MATIUS 26

Iboudo Jesus Wagiine Mana Wegai

1Kei manaido wegajawijake, Jesus etope-taidoopa eteete mana,

2„Ikii epi, uno wija umijake wadouga etigajake petii tita ga-tou naago kodo. Me ka me Joka eekegajawiitai, pija boko maida edajawe-tijake,” etii.

3Tijake imam iboudo ma, me iboudo ma Ibo Imam eka ki Kajafas ibo owaapa kotuu timakai.

4Okei kede mana amo wegai joko wegai, Jesus gabouga ejakijake wagiine mana kodo.

5Kodeja okeija ka wegaate mana, „Ibo naago kou ko beu, meido jupi tetepepe potu tidoke na kojoka,” wegai.

Baitani Makijo Odijo Jatuumita

6Jesus Baitani makijo tomo jago dani me Simonja owaapa toojogo gaa,

7jagamo idaana okaapa mei; enauto mogo ka ebijata tapuja ibo age odijo awita kodo dokijake okaija dagi maida jatuumijawii, nootigo animakita gaa.

8Kodeja etope-taido kou kodo dojake emoge gai, kei teete mana, „Magijo ka peepu tikumeega?

9Kii odijo ki ibo age kaa tai naako daba bagee menii enaa kodaa,” etii.

10Kodeja kou mana kodo Jesus gajake eteete mana, „Magijo ka jagamo kodo gaagaa etijawii? Enauto agijo nakei teega kouja.

11Daba bagee ikii wa enaimo to-tai kouja, kodeja ani ki keetou to ko beu.

12Odijo ani maida natuumeega kodo ani oka namakai epeepi tai kodo.

13Beu maa kou ani kitii, uwoje makije ajii mana kodo wegakumiitaida, kou jagamo kodo kei teega kou ko ega-tojake wegaitai,” etii.

Judas Jesus Eekegajawiine Dimi

14Tijake wija ma gaati kede ka idaana eka ki Judas Iskariot kidi imam iboudoopa uwii.

15Eteete mana, „Magijo naimaipiga, ani kijaekegajawipa ko?” etii. Tijake okei mege#26:15 perak jokagaati menii.

16Kou gaa make wado eekegajawiine tijake enaa wagi ubai.

Goti Nota Uno

17Goti ejajawii beu naagoudo ka edoga naago kodo etopetaido Jesuspa mejake eteete mana, „Kaija ide naineida epeepi katijawii ko?” etii.

18Tijake joko eteete mana, „Ikii makiida wadoujo kijake kii me kidiipa naaetii, ’Kuduuja kateegi, Anija putu kapa keega. Aki owaapa anija etope-tai ma enaimo ibo naago dijo doune, kateegi’ naaetii.”

19Tijake etope-taido Jesusja etita danite kei tai; tijake wadouga etigajake petii tita ga-tou naago epeepi timakai.

20Wanee kijake okai etope-taido ma enaimo naine animakai.

21Okei nootigo gaa Jesus eteete mana, „Beu maa kou ani kitii, ikii jupi ka me idaana naekegajawiipagi,” etii.

22Okei gaagaa umina tijake meena meena egaado teete mana, „Ei, Tuhan, ani, mee?” etii.

23Tijake wo eteete mana, „Ani ma enaimo no-taida goti uwo duba tokami-moteegi me kidaa naekegajawiipagi.

24Me Joka kapogeije ebijamakita danite kidi uwii, kodeja me Joka eekegajawiipagi me kidi peu kugouto dokidoke no! Kii me kidi te epamakita naako enaa.”

25Eekegajawita me Judas kidi wo eteete mana, „Ei, Kuduu, ani, mee?” Etijake Jesusja „Aki eneege dani,” etii.

26Okei nootigo gaa Jesus goti motijake mobu ediimai. Okai goti utijake etope-taidoopa meneete mana, „Moti-nowei; anija má jato ki,” etii.

27Uwaawe maija motijake nigajaweege etijake meneete mana, „Ikii utoma nowei.

28Kii ke anija kijatogijawita mana kodo emo kodo, me wedaba maida make jatuumijawita, peu awitaido ipa jajaike-tijake.

29Kodeja ani kitii, ito kiija make wado ani utaadijo te naita, Naitaija jakimakita makiida kodaa ija keenaitaida to,” etii.

30Okei ebetaataa tijake podomai, tijake Zaitun Dimiidaapa uwii.

Peterus Beu Puga Etai Mana Douja Dojawita

31Tijake Jesus eteete mana, „Itounu ikii utoma ani maida make duwaa-duwaa taipiga; kapogeije ebijamakita kouja: Ani ooto-tai me kidi wagiita, daana domba imo kodo kigipapa tidaa taitai.

32Kodeja ani anigojake ani tiga Galilea dokoo uwiita,” etii.

33Kodeja Peterus wo eteete mana, „Kou danite okei utoma aki maida make duwaa-duwaa tipai maija, ani ki beu,” etii.

34Jesus wo eteete mana, „Beu maa kou ani katii, ito kii uno ki maija, ajam mana tai beu gaa, aki kigi wido beu puga natai-page,” etii.

35Peterus wo eteete mana, „Aki ma enaimo bokapa maija, ani beu puga te kataipiga,” etijake etope-taido utoma kou kodo etii.

Getsemani Taida

36Tijake Jesus okei ma enaimo maki katouda eka Getsemani ebatitaidaapa mei. Tijake etope-taidoopa eteete mana, „Ikii jakai animaki-tou, ani ki wo dani sembahjang te-uwiine gaa,” etii.

37Peterus ma Zabdi jokaaneija ma ouwijake okai gaagaa umina tijake didi gaduwai.

38Tijake eteete mana, „Anija kegepa gaagaa umina bokaine dani. Ikii jakai tojake needoutou,” etii.

39Wo dani kijake apaipu tidoke tijake sembahjang teete mana, „Ei, Naitai, kou danite enaa keetigo ko kii uwaawe ki aneepa make napipikajawii. Kodeja anija dimi ko beu, akija dimi to,” etii.

40Etope-taidoopa mejake okei uno umi-toojogo edomakai. Tijake Peteruspa eteete mana, „Ei, ikii mijo gaa to ani ma nadoutou ko kaga keega, mee?

41Doutou ma sembahjang ma, gaadou tapa te ke-tijake. Dimi ko petee kodeja má jato debee,” etii.

42Wijaago maija uwijake sembahjang teete mana, „Ei, Naitai, kou danite uwaawe ki beu te kijake ani nai beu kai peu keetigo ko, akija dimi kei tijawii to,” etii.

43Kigeena ma mejake uno umi-toojogo edomakai, uno kogi umina kouja.

44Kojoka kigeena ma ejaikijake uwii. Widaago sembahjang tai, kei teegi danite.

45Tijake etope-taidoopa joko mejake eteete mana, „Ikii ito maija uno umijake uno kogi duwajawii. Dowei, putu kodo duwadoke keega. Peu bageepa me Joka euwadoke.

46Anigowei, mewei. Edodowei, naekegaagi me kapauto keegi,” etii.

Jesus Ejakimakita

47Okai mana wegaatigo gaa kodaa wija ma gaati kede ka idaana Judas kidi mei. Okai ma enaimo me wedaba kataana ma, kopa ma dokii. Okei imam iboudo ma me iboudo ma ka ebadikumita bagee kede.

48Eekegajawita me kidaa tegee dou mana eti-menita, eteete mana, „Ani unu ejumidoupiga me okai kii kidi kijoka, ejakimakai,” etii.

49Okai kou gaa kodo Jesuspa mejake eteete mana, „Ei, Kuduu!” etijake unu ejumidou.

50Jesus eteete mana, „Ei, noogei, magijo taine meege?” etijake okei mei. Jesus maida gane mapido tijake ejakimakai.

51Jesus ma enaimo ka idaana kidi kataana juwi-motijake Ibo Imam jakei te-tai me wagijake gapa jaduwajawii.

52Tijake Jesus eteete mana, „Akija kataana ko awijawii; kataana goja bagee utoma kataana ka eduwajawii.

53Akija gai ko, ani Naitai ediimai naako, ito kii gaa kidi maija okai jaetigo-tai kotuu wija ma gaati te naimi-toja gaage, mee?

54Kodeja kou danite kawe dani tijake kapogeije kobadoke tija, kii dani taita mana kodo?”

55Okai kou gaa kodo me kotuu, kedeepa Jesus eteete mana, „Ikii moonaa te-tai me akaija ootaine jaijo kataana ma kopa ma dokijake najakimakaine meega, mee? Agapi gakita ani Ugatameja owaa duba animakijake kitopeiga, tijake ikii najakimakai beu.

56Kodeja kei manaido utoma ewaa kidaa, tikauwa ka gokobaki tijawiidaiga wegai tita bageeja ka ugata kapogeije kobatijake.” Tijake etope-taido utoma ejaikidokijake okiimigii.

Jesus Pika-tai Jumaapa

57Tijake Jesus ejakimakita bagee kodaa Ibo Imam Kajafas kidi jumaapa ouwii, kapogeije epi bagee ma, me iboudo ma kotuu timakitaida kodaa.

58Kodeja Peterus poto make eepejake Ibo Imam owaa juwouda dakii. Owaa watija jokoujo kijake douto-tai bagee ma enaida animakai, makeeniipiga mana doune tijake.

59Imam iboudo ma, mana pika-tai kotuu ma Jesus wagimakaine puja mana jakubaine tijake ubai;

60kodeja domakai beu, jakubaine bagee wedaba mei kodeja. Nemouga me ida wija aamejake,

61aeteete mana, „Kii me kiija kii mana godata, ’Ani ki Ugatameja owaa bogomijawijake naago wido to migijawija,’ wegaategi me” aetai.

62Tijake Ibo Imam joonidoke tijake eteete mana, „Aki manaana ma wo te etii, mee? Okei má mana kateegai kou ko?” etii.

63Kodeja Jesus gabo tou. Tijake Ibo Imam eteete mana, „Ajii bokouto jago Ugatame maida ani baita kadiimai. Aki ki Keristus, Ugatame Joka kidi beuje? joko enidou,” etii.

64Tijake Jesus eteete mana, „Akija eneege dani. Kodeja ani katii, emino me Joka Bida Bokouto etikaato gebo animakijake epa maida ka tá kapagu maidaiga meete edoutage,” etii.

65Tijake Ibo Imam okai kidaa kagaba kigibajake eteete mana, „Okai Ugatame eduwai. No, magijo taine inii mana abuma wegai? Okaija eduwata mana ikii ejuweega.

66Ikii kawe dani dimi egai?” Etijake wo eteete mana, „Okai bokai beu kai peu,” etii.

67Tijake okei ebepeka epoge etuwajake wagii; daana joko ka kede ganaadabe wageete mana,

68„Douja nidodou, kowaa ke, Keristus, meija kageegi?” etii.

Peterus Beu Puga Etita

69Peterus kidi juwouda animaki-toojogo. Kei te-tai api idaana mejake eteete mana, „Aki maija Jesus ma enaimo, Galilea ka me kidi,” etii.

70Kodeja okei utoma jumaapa beu puga eteete mana, „Aki eneege ko ani gai beu,” etii.

71Okai juwouda wo dani tijake api idaana maija edojake kouda tota bageepa eteete mana, „Kii kidi Jesus ma enaimo, Nazaret ka me kidi,” etii.

72Tijake kigeena ma beu puga etijake baita makijaweete mana, „Kii me kidi ani edou beu me,” etii.

73Tota dani gaa kidaa kouda kodaa jooni-tota bagee Peteruspa mejake eteete mana, „Beu maa, aki maija okei jupi ka me idaana, akija mana gimo ka ewaida keega kouja,” etii.

74Tijake okai akaato peu dokijawijake baita makeete mana, „Kii me kidi ani edou beu me.” Etijake okai kou gaa kodo ajam mana tai.

75Tijake Peterus Jesusja etipi mana kodo gadoke, kou ko, „Ajam mana tai beu gaa aki kigi wido beu puga nataipage” etipi mana kodo. Okai podomijake jege kodiinakii tai.

Currently Selected:

MATIUS 26: EKG

Highlight

Copy