MATIUS 27
27
Jesus Pilatus Jumaapa Ouwita
1Abata digii imam iboudo ma, me iboudo ma utoma mana wegai, Jesus wagiine tijake.
2Buda egadimijake Gubernur Pilatus jumaapa eekegajawigou.
Judas Bokata Mana
3Eekegajawita me Judas kidi okei wagiine mana wegaate kodo edojake gaagaa tai. Tijake mege jokagaati kede imam iboudo ma, me iboudo ma amo jamenigou,
4eteete mana, „Ani peu keega, peu beu me kidi kijaekegajaweega kouja.” Etijake okei joko eteete mana, „Initai, mee? akitai no,” etii.
5Tijake kei mege kede Ugatameja owaa duba emigijake okai podomai. Okai uwijake akaato buda dajawijake bokai.
6Kodeja imam iboudo ka mege kede motijake wegaate mana, „Kei mege kede mege awijaida awii ko dá; me emo edata mege kouja.”
7Kojoka mana wegajake kei megeido ka tapuja kei te-tai maki edai, ojaa bagee emakaida jaawiine tijake.
8Okai kouja maki kou ko eka Emo Maki ebateigai, ito kii naago ki maija.
9Tijake tikauwa ka gokobaki tijawiidaiga wegai tita me Jermia ka wegata mana kobata, kou ko:
Okei mege jokagaati kodo motii,
Okai age ko Israil jokaane ka egakijawita.
10Tijake tapuja kei te-tai ka maki age ke-tijake menita,
Tuhanja mana enimakita danite.
Pilatus Jesus Egaado Tita
11Jesus Gubernur jumaapa jooni-toojogo. Tijake Gubernur egaado teete mana, „Aki ki Jahudi ejakimake-tai me kidi, mee?” Etijake Jesus eteete mana, „Akija eneege dani,” etii.
12Kodeja imam iboudo ma, me iboudo ma ewidogijake okai manaana ma wo etii beu.
13Tijake Pilatus eteete mana, „Okeija kawidogeete manaido juwii beu, mee?” etii.
14Kodeja manaana ma wo etii beu kouja Gubernur kidi ego takuu-takuu umina.
15Ibo naago kodo Gubernur kidi wanee owaa duba ka me idaana jajaikeigi, okeija ka ediimija me kidi.
16Okai kou gaa kodo epa peu me idaana eka ki Barabbas ejakimaki-toojogo.
17Me wedaba kede kotuu timakijake, Pilatus eteete mana, „Ikii meime ide ani kijajaikai? Barabbas, mee? Jesus, Keristus eebateigai me kidi,” etii.
18Okei be egajake kouja eekegajawii okai epi kouja.
19Okai boko peta-taida animaki-toojogo jagamome okaapa ebadikumijake eteete mana, „Enaa me maida make kiija tumaana ma te kei tai, ito naago bagume dubaiga okai maida make gaduwai umina tipa kouja,” etii.
20Imam iboudo ma, me iboudo ma ka meido kodo monoo etai, Barabbas jajaikai ediime-tijake, daana Jesus wage-tijake.
21Tijake Gubernur kigeena ma wo eteete mana, „Kei wija kei kawi ki ide ani kijajaikai ko?” Etijake joko eteete mana, „Barabbas kidi,” etii.
22Tijake Pilatus eteete mana, „Keetigo ko, ani magijo Jesus kidi, Keristus eebateigai kidiipa kei etai ko?” etii. Tijake okei utoma eteete mana, „Pija boko maida edajawii,” etii.
23Tijake Pilatus eteete mana, „Má peu agijo kei tijake ka?” etii. Kodeja okei umina emeeme teete mana, „Pija boko maida edajawii to tai.”
24Pilatusja mana epa beu kijake, tetepepe ewaa kaineega dojake uwo motii. Me kotuu pekaida gane witogeete mana, „Kii me ki emo kou maida ani peu beu. Ikii dokiwei,” etii.
25Tijake me utoma wo eteete mana, „Okaija emo kou ko inii wado ma inii jokaane wado ma dokeenii enaa!”
26Tijake okai Barabbas jajaikai. Kodeja Jesus godijai etijake pija boko maida edajawe-tijake eekegajawii.
Serdado Kedaa Jesus Ewidogai
27Tijake Gubernurja ka serdado kedaa Jesus owaa duba ouwijake serdado imouto kotuu timakai.
28Kagaba jabeja-motijake emo dani kagaba jamakijawii.
29Dogo buda bubukajake dagi maida kobeigido makita jatijawijake mome maana etikaato ganeida jadokijawii. Okai jumaapa migaakobe etijake ewidogeete mana, „Ei, ajii kodo, Jahudi ejakimake-tai Ibo kidi!”
30Okei epoge etuwajake mome kodo jamotijake dagi maida wagii.
31Ewidogijake emo dani kagaba kodo jabeja-motijake okaija makita kagaba jamakijawijake ouwii, pija boko maida edajawiine tijake.
Jesus Pija Boko Maida Edajawita
32Okei podomeetigo gaa, Kireni ka me idaana eka Simon ma akado tai. Kii me kidi pija boko jadoke-tijake tapa-tapa etai.
33Eka ki Golgota, kou ko, Dagi Mitoo Kotuuda okei dakii tai.
34Tijake utaadijo enege peu uwo ma takaa tijake menii, kodeja igi wagidojake nai beu.
35Okei pija boko maida edajawijake okaija kagaba okei wudii, tipa po momogo tija dani kei tijake.
36Kouda kodaa animakijake edoutoojogo.
37Okaija dagi wado ewidogita mana ebijajake tawajawu: Kii ke Jesus, Jahudi ejakimake-tai me.
38Oma mote-tai wija okai ma enaimo, etikaato meena, akaato meena, pija boko maida edajawii.
39Koudaiga jaweete bagee ka migo kuneewatii tijake
40ewidogeete mana, „Jee! Aki ki Ugatameja owaa bogomijawija, daana naago wido to migijawija kidi, aki akaato petii tidodou! Kou danite aki Ugatame Joka keetigo ko, pija boko maida make mijouwe kidodou!” etii.
41Kou dani maija imam iboudo ma, kapogeije epi bagee ma, me iboudo ma ewidogeete mana,
42„Okai joko ka bagee petii etijawita. Okai akaato petii te timake. Okai Israil ejakimake-tai me kidi. Ito okai pija boko maida make mijouwe kai enaa, inii maakodo egaipage kouja.
43Okai Ugatame maida dimi ekotopijawii. Kou danite Ugatameja ide egapi ko, petii etijawii enaa. ’Ani ki Ugatame Joka’ wegata kouja.”
44Okai ma enaimo edajawita oma mote-tai bagee maija okai kou dani ka ewidogai.
Jesus Bokata
45Dagi epouda gaa kodaa kou maki utoma wanee kijake kou kodo meuka amouwe dagiida to.
46Meuka amouwe dagiida gaa Jesus kuutaka emeeme teete mana, „Eli, Eli, lama sabachtani?” Me manaida awi-toojogo ko, „Ei, anija Ugatame, anija Ugatame, magijo ka najaikeege?” etii.
47Okai kouda kodaa joonita bagee wija wido juwijake kei teete mana, „Me kii ke Elias manaa-teete,” wegai.
48Okai kou gaa kodaa okeepa ka me idaana tibigi uwijake oobaa motii; enege utaadijo duba tokamijake mome momogiida juku atii; tijake no-tijake menii.
49Kodeja joko kaido eteete mana, „Todowei, kou danite Elias mejake petii etijawiipagije beuje, dou no,” etii.
50Jesus kigeena ma kuutaka emeeme tijake okaija dimi mana kodo wado ekegajawii.
51Okai kou gaa kodo Ugatameja owaa bede duwajawita kagaba petaago jupiidaiga wija kai, waiko make wako to. Daana maki pigi-pigi tai, daana mogo akagidaa tai.
52Me oka maija kebadaa tijake jimubeu bagee wedaba anigodaa tai.
53Me oka duba make podomijake Jesus anigojake wadouto jimubeu makijo wadoujo kai, tijake me wedaba kedeepa ewaa kidaa tai.
54Serdado migougu me ma, okai ma enaimo Jesus edoutota kede ma maki pigi dojake, daana kei titaido utoma, okei weda gai, eteete mana, „Beu maa kou, me kii te Ugatame Joka kidi ki,” wegai.
55Kouda kodaa jagamoudo wedaba maija tojake poto make edoutou. Kou ko Jesus Galilea make eepejake eedadita bagee.
56Kou kodo ko Marjam Magdalena ma, Jakub ma Josias ma ukame Marjam ma, daana Zabdi jokaane ukame ma.
Jesus Me Oka Emakita
57Uwaataa digii Arimatea ka tonawi me idaana Jusuf kidi mei. Okai maija Jesus etope-tai idaana.
58Kii me kidi Pilatus jumaapa Jesusja má jato ediime-uwii. Tijake Pilatusja mene-tijake etimakai.
59Jusuf má jato kodo motigojake jimubeu enaa kagaba ka etonimakai.
60Tijake okaija ka ija me oka duba emakijawii, mogo duwimakita duba. Tijake mogo peijo me oka damoutoopa taki atijake uwii.
61Kouda kodaa Marjam Magdalena ma, joko ka Marjam ma, me oka watija kodaa aanimakeetigo.
62Aweetaa naago kodo, kou ko epeepi tita naago muumai tijake, imam iboudo ma, Parisi bagee ma Pilatus jumaapa kotuu timakai.
63Eteete mana, „Ei, Tuan, inii gaage, uneune tijawe-tai kidaa ija tota gaa wegata mana, ’Uno wido umijake ani anigouta,’ wegata.
64Okai kouja naago wido kei nijadoutoote bagee nijaebadikumii, etope-taido gabouga mejake emotigota, daana meidoopa eteete mana, okai bokata bagee jupi make anigopi wegai na kojake. Kou danite edoga ka uneune tijawii ma ko nemouga ka ko wo etige kaita,” etii.
65Pilatus eteete mana, „Serdado douto-tijake ouwii. Ikii maa kou doutoote ekowai.”
66Okei uwijake me oka bida-bida timakai. Mogo maida tegee dojake edouto-tai bagee „Nijaadoutou” etii.
Currently Selected:
MATIUS 27: EKG
Highlight
Share
Copy
Want to have your highlights saved across all your devices? Sign up or sign in
