Lukas 9

Yesus nen agarumi inebe 12 emenogo inasuk warogo la'isasikhe wene

(Matius 10:5-15; Markus 6:7-13)

1Itithogon yogeisalok, at Yesus nen agarumi ane waganhe lagoukha meke inebe 12 emenogo natogosisuagaluk waisasikhemo wagoukhama, it nen yi mokat ti mokat inobabut weak meke akhuni inakla ukiluk werekma mukhogo ula'isigik, yi u ti u inoba werek halok hagarinakhik, hagarik loagaluk obatne wogeisasikhesik iteerek hagarinakhikhe. 2Itithogon hagarinakhikhesik, it nen Allah apma 'bisagein wene etnogo yogeisigik, u warek meke hano hagarinakhik, hagarinabik loagaluk la'isasikhe. 3La'isekhe dogolik, men yogeisasikhe,

“Hit he, yi meke ti meke holak lausak meke ageikhe motok wolok lagup o. Hinathegerluk men, hinasu yi meke ti meke wokhisugunem ukhasugun meke men, hipiri men, uang men, hinasu ikhasak meke peretek men, ageikhe motok wolok lagup o. 4Nen, hit o ageikhe lagunem, hanorogo wokhinakho halok he, etomaat dogoluk, o ninmo luogoluk halok, etoma nenat dukhitluk lano. 5Nen, it akhuni o ageikhe nen hinebe wokhinakhidek halok he, o ukul iti here'isalok dukhi aga dogolik, it o etoma meke inakla hutduagaluk hinisok hola negen horogo 'biluk dukhitno o,” iluk, inasuk warogo la'isasikhemo, 6it agarumi emenogo lagoukha. Laga dogolik nen, o etoma o ukul dopok hano wene etnogo yogeisigik, o ya ta u hano hagarinakhik, hagarik lagoukha.

Ap kok Herodes obakha palageikhe wene

(Matius 14:1-12; Markus 6:14-29)

7Itithogon hagarik nekhe lagoukhama, ap Herodes o Galilea eloke kok etagapogot welageikhe meke iti, wene iti tha'bokhogonat asuk holhikhe. It akhuni aperek nen,

“Yohanes wakhama watlaga etnogo iluk agasik werek iti,” iluk ekhe lagoukha. 8Nen, it aperek nen,

“Ap Elia etnogo winam agama o,” igik, it aperek nen,

“It ap haganeat Allah ane yogeisekhe lagoukha meke emenogo ageikhe iluk agama o,” igik, ekhe lagoukhama re, ap kok Herodes etnogo obakha palageikhe. 9Obakha palageikhesik dogolik, men isikhe,

“Yohanes etnogo, an nenat arlokop ade tekhogo wakhi mekeat he, at ageikhe nen itithogon hagariogo iluk, abok nasuk holhi iti, tha nen hagariogo?” iluk, Yesus ebe ileken hagaluk walhekhe lageikhe.

Yesus nen akhuni inebe 5.000 nen hipiri tituherle wogeisasikhe wene

(Matius 14:13-21; Markus 6:30-44; Yohanes 6:1-14)

10It ap Yesus nen inayoko 'biluk la'isasikhe meke emenogo lagoukhasik inapuke wagoukhasik, hagarik nekhe lagoukha meke emenogo pilin-palinhogo Yesus yogosi agoukha. Itithogon yogosi agoukhama re, at nen it wogosik inasokneat tekhogon o ukul etaga Betsaida etoma lageikhe. 11Etoma inasokneat tekhogon lagoukha mekeat he, akhuni nen,

“At Yesus etnogo o etoma laga o,” iluk isinem, akhuni doalegat inasuk holhukhasik nen, inebe doalegat oporlik lagoukha. Lagoukhama, at Yesus nen heagei warogo woginakhikhesik, Allah apma 'bisekherek wene etnogo yogeisigik, inebe u warek meke hano hagarinakhik, hagakhikhe. 12Itithogon hagarinakhe korlek, o mo arat hiam ageikhemo nen, at agarumi inebe 12 emenogo oba wagoukhasik, men yogokhukha,

“Nit yoma limo akhuni inaren dekma welago yi, akhuni yoma inapiri nikik, noge igik, hagasuak nen, o yoma aliluke o ukul kok meke inom, 'bugurlagat mene inom, la'isan o,” iluk yogokhukha. 13Itithogon yogokhukhama, at Yesus nen, men yogeisasikhe,

“Inapiri nausak meke, hit nenat melageisani o,” iluk yogeisasikhe. Itithogon yogeisasikhemo, it nen, men yogokhukha.

“Nit nen, hipiri roti meke 5, nen, ikan pere anek werek yoma, nit nen akhuni yoma inobasik ageikhe oko palisa loagaluk ekhe lagan a?” iluk yogokhukha iti, 14akhuni inebe ap anek, 5.000 hakene werekma isukha. Itithogon yogokhukhama, at Yesus nen agarumi emenogo yogeisekhe dogolik,

“It ethoma inebe 50 amun waganogo hureklarik loak nen yogeisani o,” iluk yogeisasikhe. 15Itithogon yogeisasikhemo, at nen isikhe hagat,

“Hureklatni,” iluk yogeisasukhama, inebe tha'bokhogonat hureklarik lagoukha. 16Arat hureklarik lagoukhama nen, at Yesus nen hipiri roti meke 5 eranogo men, ikan pere eranogo men, ikimo waganhikhesik nen, ileken pogot oba liakhalok, Allah heagei warogo roti inom, ikan inom, eranogo kusogo, at agarumi emenogo nen akhuni doalegat emenogo supurisoagaluk wogeisasikhe. 17Arat supurisasukhama inebe tha'bokhogonat hipiri ina'ithogon nasukhama titu ageikhe meke mul yago 12 oba ukharlogo 'bisukha.

Petrus nen, “Hat hebe Kristus at o,” iluk pakhogon Yesus yogokhikhe wene

(Matius 16:13-19; Markus 8:27-29)

18Iniki ageikhe baga, Yesus arligat sembayan isinem, at agarumi ane waganhe lagoukha meke emenogo oba wagoukha. Wagoukhama, at nen hinok inoba waganhe dogolik, men yogeisasikhe,

“Akhuni doalegat nen an nebe hasik nabok ekhe dogolik tha iliogei nogo,” iluk yogeisasikhemo, it nen, men yogokhukha,

19“It aperek nen,

Yohanes ima usa'isekhe lageikhe meke etnogo igik, it aperek nen,

Elia at o, igik, it aperek nen,

It ap haganeat Allah ane yogeisekhe lagoukha meke emenogo meke ageikhe iluk agasik werek o, igik, iliogei o,” iluk yogokhukha. 20Itithogon yogokhukhama, at Yesus nen, men yogeisasikhe,

“It nen itithogon iliogei meke re, hit yi anek, an nebe hasik tha ekhe lagap nogo,” iluk yogeisasikhemo at Petrus nen, men yogokhikhe,

“Hat hebe Kristus, nit tilninabuagaluk Allah nen la'isigin iluk abok yoknisasikhe etnogoat o,” iluk yogokhikhemo, 21at Yesus nen, it agarumi emenogo tha'bokhogonat men yogeisasikhe,

“An nebe hasik ekhe iti, akhuni motok yogosugup o,” iluk inasuk wakhikhe.

At Yesus nen, “Yi ukum ti ukum noba 'biluk nasugun o,” iluk alebageik yogeisasikhe wene

(Matius 16:21-28; Markus 8:31–9:1)

22Inasuk itithogon wakhikhesik nen,

“An abat itaklasi agagi etnogo, it ap inarluetek inom, it ap Allah iteerek meke inougi koktek inom, it ap Allah ane holal waganek iteerek meke inom, an nebe ina'it atluk, yi aik ti aik doalegat hagatnabiluk, nebe nasugun o. Nasumo nen, nebe niki pere warek dogoluk nen, niki ageikhe baga yi Allah nen nilugutnabigin o,” iluk yogeisasikhe. 23Itithogon yogeisasikhesik, wene ageikhe it akhuni tha'bokhogonat men yogeisasikhe,

“Tha nen an noporlik nekhe dogeigiluk halok, ekaerek hasik etaiken hunik dogolik hagakherek meke,

Na'it, iluk here'isalok nen, o baga meldiluk inakharek meke iti, inago mekeat hibiku-yogoku wolok, an noporlik nekhe dogeigiluk wisuak o. 24Nen, tha nen,

An nebe niluk dogosak warlok, iluk, ebe irlirli horlagein halok he, watlatluk nuk akhagein o. Meke re, an nobasik watlasigin halok he, ebe tiligin o. 25Nen, tha nen, yi meke ti meke agat oba meke tha'bokhogonat ite asigin mekeat, ekaerek ebe hasik weak akhalok nuk asigin halok he, ageikhe thabusogo hano horlekhe usak a? Motok dek o. 26At tha nen,

An Yesus agot, igik, an nane iti yogeisigik, akhuni inil oba pakhogon u ekarli halok he, an abat itaklasi agagi meke yi nen meneke, yabokane an nebe hogotnakhik, nopase hogorakhik, malaikat Allah ekaerek hasik yoko la'isa agarek meke emenogo hogorinakhik, hagakhe korlek waga dogolik nen,

At yi an nagot, iluk nane pakhogonat u nekarliat asigin o. 27Nen, hit metek welagap yoma meke aperek he, watlageidek dogolik, Allah apma 'bisagein meke etnogo 'bisinem hinileken hugun o, iluk eberogonat yokhisigi o,” iluk yogeisasikhe.

Yesus tom oba dageisikhesik werekma elokhoken ninat hagatlageikhe wene

(Matius 17:1-8; Markus 9:2-8)

28At Yesus nen wene iti arat yogeisasikhesik nen, noge iniki 8 negen iluk nen, Petrus men, Yohanes men, Yakobus men, wogosik sembayan igiluk tom oba dageisikhe. 29Dageisikhesik sembayan isinem, at Yesus elokhoken ninat hagatlaga dogolik asu elokhoken kut motok atluk nen, a'bi'baleak hagatlageikhe. 30Itithogon hagatlaga korlek, eranogoat ap inebe pere, Musa men, Elia men, Yesus inom wenekak isinem 31inebe hogorinabusak hakene winam agoukhasik werekma, inileken hisasukha. Nen, wenekak isukha iti, at Yesus iki welageidegat Allah nen isikhe tak-tagat, o Yerusalem watlagisin wene ekhe lagoukha. 32Itithogon isi korlek, at Petrus agarlak lak emenogo inom noge inil ageikhemo noge isukhasik nenat, iniluk agoukhasik Yesus ebe a'bi'bal weak yibathasinem, ap inebe pere eranogo Yesus inom metek werekma inileken hisasukha. 33Itithogon hisasukhama, ap inebe pere emenogo Yesus etoma thogotdiluk luogoluk hagakhunem, Petrus nen Yesus yogokhe dogolik, men yogokhikhe,

“Noe! Nit o yoma hano welago higi. Halok he, nit nen yoma orlisa henagan, hat hobasik ageikhe, Musa obasik ageikhe, Elia obasik ageikhe halhisagein o,” iluk itithogon isikhe iti, wene nikithogon meke ekhe lagei iluk, hutdigidegat yogokhikhe iti. 34Itithogon isi korlek eranogoat, oisa motok doalegat thebelinabi ageikhemo, inebe oisa akla dogolik inayuk weak agoukha. 35Itithogon inayuk weak agoukhama oisa etnogo akla nen Allah ane men yogeisasikhe,

“An na'but wenago meldisigi meke ebe ithiat o. Halok he, at ane holhe dogono,” iluk yogeisasikhe. 36Itithogon yogeisasikhe iti, ane 'bogokhogon, inileken 'bikhasukha meke re, at Yesus arligat werekma hasukha. Itithogon hagatlageikhemo inileken hasukhasik nen, wene hagatlageikhe meke iti, itinem akhuni aperek yogeisigidek inaklaat welagoukha.

Mokat obabut weak meke yekerek ageikhe akla ukisikhesikmo, Yesus nen mukhogo ula'isikhe wene

(Matius 17:14-18; Markus 9:14-27)

37Hubenke, Yesus agarumi inom tom oba nen usa'agunem, akhuni motok doalegat Yesus oba wagoukha. 38Wagoukhasik, ap ageikhe it inakerleklake nen, ane kokhogon Yesus men yogokhikhe,

“Noe! An na'but opakiat itago meke yinaga hileken 'bikhanogoluk hayoko wagei o. 39At iti mokat obabut weak meke akla ukekherethek nen, iki isok dik-dik hagakhe dogolik, apemake wosirlagap palek-dapalek hagakhik, naik ilik ilik agat oba tunhogo usa'igik, hagakhe dogolik, yekerek iti akla nen mokat obabut weak meke iti horla dukhu'bugat dogolik ebe weagatdiliogo. 40Itithogon hagakherek iti nen, hat hagarumi hane waganiogei meke nen mukhogo ula'uagaluk yogeisigi mekeat, it nen itithogon hagasusak erlok dek hagatlaga,” iluk yogokhikhe. 41Itithogon yogokhikhemo, at Yesus nen it akhuni doalegat emenogo men yogeisasikhe,

“Ap yirani! Hit akhuni o yogotak welagap meke yi, hinetaiken noba hakotdigidek dogolik, nuk akhekhe lagap yoma re! Nakla pugurakhe lagap yoma niki meren oba nobakhanini hapugutdiluk ninom dogogun nogo!” iluk yogeisalok nen, ap etnogo men yogokhikhe,

“Ha'but ithi wolok eme o,” iluk yogokhikhe. 42Yogokhikhemo, yekerek etnogo Yesus oba aban wolok waga korlek eranogoat mokat obabut weak meke etnogo nen yekerek etnogo agat oba tunhogo usa'isinem, iki isok dik-dik hagakhikhe. Itithogon hagakhikhemo, at Yesus nen mokat obabut weak meke etnogo wenageikhikhesik, yekerek etnogo hano hagarogo opase wogokhikhe. 43Itithogon wogokhikhemo akhuni emenogo tha'bokhogonat inileken hasukhasik nen,

“Allah obatneak iti nayuk e,” iluk hogorakhukha.

At Yesus nen, “An nasugunat o,” iluk alebageik yogeisasikhesik nen, yabokane dagakhogo yogeisasikhe wene

(Matius 17:22-23; Markus 9:30-32)

It akhuni emenogo tha'bokhogonat, at Yesus nen yi hagakhik, ti hagakhik, hagakhe lageikhe meke emenogo hasik,

“Eiye!” iluk, hogorakhe korlek, at nen at agarumi ane waganhe lagoukha meke emenogo men yogeisasikhe,

44“An wene yokhisagein yi hanorogon hutdekhe dogoni o. An abat itaklasi agagi etnogo ap nen yoko lalok it aperek nen nasuagaluk iniki baga 'banugun o,” iluk yogeisasikhe meke re, 45wene limago meke pakhogon yogeisigidek oba lisogon negen yogeisasikhemo, at agarumi meke emenogo hutdigidek dogolik, men isukha,

“Wene iti nikithogon meke hasik yoknisegen,” iluk hinok waganu inayuk nen, inane igidek huk agoukha.

Yesus agarumi nen, “Kok he, hat nogo? An o,” iluk wene palhe lagoukha wene

(Matius 18:1-5; Markus 9:33-37)

46Itithogon werek korlek, it Yesus agarumi ane waganhe lagoukha meke emenogo nen ekhe dogolik, at ageikhe nen,

“Kok hetagapogot hat nogo? An o,” igik, wene la'igik wa'igik wene palhe lagoukha. 47Inane itithogon palhukhama Yesus nen inakla apasukhasik isukha meke ekagat hutdisikhesik nen, yekerek 'bugurlagat meke ageikhe waganogo alilu 'bi ageikhesik nen, 48it emenogo wene men yogeisasikhe,

“Hit hinakerlekla yoma at etaga dek erlok dek meke itiat ebe kok etagapogot asigin iti nen, tha nen yekerek yi an nobasik waganhe halok he, an nebe woknabigin o. Nen, tha nen an woknakho halok he, at la'ani ageikhe meke etnogoat waganigin o,” iluk yogeisasikhe.

Yesus nen, “Tha nen, hit wenakhisiliogo dek halok he, at ebe hit werekmake mekeat o,” iluk yogeisasikhe wene

(Markus 9:38-40)

49Itithogon yogeisugunem, at Yohanes nen, men isikhe,

“Noe! Ap ageikhe mokat obabut weak meke akhuni inakla ukilukmo hat hetaga palogo mukhogo ula'isugunem ninileken hogosik nen, at iti nit ninom nekhe lago dek meke iti nen,

Hat itithogon hagakhun, iluk wenagakho,” iluk itithogon yogokhikhemo 50at Yesus nen, men yogokhikhe,

“Hit nen itithogon wenagasusak dek o. Tha nen hit wenakhisiliogo dek halok he, at iti hit werekmake mekeat o,” iluk yogeisasikhe.

Akhuni o Samaria meke nen Yesus ebe waganhidek thogotdisukha wene

51Itithogon yogeisasikhesik nen, at Yesus ebe Allah nen pogot oba lia'usak arat horok asi ageikhemo, at akla nenat wene munini la'iluk,

“O Yerusalem usagein o,” iluk holak waganhikhe. 52At aban usigidek dogolik, ap aperek yoko alebageik la'isasikhe. La'isasikhemo it emenogo usasukhasik nen,

“At ebe wisigin iti, at ameke yi meke ti meke karelogo 'buok o,” iluk o Samaria ukul 'bugurlaktek meke ageikhe ukisukha. 53Itithogon ukisukhama at Yesus o Yerusalem lagaluk hagakhunem obabut ekagat palhukhasik nen, akhuni o Samaria meke etoma nen,

“At Yesus ninom dogosak nina'it,” iluk ebe waganhidek thogotdisukha. 54Itithogon thogotdisukhama at agarumi ane waganhe lagoukha meke Yakobus inom, Yohanes inom, inileken hisalok nen, men yogokhukha,

“Ninoe! Hat nen hano apegen halok he, inebe inasuagaluk pogot oba nen hetu usa'isuak nen, kino yogosuok a?” isukha. 55Itithogon isukhama at Yesus elokhe hebenokhogon wogeisalok nen,

“Itithogon hagasusak dek o,” iluk wenageisasikhe. 56Itithogon wenageisalok nen, o nekalokma ageikhe lagoukha.

Ap aperek nen, “Yesus oporlik nekhe dogogun,” iluk yogokhukha wene

(Matius 8:19-22)

57At Yesus agarumi inom holak oba lagunem, at ap ageikhe nen Yesus yogokhe dogolik, men yogokhikhe,

“Noe! Hat komake lagan halok he, an hoporlik motok nekhe dogogin o,” iluk yogokhikhe. 58Itithogon yogokhikhemo, at Yesus nen men yogokhikhe,

“Helo yeke iti, ai halek akolakla welagarek o. Nen, thue hitluk nekharek meke iti, itithogonat ai halek welagaregat. Itithogon meke re, an abat itaklasi agagi meke iti anek he, noge ekhe dogosakma nai halek motok dek o,” iluk yogokhikhe. 59Itithogon yogokhikhesik ap ninat meke ageikhe men yogokhikhe,

“Nipisak nekhe dogouok nen noporlik eme o,” iluk, yogokhikhe mekeat he, ap etnogo nen, men yogokhikhe,

“Eiye, noe! An nopase watlasusakma iti tak agatma thali lak nen, hat nen,

I o. Lan o, iluk yoknetnogoluk yokhikhi o,” iluk yogokhikhe. 60Itithogon yogokhikhemo, at Yesus nen, men yogokhikhe,

“It akhuni warek meke halok, it akhuni inebe warek meke hakene werek iti nenat thalinakhe dogoak nen, hat Allah apma 'bisekherek wene iti, o yi ai ti ai yogeisilik nekhe dogono o,” iluk yogokhikhe. 61Itithogon yogokhikhemo, ap ninat meke ageikhe nen, at Yesus men yogokhikhe,

“Noe! Hat hoporlik nekhe dogogin nakla apigirikmo luok nen, noe nagot tak heagei warinabi lak nen, la'aninok nen iluk yokhikhi o,” iluk yogokhikhemo, 62at Yesus nen, men yogokhikhe,

“It akhuni, inebe tomok wen waganuogoluk wen thege wolok lalok, wen ebe hakhegarethegat he, yabokane inelokhe hebenokhogon inoporlike laklsiriogei halok he, Allah apma 'bisekherekma etoma ukusak motok dek o,” iluk yogokhikhe.

Currently Selected:

Lukas 9: LAIDNT

Highlight

Copy