispik lani karuk di balna kidika yamtasmana kat, ¿wais yaklau rahm ritsni balna kidika manawarangyah? 12Manna muih dinina balna yakat rispik lani karuk yamtasmana kat, ¿wais yaklau manna dimana kidika manawarangyah?
13“Di yamyang as bik daniwan balna bu yakat dinina yamwas ki; kat as yakat laih dutni kalkulwarang dawak ūk yakat laih yamni kaltalwarang bahang, kidik awasbik as yakat barangni karang dawak ūk yakat laih dutni kalyamwarang bahang. Sip Papang dini yamdinah sau ritsni balna yakat laihdi yamdaski.”#Mt 6:24.
14Fariseo muihni witingna lalah usnit uiyang balna dai kidika, adika yulni dakawi Jisas yakat sarahni kalyuyulna dai. 15Jisas yaklau aput diyulna: “Manna kuduh muih balna muhnina yakat la kat kaldakamana kidika, kaunah Papang laih manna ismangna kidika amanglawi; bahang muih balna yaklau nuhni kukulwa kidika laih, Papang yaklau dutni talwi.
Lā kidika dawak Papang king kāwasauni kidika
16“Lā kidika dawak prapit balna kidika laih Jan kat uiwi kakawi. Kidika mani kaupak Papang king kāwa sauni yulni yamni kidika yuyulwi, dawak muih balna bitik laih parasni yayamwi kidika yakat kana atnin.#Mt 11:12-13.
17“Kisang dawak sau kidika balna kauh baisa isi ki bayakninna, lā yulni as bayaknin kidika karak dawakat.#Mt 5:18.
Jisas yaklau marid lani bahnin yulnisumalna kidika
(Mt 19:1-12; Mk 10:1-12)
18“Muih al as yaklau yalni dapamwi yal ūk duwarang kat, marid lani bahwi; dawak angdika muihni yal as alni dapamna kat duwa kidika laih, sihm marid lani bahwi.#Mt 5:32; 1 Kor 7:10-11.
Di duyang dawak muih minikunniLázaro karak yulni kidikamalni yulni
19“Muih al as di duyang dai, witing laih asna yayamni manah kāwadai dawak ma balna bitik yakat kasnin dini yayamni balna manah kaswadai. 20Muih minikunni bik as dai ayangni laih Lázaro, witing laih muihni kidika pilau manah dai dawak sau yakat yalahwadai di duyang muihni kidika dūrni kungyakat. 21Adika muih minikunni adika laih di duyang tinibil kaupak kasnin dini yayahni bubukwa kidika kaupak kaswi kalbung atnin dukih kalwadai; dawak sul balna kat bik witing yaihnit yakat uiwi pilauni kidika dadatwadai. 22Ma as kat muih minikunni kidika dauna dai, dawak insal balna yaklau duwi iliuna dai Abraham yaihnit yakat di kasna atnin. Di duyang muihni kidika bik dauwakat nununadai.
23“Dawak di duyang muihni kidika laih muih balna dauwi uiwa pāni yakat dalani wauhwa kat, ma yakat wauhyaklauwi talwakat Abraham dawak yaihnit yakat Lázaro bik yalahna sakkat talna dai. 24Bahang sarahwi aput yulna dai: ‘¡Abraham yang papangki, yang yakat dalani yadakah! Lázaro kidika sihtangkat kaiwi tingni bikis kau was suihwi tuki kidika yakat tahwi sanni yamwang, kat adika kuhni akat uba palni dalani wauhtayang.’ 25Kaunah Abraham yaklau nangnitlana: ‘Yang walakibis, ismang aitah man sangka man dai kidika yakat man dima yayamni kidika dunaman, dawak Lázaro bik dini dudutni balna kidika duna. Waralaih witing laih akat walani ānin lani kidika duwi dawak man laih dalani wauhtaman. 26Kidika minityakat, yangna dawak manna bangmana kidika walsah yakat wakarhni tuhni nuhni as sakki; kaput bahang akaupak muih bayaknin dukih diawa kidika laih, sip bayayakwas ki, kidika kaupak bik sip akat bayayakwas ki.’
27‘Di duyang muihni kidika yaklau kalyulna: ‘Bahang yang papangki Abraham, kalma dinityakat buktik mayultayang, Lázaro kidika papangki ūni yakat sihtanang kat kiwang, 28wirahki ahal balna singka dutayang yakat, witing yaklau yul diyulwang dawak kaput laih witingna bik adika pāni dalani akat aiwas atninna.’ 29Abraham yaklau kalyulna: ‘Witingna laih Moses dawak prapit balna yaklau uhulna wauhnitaya kidika uman duduwi: ¡Kidika yakat dakakawang!’ 30Di duyang muihni kidika yaklau nangnitlana: ‘Yang papangki Abraham kidika manah aitani awaski; kaunah muih dauna as watwi yaklauwi witingna muhnina yakat kalahwarang laihtakat, witingna kulninna wirlalawarang ki.’ 31Kaunah Abraham yaklau kalyulna: ‘Witingna Moses yakat dawak prapit balna yakat bik yulnina dakaninna dukih diawas kat, muih dauna as watwi yaklauwarang karang bik yulni dakakawas karangki.’ ”
Currently Selected:
Luk 16: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
