Lukas 16
16
Ap ageikhe atuaneke nen il damelogo hagakhe lageikhe wene
1Itithogon yogeisasikhesik, yabokane, at Yesus agarumi ane waganhe lagoukha meke emenogo men yogeisasikhe,
“Ap kok ageikhe atuaneke nen oe ameke yi meke ti meke hago werekma nen, it akhuni aperek nen, at oe etnogo yogokhe dogolik,
Hat hatuaneke it nen, hameke emenogo motok yugunat supuk-thapakhogon hagariogo, iluk yogokhukha. 2Itithogon yogokhukhama, at kok etnogo nen atuaneke etnogo waikhikhemo wageikhemo nen, men yogokhikhe,
Hat hagakhe lagan meke nasuk holhi iti, nikithogon hagakhe lagan. Yogotak hat an naila yoma dogolik, an nameke hago dogogin degatma re, hago dogolik hagakhe lagan meke holal waganek meke iti pilinogo yoknetluk nen, woknom o, iluk yogokhikhe. 3Itithogon yogokhikhemo, at atuaneke etnogo akla nen he,
Noe nen,
An naila dogolik nameke hago dogosak dek. Ula'agagin, ekhe iti, an nikithogon hagasigin. Ula'anhe halok, an wen waganhe dogosak iti re, an niki obatne erlok dek. Nen, nape kino weak yogeisilik nekhe dogosak iti, an nekarli. 4Itithogon itikmanke ula'anhe halok he, akhuni nen an it inaila etoma woknabuagaluk, an hagasusak nakla ebekhi o, iluk akla apalok, 5it akhuni, at oe etnogo ameke nomat inoba palek welageikhe meke emenogo inebe tomok waisasikhemo ageikhe alebageik wageikhe meke yogokhe dogolik,
An noe ameke meren nomat hat hoba palek werek nogo, iluk isikhemo, 6at ap etnogo nen,
Minyak goreng apusu isoak kok meke ebe 100 oba henago nomat noba palek werek o, iluk yogokhikhemo at nen men yogokhikhe,
Nomat hoba palek iti hasik he, holal waganek yi waganiluk nen, yabokane holal ket meke ageikhe waganhe dogolik, 50 oba henago meke nomat noba palek werek, iluk holal ibat waganin o, iluk itihtogon yogotluk nen, 7ap ageikhe at oporlik wagunem yogokhe dogolik,
Hat he, nomat merek hoba palek werek, iluk yogokhikhemo at ap etnogo nen, men yogokhikhe,
Gandum eken palek su kok meke ebe 1.000 oba ukharlek meke nomat noba palek werek o, iluk yogokhikhemo at nen,
Nomat hoba palek iti hasik, holal waganek yi waganiluk, yabokane holal ket meke ageikhe waganhe dogolik, 800 oba nomat noba palek werek, iluk holal waganin o, iluk yogokhikhe. 8Itithogon hagakhikhe meke iti, at oe etnogo abok asuk holhikhesik nen, men isikhe,
Eiye! Akla motok kagalek iti nayuk e, iluk atuaneke korlo hagakhe lageikhe meke etnogo hogorakhikhe.
Itithogon hogorakhikhemo iti, it akhuni agat oba yoma meke inobabut, it meke hagasuogoluk inakla motok kagalek mekeat he, it Allah a'buri inakla lia hagarogo 'bisasikhe meke iti, inobabut it hakene dek iti nen, itithogon isikhe iti. 9Iti halok he, an wene ageikhe yokhisak. Hinameke yi meke ti meke agat oba meke, inil damelogo korlo hagakharek meke iti dek aga halok, hinai hano motok dogosak oba wokhinabuagaluk, yogotak ya hinameke iti baga hinagarlak lak hinom ekayorakhe dogono o,” iluk yogeisasikhe.
10Itithogon yogeisasikhesik men isikhe,
“Tha nen herlekha'bugat meke hago dogoagaluk wogokhunem mothogon hagakhe halok, kok meke wogosumo, hanorogonat hagakhe dogogin o. Nen, tha nen herlekha'bugat meke hago dogoagaluk wogokhunem, mothogon hagakhidek halok he, kok meke wogosumo mothogon hagasigin degat o. 11Iti hak, hit hinameke yi meke ti meke agat oba meke inil damelogo hagakharek meke iti wokhisaumo hago dogolik, hanorogo welageidek halok he, ebe hano meke iti ite dogobageik iluk tha nen wokhisagein. 12Hit nen ap ageikhe ameke mothogon hago welageidek halok he, hit meneke, hinekaerek hinameke meke iti ite dogobageik iluk tha nen wokhisagein apegep. 13Ap opakiat meke ap koktek inebe pere meke inatuaneke dogolik inayabu hagakhe dogosak motok erlok dek o. Itithogon dogogin halok he, atuaneke iti nen,
Nopase ageikhe yi hano, nakmu. Nen, ageikhe iti weak, na'it, iluk ekhe dogolik, akmu meke iti ipisak dopokhogon dogolik, ageikhe a'it meke iti, a'it motok hekhe dogosak o. Iti hakene, hit he, Allah atuaneke dogolik, uang atuaneke dogosak erlok dek o,” iluk yogeisasikhe.
Yesus nen inasuk wakhikhe wene
(Matius 11:12-13, 5:31-32; Markus 10:11-12)
14Itithogon yogeisasikhemo it ap Farisi meke emenogo uang motok inetaiken hunik welagoukhasikmo etnogo nen, Yesus nen wene itithogon isinem inasuk holhukhasik nen, at obato agoukha. 15Itithogon at obato agoukhama, at Yesus nen it yogeisekhe dogolik,
“An mot hagakhe lagei, iluk akhuni inil oba hinobabut mot meke hakene hagakhe lagap. Mekeat he, Allah nen hinetaiken motok ilu o. Yi meke ti meke it akhuni nen hano iluk kogotdegarek meke iti nen, at Allah motok a'it o.
16At Yohanes ima usa'isekhe lageikhe meke etnogo aban wageidek werek korlek, wene Allah nen ninasuk wakhikhe meke etnogo men, it Allah ane yogeisekhe lagoukha wene etnogo men, wene itiat kok welageikhe. Meke re, at Yohanes wageikhe iti hurli nen, hano wene Allah nen apma 'bisekherek wene etnogo yogeisilik lagunem, akhuni tha'bokhogonat nen wene waganuogoluk inobatnerogon hathani motok ukiriogei. 17Itithogon ukiriogei meke re, pogot inom, agat inom dek asigin mekeat he, wene Allah nen ninasuk wakhikhe meke iti opakiat ilugun hemurlugat ageikhe dek asigin motok dek o.
18Ap tha nen age waganek meke lologo here'isalok nen, yabokane he ninat meke ageikhe waganhe halok he, paramat hagasigin o. Nen, ap tha nen, he agun nen lologo here'isagein meke waganhe halok he, paramat waganigin o,” iluk yogeisasikhe.
“Ap kok ameke doalegat meke inom, Lazarus inom, itithogon hagakhukha,” iluk oba lisogon yogeisasikhe wene
19Itithogon yogeisasikhesik nen, yabokane at Yesus nen wene ageikhe men yogeisasikhe,
“Ap ageikhe kok ameke motok doalegat dogolik nen, asu oko kok hano meke anek ikhigik, yi meke ti meke hanoma akla hiakhogon dogolik, hibiku-yogoku akla motok arleken akhekhe lageikhe. 20Meke re, ap ageikhe ameke dek meke etaga Lazarus. Ebenake agalumo motok doalegat welageikhe meke, ap kok ameke motok doalegat meke etnogo ai holagapema etoma 'bi aga lagoukha. 21'Bi agunem etoma witik dogolik, akla nen,
Ap kok meke etnogo apiri nukunem nen eken pilikhogon o sirlapon oba usasinem natogorlogo nelabut hethokhogon neke dogole e, iluk apasi werekma, yeke witluk nen, agalumo oba emenogo a'bi nen melanethigik neke lageikhe.
22Itithogon nasi werekma, at Lazarus ameke dek meke etnogo watlageikhe. Watlageikhemo, it malaikat pogot oba Allah nen yoko la'i agarek meke emenogo ageikhe wagoukhasik, ebe wolok nen, ap Abraham alilu 'bi lagoukha. 'Bi lagoukhama nen he, yabokane ap kok ameke doalegat meke etnogo watlageikhe. Watlageikhemo nen, agatma thalhukha. 23Nen, ebe watlatluk lageikharekma eloma lageikhesik motok weagat dogolik, he, elokhoken hebenokhogon liakhasikhe meke, Lazarus Abraham alilu werekma ileken liagisasikhe. 24Ileken liagisalok nen, ane kokhogon men yogokhikhe,
Abraham nopase a! An hetu aik weakma hinet motok weak wakhe lagei yoma hakmu nean o. Lazarus nen iki sisik ima usa'iluk nen, i mago na'bi baga hotok uagaluk, 'bi isuak nen yogosin o, iluk yogokhikhemo 25at Abraham nen, men yogokhikhe,
Na'but e! Hat hiluk dogolik nen, hano meke anek nikik, waganhik, hagakhe korlek, Lazarus yi anek he, weagat welageikhe meke etnogo hakla ebesin! Nen, yogotak, at Lazarus yi yoma wagasik akla hano agasik werek korlegat, hat anek he, hinet weak warekhe lagan iti. 26Nen, ageikhe, akhuni nit werekma yoma nen hat werekma ethoma hoba wageik, nen, hit ethoma nen nit ninoba wageik, hagasinogo iluk turlem ethoma kat weakma waganogo 'bisikhemo werek o, iluk isikhe. 27-28Itithogon yogokhikhemo, at ap kok ameke doalegat meke etnogo nen, men yogokhikhe,
Halok he, nopase! An naila eloma noe nagot inebe 5 baga werek iti, hinet wakharekma yoma wisunogo nen he, at Lazarus ithi husupi yogeisa loagaluk yokhekhe lagei o, nopase, iluk yogokhikhemo nen, 29at Abraham nen, men yogokhikhe,
It iti Musa wene iti inom, ap Allah ane yogeisekhe lagoukha meke emenogo inane iti inom, hago weregat o. Halok he, wene itiat holhe dogosak o, iluk yogokhikhemo, 30ap etnogo nen, men yogokhikhe,
Itithogon egen iti erlok dek o, nopase! Ap ageikhe watlatluk lageikharekma nen iluk atluk 'birisa laumo anek he, it weak hagariogei etnogo thogotdiluk inobabut hebelasusak o, nopase o, iluk yogokhikhemo, 31at Abraham nen, men isikhe,
It hoe hagot etoma Musa wene inom it ap Allah ane yogeisekhe lagoukha meke inane iti inom, inasuk holhidek halok he, ap ageikhe watlatluk lageikharekma nen iluk atluk yogeisa laumo, it iti inakla nen, eberogonat apalok inasuk holusak erlok degat o, iluk yogokhikhe,” iluk Yesus nen yogeisasikhe.
Currently Selected:
Lukas 16: LAIDNT
Highlight
Share
Copy
Want to have your highlights saved across all your devices? Sign up or sign in
