MARKUS 1

Baptis Tei Tita Me Jahja Kidi

1Kii dei edoga kidi ajii mana Jesus Keristus maida make, Ugatame Joka kidi.

2Tikauwa ka mana wudei tita me Jesaja ka kapogeije ebijamakita danite:

Juwidou, naaetigo-tai me tiga aki jumaapa kaaebadikumii;

Akija ita epeepite kaawadiitagi.

3Gei tapa mana emeeme tina:

Tuhanja ita epeepi jawadijawii;

Kago-pagooja maija doodoo jaawii.

4Jahja gei tapa meido baptis etaine mei, daana tedemijake baptis tai mana pitokai, peu awitaido ipa jajaike-tijake.

5Tijake Jahudi ma, Jerusalim ma, maki utoma podomijake Jahja edou uwii. Okai Jarden oneiga baptis etai, okeija ka peu awitaido odajake.

6Jahjaja kagaba ko unta ijo, daana piti ko kado ka. Okaija naija agijo ko kobeepa ma, buguwa ka dokone odijo ma.

7Okai meidoopa mana wudii, kii dani eteete mana, „Ani ma ko okai ki bida jago me ani nemouga meitagi. Okaija bado awii ani tudumijake jaekegai ko nadou peu.

8Ani ki uwo ka baptis kitai kodeja, okaija ko Rohulkudus ka baptis kitaitagi,” etii.

Tuhan Jesus Baptis Etita

9Okai kou gaa kodo Jesus Galilea dokoo Nazaret makijo make mei. Tijake Jahja Jarden oneiga baptis etai.

10Okai uwo duba make wadouwe keetigo gaa kodaa epa damo kebadoke tijake Ugatameja Roh kodo wonou dani tijake okai maida mijouwe kai dou.

11Tijake epa duba make mana wuu tijake, eteete mana, „Aki ki ani Joka didé. Ani umina juma dege-dege katai,” etii.

Tuhan Jesus Egaado Tita

12Okai kou gaa kodaa Roh ka Jesus me beuda ouwiine umina etai.

13Uno mepiija me beuda tojake Teege ka egaado tai. Okai ego jago jinaido ma enaida tou, kodeja Ugatameja jaetigo-tai bagee ka eedadai.

Jesus Meido Etopai Go-motii

14Jahja ejakimakijake wado, Jesus Galilea dokoo mejake Ugatameja ajii mana wudikumii;

15kei teete mana, „Putu duwadoke keega; Ugatameja jakimakita makiida kapa keega. Tedemiwei, ajii mana kou maakodo gawei,” etii.

Binei Muga-tai Bagee Manaa-tai

16Okai Galilea iteida ita uwina uwina teetigo, Simon ma, kenekame Andereas ma ebai peku duba mijouwe aweetigo edou; okejai binei aamuga-tai bagee kouja.

17Tijake Jesus eteete mana, „Aamewei, aanaapewei; ani me mugai kijaikaita no,” etii.

18Okai kou gaa kodaa okejai ebai aajaikidokijake Jesus aepei.

19Jesus wo dani kijake Zabdi jokaaneija Jakub ma, kenekame Jahja ma komaida ebai aapuumeetigo edou.

20Okai kou gaa kodaa okai manaa-tijake okejai nakame Zabdi ma, ookei te-tai meido ma komaida aajaikidokijake Jesus aepei.

Enija Jago Me

21Okei Kapernaum makijo uwii. Sabbat naago Jesus sembahjang owaapa wadoujo kijake meido etopai.

22Okaija etopita mana okei ego takuu-takuu umina, okai bida jago me bukaa danite etopai kouja, kapogeije epi bagee dani bukaa ko beu.

23Okai kou gaa kodaa okeija sembahjang owaa duba enija jago me idaana tojake emeeme

24teete mana, „Ei, Jesus, Nazaret ka me, aki ma inii ma má imee? Aki peu neewiine meege, mee? Aki ki ani epi no, Jimubeu kidi Ugatameepa make meta,” etii.

25Tijake Jesus ewidogeete mana, „Gabo! Me kidi duba make podomidou,” etii.

26Tijake enija kodaa me kidi wo gojawii jamo gojawii umina etai. Kuutakaa umina emeeme tijake okai duba make podomai.

27Meido utoma ego takuu-takuu umina timakijake okei kede wegaate mana, „Jee! Kou ko magijo? Ija mana muto kojoka. Okai mana bida peu etimakijake enija maija jajuweegai kou ko,” wegai.

28Tijake egaa kodo Jesus maida make mana kodo Galilea dokoo maki utoma wudigi tidoke tai.

Peterus Baakame Beu Jaawita

29Okai kou gaa kodo okei sembahjang owaapa make podomijake, Simon ma Andereas ma ka owaapa woujo kai, Jakub ma Jahja ma enaimo.

30Simon baakame gobi ka pakuti-toojogo, tijake okei egaa kou mana kodo Jesus etii.

31Tijake Jesus mejake gane ejakijake eenigojawii, tijake gobi kodo beu kidoke tai, daana jagamo kodaa eedadai.

Uwaataa Digii Me Wedaba Beu Jaawita

32Uwaataa digii, meuka wakoujo kijake, didi bagee ma, enija jago bagee ma utoma me ka Jesuspa oomei.

33Kou makiida ka bageido utoma damoutoopa kotuu timakai.

34Didi tuma tumaija ejakita bagee wedaba beu jaawii, daana enija wedaba jaemigimakai. Enijaido kodo mana te wegai etii. Enija kodo okai kidi epi kouja.

Jesus Mana Wudina Tai

35Abata digii, makiida awii beu gaa Jesus anigou. Okai podomijake me beuda uwii. Kouda kodaa okai sembahjang tai.

36Simon ma, okai ma enaimo bageido ma eepei.

37Okei edomakijake eteete mana, „Kuduu, meido utoma kaubaate,” etii.

38Tijake Jesusja „Mewei” etii. „Joko ka kapa ka makiida maija ani mana wude-uwiine no. Okai kou maida make ani podomai,” etii.

39Tijake okai uwijake Galilea dokoo utoma ka sembahjang owaido duba mana wudina, daana enija maija jaemigimakai.

Tomo Jago Dani Me Ojawii

40Tomo dani me idaana Jesuspa mejake okai jumaapa maki jato mijouga kijake ediimeete mana, „Kou danite aki enaa gape ko, aki bida jago kojoka naojawii,” etii.

41Tijake okai ipa egajake gane mapido atii. Ejakidojake, „Ani ide. Aki oodoke ti,” etii.

42Okai kou gaa kodaa tomo dani kodo me kidi maida make igajake oodoke tai.

43Tijake Jesus bida peu umina mana etijake, „Egaa uwii,” etimakai.

44Daana eteete mana, „Epeepite gai; me idaana ma te etii, kodeja aki akaato imampa emuwake-uwijake oodoke keege kouja Musaja nitimakita agijo menii, okei dimi ga-tijake,” etii.

45Kodeja me kidi uwijake okai kou mana kodo aiko amuko wegakumijake mana kodo wudigi tidoke tai. Tijake Jesus maki okogoopa ewaida jokoujo te kimake kouja me beuda to tou. E butu te butu ka bageido okaapa megoo tai.

Currently Selected:

MARKUS 1: EKG

Highlight

Copy