Luk 17
17
Dutni yakat buknin yamadangni kidika
(Mt 18:6-7,21-22; Mk 9:42)
1Jisas yaklau disainipil balna yakat diyulna: “Di dutni kidika laih ban kaput kaiwarang; kaunah ¡alakaih angdika muihni yaklau muih ūk balna yakat diyamwakat dutni yayamwarang kidika laih! 2Baisa yamni karangki dinimak yakat kipala kau sitwi kuma yakat ruhm'ahawarang kat, adika dibinina yakat diyamwakat dutni yayamwarang kidika karak dawakat. 3¡Manna amung talnauh!
“Man wirahma kidika dutni yamwa kat, biltah; kaunah di yamwa balna kidika wirlawarang kat, dutni datang diswang.#Mt 18:15. 4Ma as pasyakat wat tiaskaubu man namangkauh dutni yamwi dawi kaiwi wat tiaskaubu aput mayulwarang kat: ‘Wattik kaput yamtas awaki’, man lawa dutni datang disnin karangki.”
Rahm kulnin lani parasni kidika
5Apostel balna yaklau Dawan yakat kalyuyulna:
—Rahm kulnin lani kidika baisa mayatah.
6Dawan yaklau nangnitnalana:
—Manna rahm kulnin lani kidika dutamana kat laih, mustat minik kaput dai karang bik, adika panan yakat kalyulnamna sipdai: ‘Akaupak dutta alahwa kuma yakat yawa kaldahtah’, dawak yulmana dakawarang ki.
Muih di yamyang witing di yamnin dini kidika
7“Manna kaupak as di yamyang muihni as dutamana kat di dahnin pāni kaupak sau tukwi kidik awaskat tinglau balna maintalwa sakkauna nawatwi kaiwakat, ¿ais aput kalyultamahn: ‘Ū pasyakat āwa di kastah’? 8Dikah, kaunah aput kalyultaman: ‘Masan kasnin dini kidika ridi yamta yatah, dawak diki balna kidika yamta awah yang laih di kastik dawak ditayang kat. Usnit kat man di kasma dawak bik dima.’ 9Dawak dima yamyang yakat kalyultang kat dima yamwi mana kidika yulni bik tingkih kalyultasman. 10Kaput bik manna, Papang yaklau yamnin manayulna kidika bitik yamta datanama usnit kat, aput yultanama: ‘Yangna laih di yamyang dudutni yangna, kat yangna yamnikna dini dai kidika laih bitik yamnayangna bahang.’
Jisas yaklau pilau muihni balnasalap yakat yamni diyamna kidika
11Jisas laih Jerusalén yakat kiwi Samaria dawak Galilea sauni munah bayakna dai. 12Dawak tawan bin as yakat kiwi kawakat, pilau duyang ahalni balna salap witing niningkauh aiwi naikau wawatna dai 13aput sarahwinah:
—¡Jisas, Maestro, yangna yakat miknakun yanatalah!
14Jisas yaklau ditalwi aput diyulna:
—Sumalyang balna muhnina yakat yawanauh.#Lv 14:1-32.
Dawak uiwabang kat sikninanis kidika kaupak yamni diyamna dai. 15Witingna kaupak as kaltalwakat sikninis kaupak yamni kalyamna kat, sarahwi Papang yakat ayangni nuhni yamwīnah nawatwi kaina dai, 16dawak Jisas muhnit yakat limbabahwi sau kat abukwi tingkih kalana dai. Adika alni laih Samaria kaupakdai. 17Jisas laih aput yulna:
—¿Ais witingna muih salap awasdaih sikninanis kaupak yamni diyamna kidika? ¿Ūk balna tiaskau arungka kidika laih angkat bangyah? 18¿Adika pa ūk muihni adika manah kulnin wirlanayah Papang yakat ayangni nuhni yamna atnin?
19Dawak muih al yakat aput kalyulna:
—Lawah dawak yawah; rahm kulnin lani dutaman kidika yulni yamni mayamna.
Papang king kāwa sauniamput kaiwarang kidika
(Mt 24:23-28,36-41)
20Fariseo muihni balna yaklau Jisas yakat kalyulwi dakakana dai mampat Papang king kāwa sauni kaiwarang kidika, dawak witing yaklau nangnitnalana:
—Papang king kāwa sauni kaiwarang kidika laih muih balna bitik talninna dini awaski. 21Sip aput yulwas karangki: ‘Akat sakki’, kidik awaskat ‘Yakat sakki’; kat Papang king kāwa sauni kidika laih manna pasmangna yakat#17.21 Manna pasmangna yakat: wirlana ūk yakat laih aput yulwi: manna pasyakat. uman sakki.
22Dawak disainipil balna yakat diyulna:
—Muih Walanibis al mani kidika talkih mananin mani kiwi kawarangki, kaunah talas awanama ki. 23Muih buas kidika balna laih aput yuyulwarang: ‘Akat sakki’, kidik awaskat ‘Yakat sakki’; kaunah manna uiwinih dawak bik usnitna uhuiwinih. 24Kat alwana lapwakat kisang sutni kaupak sutni nakas kat yaringni kidika, muih Walanibis al kidika laih kapat karangki nawatwi kainin mani yakat. 25Kaunah tatuna laih wauhnin mahni palni wauhnin karangki dawak adika mani muihni balna yaklau dutni bik kaltalninna karangki. 26Noa#Gn 6:5-8. mani balna yakat bayakna kapat, sihm kapat bayakwarangki muih Walanibis al kaiwarang mani balna kidika. 27Muih balna kidika laih di kakaswadai, didiwadai dawak bik marid kalalahwadai, Noa kuring yakat kana mani kat kidika, dawak was nuhni āwakat bitik dadauna dai.#Gn 7:6-24. 28Lot#Gn 18:20—19:25. mani balna yakat bik kapat kalahna dai: muih balna kidika laih di kakaswadai, didiwadai, di bakakanwadai, wauhwi bakakanwadai, di dadahwadai dawak bik ū papakwadai; 29kaunah Sodoma tawanni nuhni kaupak Lot kalahwi kiuna mani kat, kisang kaupak kuhpau dawak sulhpa karak uhwakat muih balna bitik dadauna dai. 30Kapat karangki muih Walanibis al kidika kalahwarang mani kat.
31“Kidika mani, angdika muihni ū tuna yakat sakkarang kidika, dawak ū pasyakat dini balna bangkarang kat, yaklakwi yaknin awaski; dawak angdika muihni di dahnin pāni yakat sakkarang kidika laih, ūni yakat nawatwi kiunin awaski.#Mt 24:17-18; Mk 13:15-16. 32Lot yalni dai kidika yakat ismangnakattanauh.#Gn 19:26. 33Angdika muihni sangnika laihtik yakkuh tarang kidika laih diswarang ki; kaunah angdika muihni diswarang kidika laih, laihwi yakwarangki.#Mt 10:39; 16:25; Mk 8:35; Lc 9:24; Jn 12:25.
34“Manayultayang kidika puknita payahnin pāni yakat muih bu bangkat as kidika laih duwi kiuna karangki dawak ūk kidika laih dana karangki. 35Muih yayal bu libitni kiwatak tikwarau kat, as kidika laih duwi kiuna karangki dawak ūk kidika laih dana karang ki.#17.35 Ting ulna balna as as yakat laih aput minitlalakwi S.d. 36: Di dahnin pani yakat muih ahal bu raukarang: as kidika laih duwi kiuna karang dawak ūk kidika laih dana karang.
37Bahang kalyulwi dakakana:
—¿Dawan kidika dini angkat kalahwarangyah?
Dawak witing yaklau nangnitnalana:
—Muih dauna muihninuh angkat tuskarang kidika, kidika yakat upam balna kidika kalududuhwarang ki.
Currently Selected:
Luk 17: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
