MARKUS 2
2
Bado Ekogadaa Tita Me Beu Jaawita
1Uno wija wido umijake Jesus kigeena ma Kapernaum makijo wadoujo kai. Okai owaapa topi mana kodo meido juwii.
2Egaa kodo me wedaba kotuu timakijake tou ma peu, damoutoopa maija. Tijake okai Ugatameja mana oowegai.
3Bado ekogadaa tita me idaana Jesuspa edoke-mei, me ida wii ka edokijake.
4Kodeja me tipi ka Jesus jumaapa te jawimake tijake okai doodoo wado ka owaimo kebajawii. Kebajawijake bado ekogadaa tita me edokita kejage kodo Jesus jumaapa mijouwaawii.
5Okeija ka maakodo gai kodo Jesus jadojake bado ekogadaa tita me kidiipa eteete mana, „Ei, ani joka, akija peu awitaido ipa kajaikidokii,” etii.
6Kapogeije epi bagee wija wido wo dani animakijake okei kegepa duba dimi gai.
7„Magijo ka kii me kidi kii dani mana godaagi? Okai Ugatame eduwaate no. Meija peu awitaido ipa ejaikija, kodeja kato to, kii ke Ugatame kidaa to,” okeija dimi gai.
8Okai kou gaa kodo maija okeija munouga to gaawe teete dimi kodo Jesus kegepa duba epi kouja, okai eteete mana, „Magijo ka ikii kou mana kodo ikiija kegepa duba dimi gaate?” etii.
9„Kawi ka ki ekowadoke, bado ekogadaa tita meepa, ’Akija peu awitaido ipa kajaikidokii’ etii ki, mee? ’Anigou, akija uno umii kejage dokijake uwii,’ etii ki.
10Kodeja me Joka makiida kiija peu awitaido ipa ejaiketijake boko jaduwajawita me kidi ikii epi ke-tita” — tijake bado ekogadaa tita meepa eteete mana —
11„Ani katii, anigou. Akija uno umii kejage dokijake owaapa uwii,” etii.
12Okai kou gaa kodaa okai anigou. Uno umii kejage dokijake me pekaida okai podomai. Meido utoma umina maa kou ego takuu-takuu. Okei Ugatame muta etuwai, kei teete mana „O, kii ke inii dou beu agijo no,” wegai.
Lewi Manaa-tita
13Tijake Jesus podomijake iteida uwii. Me wedaba okaapa mejake okai etopai.
14Okai ita wo uweetigo Alpius jokame Lewi kidi mege kotuu te-taida animaki-toojogo edou. Tijake Jesusja „Naapei,” etii. Okai joonidoke tijake eepei.
Mege Kotuu Te-tai Bagee ma Enaimo Nai
15Okaija owaapa Jesus animakijake nootigo. Mege kotuu te-tai bagee ma, peu bagee ma, Jesus ma etope-taido ma enaimo animakai. Okai kouda kodaa eepeete bagee wedaba kouja.
16Mege kotuu te-tai bagee ma, peu bagee ma Jesus ma enaimo nootigo kodo Parisi bagee ka kapogeije epi bagee kede edojake okei etope-taidoopa eteete mana, „Magijo ka okai mege kotuute-tai bagee ma, peu bagee ma enaimo noote?” etii.
17Jesus kou mana kodo juwijake eteete mana, „Bida bagee doktoda dimi te egaja, kodeja didi bagee to. Ani enaa bagee ebukaine mei ko beu, kodeja peu bagee ebukaine mei,” etii.
Te Nai Dijo Dou Mana
18Jahjaja etope-taido ma, Parisi bagee ma te nai dijo dootigo. Okei Jesuspa mejake eteete mana, „Magijo ka Jahjaja etope-taido ma, Parisi etope-taido ma te nai dijo do-tai, kodeja akija etope-taido ko beu?” etii.
19Tijake Jesus eteete mana, „Waka bukeete me kidi ogaaneido ma toojogo gaa kodaa te nai dijo domake, mee? Kojoka waka bukeete me ma toojogo gaa te nai dijo te domakija.
20Kodeja putu naago kaita kodo, waka bukeete me okeepa make beu kijake okai kou gaa kodo okei te nai dijo doutai.
21Me idaana ma doga kagaba maida ija kagaba te puumija. Puumita kodo ko kigibidaa tija kouja; kou ko, ija kagaba kodo doga kagaba maida make umina kigibeenija.
22Daana me idaana ma ija utaadijo doga kado tapuja duba te wagaawija; utaadijo kodo potu tijake kado tapuja wigodoke kouja. Tijake utaadijo kodo peu kai, daana kado tapuja maija. Kodeja ija utaadijo ija kado tapuja duba wagaawija kodaa,” etii.
Sabbat Naago Gandum Uta Duwai
23Sabbat naago kigeena Jesus gandum taidaiga wokaato kai. Okei uweetigo etope-taido kede gandum jukuuno kodo duwamote-tai.
24Tijake Parisi bagee Jesuspa eteete mana, „Dododou, magijo ka okei Sabbat naago dijo beebu teete?” etii.
25Tijake Jesus eteete mana, „Ikii Daudja kei tita agijo kapogeije ebatai beu, mee? Okai agijo beu kijake daana naidi tijake kodo, okai ma enaimo bagee maija;
26okai Ugatameja owaa duba wadoujo kijake kei tita agijo kodo; Abijatar kidi ibo imam toojogo gaa kodaa; okai makita goti kodo nai, nai ko dá kodeja; imam to pijo; okai ma enaimo bagee maija okai menita kodo,” etii.
27Tijake Jesus eteete mana, „Sabbat naago kou ko me maida make ewaa jaawita. Kodeja Sabbat naago maida make tijake me kei ewaa awita ko beu.
28Okai kouja me Joka kidaa Sabbat naago maija boko duwajawita me kidi,” etii.
Currently Selected:
MARKUS 2: EKG
Highlight
Share
Copy
Want to have your highlights saved across all your devices? Sign up or sign in
