MATIUS 17
17
Bagouda Jesus Iginikiniki Tita
1Uno benumi umijake Jesusja Peterus ma, Jakub ma, kenekame Jahja ma ouwijake, ibo bagoudo okei to oopatikai.
2Okeija pekaida okai iginikiniki tidoke, tijake ebepeka meuka dani ganimakai, daana kagaba ko aweida dani wakijo kai.
3Tijake Musa ma Elias ma ewaa aakijake okai ma mana oojawegai.
4Tijake Peterus Jesuspa eteete mana, „Ei, Tuhan, inii jakai tope ko enaa no. Aki kou danite dimi gape ko, owaajokaa wido kijamigiipiga; ena ko aki ipuwe, ena ko Musa ipuwe, daana ena ko Elias ipuwe,” etii.
5Okai kou mana wegaatigo gaa ataati jabai kapagu ka eepumijake jabai duba make mana wuu eteete mana, „Kii ke ani Joka didé, ani juma dege-dege etita me kidi. Okai ejuwai to tai.”
6Etope-taido kou mana kodo juwijake makiida apaipu tidaa tai, umina weda gajake.
7Kodeja Jesus mejake gane ejakidou, eteete mana, „Jooniwei, weda te gai,” etii.
8Okei peka wado doumigijake me idaana ma edou beu, kodeja Jesus okai kidi to.
9Bagouda make mijouwe keetigo gaa Jesus etimakeete mana, „Ikii dooga agijo me idaana ma te etii, me Joka bokata bagee jupi make anigoutagiida to,” etii.
10Tijake etope-taido etido teete mana, „Magijo ka kapogeije epi bagee ka ’Elias tiga meitagi’ wegaigai?” etii.
11Okai wo eteete mana, „Elias maakidi mejake utoma agijo utoma titaaki tijawii.
12Kodeja ani kitii, Elias meta, daana me ka egai beu tijake okeija dimi gata danite etijawita. Me Joka maija kou dani me ka peepu etijawiitai,” etii.
13Tijake etope-taido gamakai, okai baptis tei tita me Jahja kidi maida mana etita kodo.
Enija Beu Jaawita
14Okei me wedaba kedeepa dakii tijake, me idaana mejake okai jumaapa bado donimakijake migaakobe eteete mana,
15„Ei, Tuhan, ani joka ipa egai; okai enijaanija kijake gaduwai umina; bodija duba ma, uwo duba ma gooteigi kouja.
16Akija etope-taidoopa oomejake okei beu jaawii kaga,” etii.
17Tijake Jesus wo eteete mana, „Kowaa kei, maakodo te gajake akaije te-tai tuma, uno magoo ani keetouta? Daana kigi magoo kojáá kidoutouta? Aneepa oomei,” etii.
18Tijake Jesus emoge etijake enija okai duba make podomijake, okai kou gaa kodaa joka kidi beu kai.
19Tijake etope-taido okei kede to Jesuspa mejake eteete mana, „Magijo ka inii te jaemigimake?” etii.
20Tijake Jesus eteete mana, „Ikii epaapate maakodo gai beu kouja. Beu maa kou ani kitii, kou danite ikiija maakodo gai kodo sesawi miteena dani kipa ko, ikii kou bago ko etiita mana, ’Jakai make amogo tidou,’ etijake amogo taita; dedaana tumaana agijo ma ikii kaga te kaita.
21Kodeja kii bagee tumaana ka te epodomijawija, kodeja sembahjang ma, te nai dijo dou ma ka to,” etii.
Kigi Wijaago Jesus Bokaitagi Mana Eti-menita
22Okei Galilea dokoo uwina teetigo gaa Jesus eteete mana, „Me Joka me ka ganeida eekegajawiitai.
23Okei wagimakijake widaago naago okai anigoutagi,” etii. Tijake okei gaagaa umina.
Ugatameja Owaa Mege Ebé Eedai
24Okei Kapernaum dakii tijake, Ugatameja owaa maida make mege mote-tai bagee Peteruspa mejake eteete mana, „Ikiija ka kuduu Ugatameja owaa maida mege te eedai, mee?”
25Etijake Peterusja „Eedai,” etii. Peterus owaapa dakii tijake, Jesus tiga okaapa eteete mana, „Ei, Simon, akija gai ko kawe dani? Makiida ka jakimake-tai bagee ka meimaapa make mege motija? Okeija jokaaneepa make, mee? ojaa bageepa make,” etii.
26Peterusja „Ojaa bageepa make” etijake Jesusja eteete mana, „Kou keetigo ko jokaane kede ojaa tou.
27Kodeja inii gaagaa te etijawe-tita, aki pekuuda binei mugauwijake edoga ka binei táádoke taipagi ki ebe jakebajake mege domakaipage. Kou motijake ani ma aki ma maida make menii,” etii.
Currently Selected:
MATIUS 17: EKG
Highlight
Share
Copy
Want to have your highlights saved across all your devices? Sign up or sign in
