MATIUS 16
16
Dou Beu Agijo Ediimai
1Parisi bagee ma Saduki bagee ma mejake Jesus egaado tai. Epa maida ka dou beu agijo ewaa awe-tijake okei ediimai.
2Okai wo eteete mana, „Uwaataa gaa ikiija ka wegai ko, ’Awii enaa, epa kogéí makeegi kouja.’
3Daana abata, ’Ito naago idaanita, duguu jakuu kouja,’ Ikii epa ko dou epi, kodeja kii wagi kou wagi ka dou agijo ikii dou beu.
4Peu ma mogai jago ma tuma ki dou beu agijo doune ubaate, kodeja dou beu agijo tumaana ma te emuwakaita, Junus kidi to,” etijake ejaikidokijake uwii.
5Etope-taido uwo adijake goti adaku tijake dokii beu.
6Tijake Jesus eteete mana, „Epeepite gai, Parisi ma Saduki ma ka ejajawe-tai maida make ko ikii akaato munii.”
7Tijake okei kede akado wegene teete mana, „Inii goti dokii beu keege kouja,” wegai.
8Tijake okeija ka dimi Jesus egamakijake eteete mana, „Kowaa kei, ikii epaapate maakodo gai beu bagee, magijo ka ikii akado wegene teete, goti beu mana kodo?
9Ikii gamakai beu, mee? Ikii ga-tou beu, mee? goti kemo idibi me ida muto muto to muto daana kou wado maija menita gaa kodaa ikii edu tapuja magoo awimakeetega?
10Daana goti kemo pituwo me ida muto muto to mutoona menijake ikii edu tapuja magoo awimakeetega?
11Kawe danite ikii gai beu ani goti maida make mana te wegai kodo? Kodeja Parisi ma Saduki ma ka ejajawe-tai maida make ko ikii akaato munii.”
12Tijake goti ka ejajawe-tai maida make akaato munii etii beu okei gamakai, kodeja Parisi ma Saduki ma ka etopita mana maida make kodo.
Peterus Jawegata Mana
13Jesus Kaisaria Pilipi dokoo dakii tijake etope-taidoopa egaado teete mana, „Me ka wegai ko, me Joka ki meime?”
14Etijake wo eteete mana, „Me ino ka ko, baptis tei tita me Jahja kidi; daana me ino ka ko Elias; daana ino ka ko Jermia juwa, gokobaki tijawiidaiga wegai tita kede meena juwa wegaigai,” etii.
15Tijake Jesus eteete mana, „Kodeja ikiija ka ko, ani ki meime?”
16Etijake Simon Peterus wo eteete mana, „Aki ki Keristus, ajii bokouto jago Ugatame Joka,” etii.
17Tijake Jesus wo eteete mana, „Ei, Simon, Junus jokame, aki ideide no, me jato make kou mana kodo epi kaawii ko beu, kodeja epaawado ka Naitai kidaa.
18Ani katii, aki ki Peterus, daana kii mogo maida kiija anija uguupuguu amo kebai wado kebai tijawiita; tijake bokawouda ka bida agijo dabapigu te etijawiita.
19Epaawado ka jakimakita makiida ka damo keba-tai agijo kaniita, tijake aki makiida gadimaitage agijo epaawado maija gadimidoke. Daana aki makiida ekegaitage agijo epaawado maija ekegadoke.”
20Tijake okai Keristus kidi mana me idaana ma te ete-tijake okai etope-taido bida peu kidi etimakai.
Edoga Kidi Jesus Bokaitagi Mana Eti-menita
21Okai kou gaa make wado Jesus etope-taido emuwakaine go-motii, okai Jerusalim wado uwii beu kai peu mana kodo. Me iboudo ma, imam iboudo ma, kapogeije epi bagee ma ka gaduwai umina eewijake wagimakai, tijake widaago naago anigou.
22Tijake Peterus wo ouwijake akaije ooteete mana, „Kii mana ki umina aki maida te kijake Ugatame wo dani tijawii,” etii.
23Kodeja Jesus wouga wakouga tijake Peteruspa eteete mana, „Kowaa ke, Teege, ani wakouto bikimi. Ani gaagaa natijawii, aki Ugatameja dimi gai beu keege kouja, kodeja me ka mana ko,” etii.
24Tijake Jesus etope-taidoopa eteete mana, „Me idaana naapeine gapi, okai akaato dimi te gajake okaija pija boko dokijake naapei.
25Meija okai akaato muniine gapi okai akaato igajawiitagi kouja. Daana meija ani maida make okai akaato igajawipi okai akaato domakaitagi.
26Kawo ko enaa kija, kou danite me idaana makiida ka aagijo taagijo okai ipuwe awi-toojogo kodeja, okai akaato igadoke tai kou ko. Daana dimi mana komoka tijawiine ko magijo menija?
27Me Joka Nakameja ajiipiidaiga jaetigo-tai bagee ma enaimo meitagi kouja. Tijake me gakita kei tita agijo abu japaitagi.
28Beu maa kou ani kitii, jakai me ida wija wido jooni-topai, okei me Joka jakimakita makiida ma meete edou beuda te bokaitai.”
Currently Selected:
MATIUS 16: EKG
Highlight
Share
Copy
Want to have your highlights saved across all your devices? Sign up or sign in
