MATIUS 25
25
Api Jokaagaa Gaati
1Okai kou gaa kodo epaawado ka jakimakita makiida kou ko api jokaagaa gaati lampu dokijake waka bukeete me kidi ebukigou dani bukaa.
2Okei idibi dimi beu, daana okei idibi dimi jago.
3Dimi beu ka kodo lampu dokijake uwoutu dokii beu kouja;
4kodeja dimi jago ka kodo lampu ma, uwoutu awijaida ma dokii.
5Waka ebukeete me ipee tidoke tijake okei utoma uno kogi tijake uno umii.
6Kodeja wanee ejupi mana wuu tidoke, ’Edowei, waka bukeete kidi meete! Ebuki-miwei!’
7Tijake api jokaagaa gaati kodo utoma anigojake lampu epeepi timakai.
8Tijake dimi beu ka kodaa dimi jago kodoopa eteete mana, ’Ikiija uwoutu neewudiwei, iniija lampu dineete no.’
9Kodeja dimi jago ka kodaa wo eteete mana, ’Inii ma ikii ma te tiki. Ikii kaa te-tai bageepa eda-uwei,’ etii.
10Okei eda-uweetigo gaa waka bukeete kidi mejake epeepi timakita ka kodo okai ma enaimo buka naineida jokoujo kai. Tijake damo jekamijawii.
11Nemouga joko ka api jokaagaa kodo maija mejake manaateete mana, ’Ei, kowaa ke wou, kowaa ke wou, inii damo nijakebai.’
12Kodeja okai wo eteete mana, ’Beu maa kou ani kitii, ani kidou beu bagee.’
13Okai kouja, ikii doutou to tai, kou naago ma, kou wagi ma ewo kouja.
Talenta Ena Dani Awe-tai Mana
14Okai kouja kou mana kodo me idaana poto makijo uwija dani bukaa. Jakei te-tai bagee manaa-tijake okaija agijoudo okeija ganeida ekegajawii.
15Me idaana talenta idibi menii; daana me idaana wija; daana me idaana ena, okei gakita kei timakija danite menijawii. Tijake okai joko ka makiida uwii.
16Talenta idibi motita me kidi, okai kou gaa kodo munaa ti-motijake talenta abu idibi ma motimakai.
17Kou dani maija, talenta wija motita me kidi, talenta abu wija ma motimakai.
18Kodeja talenta ena motita me kidi maki utigojake okaija jakei tita me ka mege kodo boonimakai.
19Tou makii tijake wadouto jakei tita me kidi mejake ebé jaduwajawiine.
20Talenta idibi motita me kidi mejake abu idibi ma dokii, eteete mana, ’Ei, kowaa ke, akija talenta idibi naimeetege. Dododou, talenta abu idibi ma motimakipa,’ etii.
21Tijake ibo kidaa eteete mana, ’Enaa kodo ko, jikoo ma enanauto ma nakei te-tai me! Mijo manaida aki enanaa kouja, agijo wedaba maida kajaikeega. Aki jakei te-tai me kidaa ideide duba wadoujo ki,’ etii.
22Tijake talenta wija motita me kidi maija mejake eteete mana, ’Kowaa ke, akija talenta wija naimeetege; dododou, abu wija ma motimakipa,’ etii.
23Tijake ibo kidaa eteete mana, ’Enaa kodo ko, jikoo ma enanauto ma nakei te-tai. Aki mijo manaida enanauto kouja, ibo agijo maida kajaikai. Aki jakei te-tai me kidaa ideide duba wadoujo ki,’ etii.
24Tijake talenta ena motita me mejake eteete mana, ’Kowaa ke, ani epi aki ki boko me kidi wei beuda duwaige, daana kigii beuda kotuu teige.
25Okai kouja ani weda gajake talenta maki duba boonigou. Dododou, aki ipuwe no,’ etii.
26Kodeja ibo kidaa wo eteete mana, ’Kowaa ke, peu nakei te-tai me ena peu kidi! Ani wei beuda duwaiga, daana kigii beuda kotuu timakeiga aki epi.
27Okai kouja anija mege ko mege munaa wega-tai bageepa naamakii naako enaa, ani joko mejake mege kou wado ma abuma motii te.
28Okai kouja talenta kodo jamotijake talenta gaati jago me kidiipa naamenii.
29Agijo jago bageepa abuma menii kouja, tijake okai euga abuma ewaa kai; kodeja agijo tagu bageepa make makita agijo jamotii.
30Tijake epa beu jakei te-tai kidi juwouda ka bunita duba eemigimakai. Okai kouda kodaa jege ma egaagede ma to touda.
Wiwitiida Naago Boko Petai Mana
31Me Joka okaija ajiipi dubaiga meitagiida, jaetigo-tai bagee ma enaimo, okai kou gaa kodaa okaija jegeenaka animakaida animakaitagi.
32Okai jumaapa me tuma tumaija kotuu etimakijake wudijake taitagi, ooto-tai bagee ka domba kodo kamigiipa make okainiinii etijawii bukaa.
33Dombaido kede etikaato amo jato kotuu etijawii, kodeja kamigi akaato amo jato kotuu etijawii.
34Tijake jakimake-tai me kidi etikaato amo jato bageepa etiitagi mana, ’Mewei, Naitaija juma dege-dege kitita bagee; maki kabo pigu tijawitaida gaa ka epeepi kijatijawita jakimakita makiida go-motiwei.
35Ani naidi gaa naija agijo naimai kouja. Ani gewe-gewe gaa uwo no-naimai. Ani duwa jawe tigou gaa nabukai.
36Ani agijo tagu gaa ikii makii agijo naamakijawii. Didi gaa naadadigou. Ani wanee owaa duba tota gaa nadogou.’
37Tijake enaa bagee joko etiitai mana, ’Ei, Tuhan, kawi ka gaa aki naidi teetigo inii kadojake naija agijo kaneetege? Daana gewe-gewe tijake inii uwo no-kaneetege?
38Daana kawi ka gaa aki duwa jawe-tai kadojake kabukeetege. Daana agijo tagu tojake makii agijo kaamakijawii?
39Daana kawi ka gaa aki didi juwa, wanee owaa duba juwa kadojake kadogootege?’
40Tijake jakimake-tai me wo etiitagi mana, ’Beu maa kou ani kitii, anija keneka ka mijo me idaana jakei tita kou ko, kou ko ani nakei tita.’
41Tijake akaato amo jato tota bageepa eteete mana, ’Aneepa make bikimiwei, kowaa kei, peu kugouto dokita bagee, imo to togoo bodija duba kodo; Teege ma jaetigo-tai bagee ma epeepi jaatitaida kodo.
42Ani naidi gaa naija agijo naimai beu kouja. Ani gewe-gewe gaa ikii uwo naimai beu.
43Ani duwa jawe tigou gaa nabukai beu. Agijo tagu tijake ikii makii agijo naamakijawii beu. Ani didi ma, wanee owaa duba ma tijake nadogou beu.’
44Tijake okei joko etiitai mana, ’Ei, Tuhan, kawi ka gaa inii kadou, naidi juwa, gewe-gewe juwa, duwa jawe-tai juwa, agijo tagu juwa, didi juwa, wanee owaa duba juwa, tijake inii kaadadai beu teetege?’
45Tijake okai joko etiitagi mana, ’Beu maa kou ani kitii, mijo me idaana jakei tai beu kou ko, ikii ani maija te nakei tai.’
46Tijake okei gaduwagoo imo to togoo kaitai, kodeja enaa bagee ajii tai imo to togoo.”
Currently Selected:
MATIUS 25: EKG
Highlight
Share
Copy
Want to have your highlights saved across all your devices? Sign up or sign in
