ILOOWALI 26
26
Tei Isihaka lotibiluloa̒ to Gerar
1Tolipu boito luli tilumoodei polobiti debo odelo u malo toduo mai to jamani lei Abraham. Tei Isihaka mola lotaalua wolei Abimelekh, olongia taulo Pilistin to Gerar, wau helohile mao̒ poluasiyolo u motibiluloa̒ mola teto. 2Sua̒li boito pilohutulio kalana Eeya malo pobilohei batanga to olio, wau helo tahuda, “Diila mao̒ ponao̒ ode Masiri; potibiluloo̒lo tolipu botie, debo odelo u mapilo malenta-U̒ mai olemu. 3Wau̒ mamoduo̒lo wau mobalakati mai olemu. Ngoilanggubu lipu botie mawohi-U̒ mai olemu wau ode waliimu. Wau̒ mamoe̒ela mola danti u mailohi-U̒ odelei Abraham tiyamamu. 4Wau̒ mamongohi mai olemu walao̒ wau wombu daatalio debo odelo poliyama to hulungo, wau ngoilanggubu lipu botie mawohi-U̒ mai olimongolio. Ngoa̒amila bangusa todunia mamo molohone to ola-U̒ alihu Wau̒ mobalakati mao̒ olimongolio debo odelo Wau̒ malo balakati mao̒ waliimu. 5Wau̒ mamo balakati mai olimongoli, sababu tei Abraham malo dungohe ola-U̒ wau malolaala ngoa̒amila butoo̒ wau palenta-U̒.”
6Oditolio malo tibiluloo̒ tei Isihaka to Gerar. 7Tou̒ tau-tauwalo mota teto helohintu mao̒ pasali li Ribka, tei Isihaka lolametao̒ deu̒ tio boito tawali-yaliilio, wau diila dilelio. Tei Isihaka moohe totau-tauwala boito bolo mapateelio tio mate-mateelo mao̒ huna moo̒tapu mao̒ oli Ribka tagaaga daa̒ boito. 8Lapatao̒ tei Isihaka lotibiluloa̒ mola teto dengolo wakutu mola hiheolio, tou̒ dulahee tuwau ti Olongia Abimelekh loo̒onto mota lonto tutuloalio, wau iloontongalio mota tei Isihaka donggo papaaluta woli Ribka. 9Yi tiliyangio mai tei Isihaka wau tio loloi̒ya mao̒, “Wolo taabua boito dilemu? Yilongola yio̒ helo loi̒ya deu̒ tio tawali-yaliimu?”
Tametao̒ lei Isihaka, “To pikilangi mola lowatia, deu̒ watia mapateelio mate-mateelo mao̒ wonu polele mao̒ lowatia tio dile lowatia.”
10“Wolo umaa pilohutumu olami?” ualei Abimelekh. “Tala ngota lo ulipuu̒ mowali wambai̒o motuluhe woli dilemu, wau wonu sua̒li boito motoduo mai, yio̒-yio̒olo tatihu-tihula to totala lami boito.” 11Lapatao̒ tei Abimelekh malo poe̒elao̒ ngoilanggubu ulipulio odie, “Titaalo tita tamomuyu tau botie meaalo dilelio mahukuu-maniyola mate.”
12Tei Isihaka malo mulayade bili u motokela-kela mao̒ halabolu tolipu boito, wau totaunu boito ilotilapulo poo̒ohetuto piu̒wa lonto u pilomua̒dio, sababu Eeya malo balakati olio. 13Okokayalio he oduhenga mola wau tio lowali kaya daa̒. 14Taulo Pilistin helohiihia to olio sababu tio owato dadaata, himbala lohimba wau sapi. 15Lapatao̒ timongolio lolambulao̒ wolo huta ngoa̒amila ali umaa ilau̒udio lomongo wato lei Abraham tou̒ tio donggo tumutumulo.
16Lapatao̒ tei Abimelekh malo loi̒ya mao̒ odelei Isihaka, “Ponao̒lo monto lipu lami. Yio̒ malebe mao̒ okawasa wolami.” 17Oditolio malonao̒ tei Isihaka wau lotitikema mota to Lumbaya lo Gerar. Mota teto tio lotibiluloa̒ dengolo wakutu mola hiheolio. 18Tio luli longau̒udeo̒ aa̒a-liyaalo umaa ilau̒udio to jamani lei Abraham wau umaa tilambula wolo huta lotau Pilistin tou̒ tei Abraham yilate mao̒. Aa̒a-liyaalo boito yilohialio tanggulo u tutuuwauwa debo odelo uilohi mao̒ liyamolio.
19Mongo wato lei Isihaka helo ngau̒udeo̒ ali to Lumbaya lo Gerar boito wau loo̒dungga taluhu malo odito daatalio. 20Bo mongo diti to Gerar helo hahaamawa wolo mongo diti lei Isihaka. Uali mongolio, “Taluhu botie olami.” Kalana uito tei Isihaka lolanggulao̒ ali boito “Polohaamawa”.
21Mongo wato lei Isihaka helo ngau̒udeo̒ ali uwewo poli, yi malo toduwolo mola polohaamawa pasali lo ali boito olo. Sababu uito, tei Isihaka lolanggulao̒ ali boito “Polomuusua”. 22Lapatao̒ tio lolimbatao̒ lonteto wau longau̒udeo̒ ali u otolulio. Pee̒enta botie diila helo toduo polohaamawa. Sababu uito, tei Isihaka lolanggulao̒ ali boito “Obeebasi”. Ualio mao̒, “Botia Eeya malongohi mai olanto obeebasi u motibiluloa̒ tolipu botie, wau ito mamowali maa̒muru tewe.”
23Lapatao̒ tei Isihaka lomonggato wau leidungga mola to Bersyeba. 24Tou̒ hui boito Eeya lopobilohei batanga to olio wau lotahuda, “Wau̒-wau̒lo Allahu Taa̒ala li paapamu Abraham. Diila mao̒ oohe; Wau̒ moduo̒lai olemu. Wau̒ mamo balakati mai olemu wau mongohi mai to olemu wali u dadaata sababu danti-U̒ to wato-U̒ Abraham.” 25Lapatao̒ tei Isihaka malo potihulo mesba wau helolubo Eeya to tambati boito. Tio lotikema mota teto wau mongo watolio helo ngau̒udeo̒ ali uwewo.
Daantia to wolota lei Isihaka wolei Abimelekh
26Tou̒ dulahee tuwau malonao̒ mai tei Abimelekh lonto Gerar, wolei Ahujat, tamoo nasehatia olio, wau tei Pikhol, eyanggu lo suludadulio, mai lodunggaya wolei Isihaka. 27Yi malohintu mao̒ tei Isihaka, “Yilongola timongoli mai modunggaya wolaatia botia, lebe-lebe pomao̒ omoo̒molu mai timongoli helomusu wau lopohinggi olaatia lonto lipu limongoli?”
28Lapatao̒ timongolio lolametao̒, “Botia maa ilotaawa lami deu̒ Eeya moduo̒lai olemu wau toheemati lami opiohelio ito mohutu daantia. Potadiyalo 29deu̒ yio̒ diila tamohutu u moleeto ode olami, debo odelo ami olo diila pee̒enta mao̒ helohutu mai u moleeto to olemu. Ami mailopii̒li mopiohe to olemu wau mopoluli mao̒ olemu monao̒ wolo dame. Malo patatao̒ to olami deu̒ Eeya lobalakati mai olemu.” 30Lapatao̒ tei Isihaka lohinta mao̒ olimongolio, wau timongolio lolamela wau longilu. 31Loloombulio mola didimodupo ngota-ngota lohulitao̒ danti u silaaha wolo tadia. Lapatao̒ tei Isihaka loloi̒ya mao̒ moa̒ahu to nonao̒ limongolio wau malobuua̒ya timongolio odelo sahabati.
32Todulahee boitolo mongo wato lei Isihaka lonao̒ mai lopo duloheo̒ to olio pasali lo ali u maa ilau̒udu limongolio. Uali mongolio, “Ami maloo̒tapu taluhu.” 33Lapatao̒ tei Isihaka lungunte mao̒ ali boito “Tadia”. Ui-uitolo asaliilio lokota boito ilunte Bersyeba.
Mongodile lei Esau lonto suku bangusa deli
34Tou̒ tei Esau o umulu wopato pulu lotaunu, tio lonika wolo tadulahu duulota lonto suku bangusa lo Het, deu̒yito-yito ti Yudit walae̒e Beeri, wau ti Basmat walae̒e Elon. 35Mongobua duulota boito helo poo̒suusa tutumulo lei Isihaka woli Ribka.
Currently Selected:
ILOOWALI 26: LAIGOR
Highlight
Share
Copy
Want to have your highlights saved across all your devices? Sign up or sign in
