Lukas 10
10
Yesus nen ap inebe 70 inayoko 'biluk la'isasikhe wene
1Itithogon yogeisasikhesik, ninoe Etagapogot nen ap inebe 70 baga witaberogo 'bisalok nen, at ekaerek yi ai ti ai o ukul tomok lagaluk akla apasikhe oba dopok, it iti tak alebageik inebe peretek dopokhigik la'isasikhe. 2Itithogon la'isekhe dogolik, men yogeisasikhe,
“Eken ugu ebe doalegat arat horle agasik werek mekeat he, akhuni eken ebe palusak meke inebe pererlagat o. Iti nen he, ap ayabu Iteerek meke etnaga nen, akhuni eken palusak meke aperek la'isoak nen, at ayoko 'bekhe dogono o,” iluk yogeisasikhe. 3Itithogon yogeisasikhesik nen,
“Hit lani o. An nen hit hinobabut domba obabut hakene meke it akhuni inobabut yeke helo yeke obabut weak meke hakene meke inakerlekla hiakhogon la'inagekhe lagei o. 4Nen, hit he, uang su akla ukharlek meke inom, yi meke ti meke wokhisugunem su ukharlogo wolok lausak meke inom, sepatu ageikhe su ukharlogo inom, ageikhe motok wolok lagup o. Nen, holagarlem laga dogolik, akhuni aperek hinane abirogon heagei warinabik lagup o. 5Nen, akhuni inaila ukiluk dogolik,
Hinebe yoma Allah nen hanothinabuak o, iluk heagei warinabiluk ukino. 6Heagei warinabiluk ukumo, inobabut hanorinabusak meke werekma ukegep halok he, Allah nen hanorinabiginat o. Itithogon meke re, it aperek inobabut itithogon dek halok he, heagei warinakhep meke hinane ukut apuke waganhe dogono. 7It akhuni hit wokhinabusak meke werekma ukegep halok he, etomaat hinom dogono. Dogolik, it akhuni yabu waganhunem iniki oko yi meke ti meke wogeisegaregat o, iluk, it nen yi meke ti meke noagaluk wokhisekho halok, itiat neke dogono. O ya hotnokhogon lageik, ta hotnokhogon lageik, nekhe dogogup o. 8O ukul ageikhe ukisinem, heagei warogo wokhinabugun obaat, it nen hipiri wokhisagun meke itiat neke dogono. 9O ukul etoma dogolik, it aperek inoba u warek halok, hit nen hano hagarinakhe dogolik,
Allah nen apma 'binanigin etnogo yogotak arat 'binanigin o, iluk yogeisekhe dogono. 10Meke re, o ukul ageikhe hit ukugun oba etoma nen heagei warogo wokhinakho dek halok, hinebe dukhitluk holagarlem asi lalok nen, men ino,
11Nit hit hinaila dogolik agat abubuleke ninisok oba dekelogo meke yi, hit weak iluk hiniloba horogo podisogo yi. Hinakla nen,
Allah apma 'binanigin etnogo yogotak arat 'binanigin, iluk, hanorogon hutdekhe dogono, iluk yogeisano. 12Yabokane o ilugun hurli baga, it akhuni o Sodom meke etoma Allah nen ukum inoba 'biluk weagarinabigin mekeat he, alhe negenat o. Mekeat he, it akhuni o ukul hit wokhinakhidek thogotdinagagin meke iti, Allah nen ukum akin meke inoba 'biluk motok weagarinabigin o, iluk yokhisekhe lagei o,” iluk yogeisasikhe.
Yesus nen akhuni wenageisasikhe wene
(Matius 11:20-24)
13Itithogon yogeisasikhesik yabokane akhuni tha'bokhogonat men yogeisasikhe,
“Hit akhuni o Khorasim meke men, o Betsaida meke men, akhuni nen hagasusak dek meke an nen elalinat, hit ninom dogolik hagakhe lagei etnogo, o Tirus Sidon etoma hagakhe dogolema re, it akhuni o etoma meke inobabut hebelatluk nen, hean 'biluk hagakharek hak, inasu pelabi ikhigik, 'bisi yugulharek hakene wul dabulhik, hagakhe dogolik nen, weak hagakhe lagoukha meke iti here'isalok, inobabut haganeat hebelatlep mekeat he, hit itithogon hagasusak hina'it iti nen, eiye, weagathinabigin o! 14Yabokane o ilugun hurli baga Allah nen ukum inoba 'bigik, kokhik, hagasigin itinem, it akhuni o Tirus Sidon etoma meke ukum inoba 'biluk alhe negen inasigin mekeat, hit anek motok akinhogo negen hinasiginat o. 15Nen, hit akhuni o Kapernaum meke yi hinakla nen,
Allah nen pogot oba lia'inaniluk kogotninabigin, iluk hinekaerek hogorakeke lagap a? Motok dek o. Akhuni watlatluk lageikharekma etoma motok usa'inagagin o,” iluk yogeisasikhe. 16Itithogon yogeisalok nen, at agarumi ane waganhe lagoukha meke emenogo men yogeisasikhe,
“It akhuni nen hit hinane holiogei halok he, an naneat holiogei o. Nen,
Nina'it, iluk here'inagega halok he, anat here'anha o. Nen, an here'anha halok he, an la'ani ageikhe meke etnogo ebeat here'isega o,” iluk itithogon yogeisalok nen, la'isasikhe.
It ap inebe 70 emenogo inapuke wagoukha wene
17Yabokane it ap inebe 70 la'isasikhe meke emenogo inakla arleken akhalok, inapuke wagoukhasik, men isukha,
“Ninoe! Nit nen mokat obabut weak meke iti,hat hetaga palogo yogokhunem ninane inasuk holhe lagaikha o,” iluk yogokhukhama 18at Yesus nen, men yogeisasikhe,
“Iblis iti o yabok yibarlogo la'i agarek hak, pogot oba nen usagunem nileken hasigi o. 19Halok he, lakhani! Pelal anini weak meke men, warlo aik palinakharek meke men, hinisok nen al debelogo 'bisigik, Iblis ninom wim palek meke etnogo obatne degetdisigik, hagakhe dogobageik iluk, an nobatne wokhisigirik iteerek hagathinakhi o. Iteerek hagathinakhirikmo yi meke ti meke aperek nen weagathinabigin motok dek o. 20Itithogon meke re, it mokat inobabut weak meke nen hit hinane holharek iti baga, hinakla arleken akhugup o. At he, hinetaga pogot oba holal waganek werek iti hasik anek, hinakla arleken akhekhe dogoni o,” iluk yogeisasikhe.
At Yesus akla arleken akhekhe dogolik Allah heagei wakhikhe wene
(Matius 11:25-27, 13:16-17)
21Itithogon yogeisasikhesik itinemat, Allah Agoreke Yesus akla werekma nogo nen, akla arleken akhekhe dogolik, opase Allah men yogokhikhe,
“Allah nopase. Pogot agat iteerek harat o. Wene tha'bokhogonat iti, it akhuni inakla kagalek meke men, yi wene ti wene inilu meke men, inilu asunogo iluk lima'iluk nen, it inobabut yekerugi ket itago meke hakene anek, pakhogon yogeisegen iti, hat hakla warlok apegen mekeat yogeisegen iti nen heagei wathakhe lagei, nopase!” iluk yogokhikhe. 22Itithogon yogokhikhesik, it akhuni emenogo men yogeisasikhe,
“An nopase nen yi meke ti meke tha'bokhogonat an ite dogoagaluk woknikhikhe. Allah a'but iti tha iluk akhuni tha'bokhogonat inokodek mekeat, an nopase arligat anek ilu welagarek. Iti hak, an nopase Allah iti tha, iluk akhuni tha'bokhogonat inokodek mekeat, at a'but an narligat anek nilu welagarek o. Nen, Allah a'but an nenat nakla apalok nen, nopase ebe akhuni aperek inilu asuagaluk nane pakhogon yogeisagein meke itiat inilu ageikharek o,” iluk yogeisasikhe. 23Itithogon yogeisasikhesik agarumi ane waganhe lagoukha meke emenogo inasokneat tekhogon wogosik lalok at elokhe hebenokhogon wogeisasikhesik nen, men yogeisasikhe,
“Hit hinileken hausak mekeat arat hekhe lagap meke yi, hinakla arleken akhekhe dogoni. 24It ap Allah ane yogeisekhe lagoukha meke inom, koktek inetagapogot meke inom, inebe doalegat hit hinileken hekhe lagap meke iti,
Ninileken helo e, inakla apekhe lagoukha mekeat he, inileken higidek welagoukha. Nen, wene hinasuk holhe lagap meke iti,
Ninasuk holilo e, iluk, inakla apekhe lagoukha mekeat, inasuk holhidek welagoukha,” iluk yogeisasikhe.
Ap Samaria meke obabut hano iluk oba lisogon yogeisasikhe wene
25Wene itithogon yogeisekhe lageikhemo nen, yabokane ap Allah ane holal waganek yakulisekhe lageikhe meke ageikhe Yesus obabut paligiluk oba wageikhesik, men yogokhikhe,
“Noe. An niluk motok dogeik nen, nobabut nikithogon hagakhe dogeik,” iluk yogokhikhemo, 26at Yesus nen, men yogokhikhe,
“Wene Allah nen ninasuk wakhikhe wene etnogo holal nikithogon waganek werekma etaga thalhe lagan,” iluk yogokhikhemo 27#Imamat 19:18; Ulangan 6:5 ap etnogo nen he, men yogokhikhe,
“At Musa nen,
Hinetaiken men, hinobabut men, hinobatne men, hinakla men, opakiat atluk,
ninopase Allah Etagapogot ebe itiat hinetaiken hunik dogono o.
Nen, ageikhe,
Hit hinekaerek hinebe hinetaiken hunik welagathep iti hagat,
it akhuni aperek hinom welagathep meke iti hinetaiken hunik dogono o,
iluk isikhemo holal waganek werek,” iluk yogokhikhe. 28Itithogon yogokhikhemo, at Yesus nen, men yogokhikhe,
“Iti wene morat egen o. Hat hobabut wene egen iti mothogon hagakhe dogogin halok he, hiluk motok dogogin o,” iluk yogokhikhemo, 29at ap etnogo akla nen,
“Yesus nen,
Ap iti hano hagakherek meke, iluk apoak,” iluk men yogokhikhe,
“Akhuni ninom welagorek meke netaiken hunik dogosak iti, inebe thani?” iluk itithogon yogokhikhemo, 30at Yesus nen, men yogokhikhe,
“Ap ageikhe o Yerusalem nen o Yeriko usasikhe. Holagarlem usasinem, ap iniki abusak waganik nekharek meke nen, ap etnogo ha'iluk, tugi motok tamuk-hamukhogon watlasusak negen warogo etomaat podisalok, ameke yi meke ti meke emenogo horlalok lagoukha. 31Horlalok lagoukhasikmo nen, ap ageikhe Allah iteerek meke ageikhe holak itike usagaluk usasikhe hak, ap etnogo warek werekma ileken hasikhe mekeat, ebe thogotdiluk holak oalogo piokthegat usasikhe. 32At usasikhe tak-tagat, ap ukul etaga Lewi meke ageikhe holak itike usa'aga dogolik, ap etnogo warek werekma ileken hasikhe meke re, ebe thogotdiluk holak oalogo piokthegat usasikhe. 33It itithogon hagakhukha mekeat he, ap o Samaria meke ageikhe holak itike usagaluk usasikhe hak, ap warek etnogo werekma ileken halok akmu ageikhe. 34Akmu ageikhesik, ebe horokhogon alilu lageikhesik nen, oado li'bik-la'bakhogon wakhukha meke emenogo o anggur eken apusu inom, minyak apusu ageikhe inom, agalumo obake watdiluk, erereka yilogo, at akeledai apot oba yasukhogo lia'iluk nen, o akhuni oko palogo noge egarekma 'bi lageikhesik nen, therogo noge isikhe. 35Therogo noge iluk, hubenke ap etnogo nen, ap o iti iteerek meke uang perak meke pere wogokhe dogolik, men yogokhikhe,
Ap yi therogo dogono. Therogo dogolik, hat meke yi meke ti meke wogokhe dogogin meke, oko wokhikhi yi dek aga halok, an yabokane witluk nen oko wokhesigin o, iluk yogokhikhe,” iluk, Yesus nen ap Allah ane holal waganek iteerek meke etnogo yogokhikhe. 36Itithogon yogokhikhesik nen, wene ageikhe men yogokhikhe,
“It ap iniki abusak waganharek meke nen ap wakhukha meke iti, Allah nen,
Akhuni hinom welagathep meke hinakmurogon dogosak, iluk isikhe etnogo tak-tak, ap inebe henagan iti, tha hak nen akmurakhikhe apegen,” iluk itithogon isikhemo, 37at ap etnogo nen, men isikhe,
“Ap iti warek werekma ap ageikhe wageikhesik akmu nen yomakhasikhe itiat o,” iluk yogokhikhemo, at Yesus nen men yogokhikhe,
“Halok he, hat itithogon hagarik lan o,” iluk yogokhikhe.
Yesus nen Maria Marta ipisak yogeisasikhe wene
38Itithogon yogotluk nen, yabokane at Yesus agarumi ane waganhe lagoukha meke emenogo inom lagoukhasik, o ukul ageikhe ukisukha. O etoma he ageikhe etaga Marta welageikhe. At nen,
“Yesus an naila ukisuak,” iluk ayoko 'bisikhesik waganhikhe. 39At Yesus, he Marta iti agot etaga Maria ipisak werekma ukisikhemo, he Maria etnogo Yesus apma dogolik ane asuk holek welageikhe. 40Meke re, at Marta nen,
“Ap huso wagasikmo,” iluk arini thet weak isakhik, werakhik, hagakhe lageikhesik wageikhesik nen, Yesus yogokhe dogolik, men yogokhikhe,
“Noe. An narligat yabu hagakhe dogoagaluk, an nagot yi yomakniigidek thogotdanhe yi hano apegen a? Yomakneasuak nen, yogosin o,” iluk yogokhikhemo, 41at Yesus nen, men yogokhikhe,
“Marta, Marta. Hat nen, yi meke ti meke hasik helabut hisogo thet weak hagakhe lagan higi. 42Meke re, wene opakiat meke anek hagasusak werek korlegat, hat nen yi meke ti meke hagakhe lagan. Hagot Maria yi, wene opakiat hano meke itiat wenago 'bakhekhesikmo, it akhuni aperek nen ikimo tilogo waganusak dek meke 'bakhekhesik werek o,” iluk yogokhikhe.
Currently Selected:
Lukas 10: LAIDNT
Highlight
Share
Copy
Want to have your highlights saved across all your devices? Sign up or sign in
