ILOOWALI 34
34
Ti Dina pilolo-kosaalio
1Tou̒ dulahee tuwau, tidina walae̒e Yako taabua lonto oli Lea, lonao̒ mota ode ngoolo lota mongobua lo Kanaa̒n. 2Tou̒ tei Sikhem, walae̒e Hemor taulo Hewi talowali olongia tolipu boito loo̒onto mao̒ oli Dina, mapilo tetei̒o tadulahu boito, tulusi pilolo-kosaalio. 3Bo tio ohilaa daa̒ toli Dina, tilinggula lodehu hilaalio to olio, wau helo tolopani mao̒ alihu tadulahu boito motohilaa olio olo. 4Ualei Sikhem to liyamolio, “Halapuo lowatia ti Paapa motolopani mao̒ u moo̒tapu mai tadulahu boito ode laatia. Watia ohilaa modiilea wolio.”
5Tei Yako loo̒dungohe deu̒ walai̒o malopo aibu batanga lo tadulahu boito, bo kalana mongo walai̒o donggo hemodaha bibiahio tohuta udatahu wau luasi, tio diila lowali lohutu mao̒ penu boli wolo tou̒ timongolio diipo lohualingai.
6Tei Hemor, tiyamo lei Sikhemi, malonao̒ mai odelei Yako ohilaa moheeluma wolio. 7Pasipasi tou̒ boito mongo walae̒e Yako malo hualingai lonto huta udatahu wau luasi. Loo̒dungohe polou̒tiya boito, timongolio iloohea wau maloingo daa̒. Sababu wolo lopolokosa walae̒e Yako boito, tei Sikhemi malohina ngoa̒amila taulo Isirai̒lu. 8Ualei Hemor odelei Yako, “Walao̒ watia tei Sikhem malodehu hilaalio to walao̒onto; halapuo laatia alihu Wutato mopoluasi mao̒ walao̒ watia modiilea wolio. 9Duloolo ito moa̒kolowapo deu̒ bangusa lo Wutato wau bangusa lamiaatia monika uu̒ulambohe. 10Yi mongo wutato mowali motibiluloa̒ pee̒-pee̒enta wolamiaatia tolipu botie; tou̒toonu u otohilaa lo Wutato. Mongo wutato mowali modaahangi bebasi wau motolo miliki mao̒ halata upango.”
11Lapatao̒ tei Sikhem loloi̒ya mao̒ ode liyamo li Dina wau mongo hulangio, “Poo̒poluwalo mai hihiile lowatia botie, yi watia mamongohi mai penu boli wolo u otohilaa limongoli. 12Poleleyalo mai palaseni wolo u otohilaa limongoli, wau tantuwalo mai tonelolio. Watia mamongohi mai wolo u pohile limongoli, asali timongoli mopoluasi mao̒ olaatia modiilea wolo tadulahu boito.”
13Sababu tei Sikhem malopo aibu batanga li Dina tawaliyali limongolio, yi mongo walae̒e Yako malo himbulo mao̒ odelei Sikhem wolei Hemor tiyamolio. 14Uali mongolio ode taduulota boito, “Amiaatia moolito mopoluasi mao̒ tawaliyali lamiaatia monika wolo taa u diila tutuuna. 15Bo mowali akolowa lamiaatia hihiilemu boito wolo danti tuwau, deu̒yito-yito: Timongoli musi mowali debo odelo amiaatia, boliilio mao̒ ngoa̒amila mongo lolai̒ towolota limongoli musi tunaalo. 16Lapatao̒ uito Amiaatia maa̒kolo patujumu pasali lou̒ nika mou̒ulambohe boito. Amiaatia mamoti tatapu tohuungi mongoli wau mowali ngobangusa walimongoli. 17Bo wonu timongoli diila mohuto mololimo dadaa-ntiyaalo lamiaatia, wau diila mohuto tunaalo, mamuli hamaa lamiaatia tadulahu boito wau monao̒.”
18Tei Hemor wolei Sikhem molaasa dadaa-ntiyaalo boito paatuti, 19wau tei Sikhem hua̒a lotidapato lopoo̒polu mao̒ danti boito, sababu tio ohilao toli Dina. To wolota ngoa̒amila kaumu ngalaa̒lio, tei Sikhemilo tao̒ pongaaru daa̒.
20Lapatao̒ tei Hemor wolei Sikhem malonao̒ mota ode tambati lo dudunggaya to huhebu hulubangi lokota, wau helo bisala mao̒ ode ulipu lokota limongolio, odie, 21“Tau-tauwalo Isirai̒lu boito sahabatinto. Oditolio huliyalo mao̒ timongolio motibiluloa̒ tolipu botie pee̒-pee̒enta wolanto wau bebasi monao̒ penu boli deu̒toonu u otohilaa limongolio. Lipu botie totoonggade luasilio duo̒lo olimongolio olo. Ito mowali monika wolo mongo dulahu limongolio, wau timongolio olo mowali monika wolo mongo dulahunto. 22Bo tau-tauwala boito bo mohuto motibiluloa̒ pee̒-pee̒enta wolanto wau mowali ngobangusa wolanto wolo danti tuwau, deu̒yito-yito: ngoa̒amila mongo lolai̒ to wolotanto musi tunaalo debo odelo timongolio. 23De ngoa̒amila himbala lo binatangi limongolio wau totoonulalo halata limongolio mowali hakuunto. Oditolio duloolo akolowanto mao̒ hihiile limongolio alihu timongolio motibiluloa̒ pee̒-pee̒enta wolanto.” 24Ngoa̒amila ulipu lokota tahi ambua boito akolo topatuju lei Hemor wolei Sikhem, lapatao̒ ngoa̒amila mongo lolai̒ tamalei daa̒ tokota boito tilunaalio.
25Tolo hui mola lapatio mao̒, tou̒ mongo lolai̒ boito donggo hingongota kalana tilunaalio, duulota walae̒e Yako, deu̒yito-yito tikaaka li Dina tai̒lunte Simeon wolei Lewi, malohama wamilo limongolio, tulusi wolo poo̒-poo̒oyo tilumuwota mota ode delomo kota. Lapatao̒ timongolio helomate yila-yilateelo mao̒ ngoa̒amila mongo lolai̒ mota teto, 26leituwoto olo tei Hemor wolei Sikhem. Lapatao̒ timongolio malohama oli Dina lonto bele lei Sikhem wau lonao̒. 27Lapatao̒ polo ngolota boito, mongo walae̒e Yako wewolio helo lambata kota boito odelo polontuli niyati moleeto limongolio kalana tawaliyali limongolio mapilo poa̒ibu batangalio. 28Timongolio helohama himbala batade himba, sapi, kolodai, wau totoonulalo uwoluo todelomo kota wau tohuta udatahu wau luasi. 29Timongolio lohama ngoa̒amila balangi u ohalaga, lolawalo ngoa̒amila mongobua wau tau̒kekeei̒, wau lolambata totoonulalo tuango bele tokota boito.
30Tei Yako loloi̒ya mao̒ odelei Simeon wolei Lewi, “Timongoli malo poo̒suusa olau̒. Botia taulo Kanaa̒n wau taulo Peris wau ngoa̒amila tuango lipu botie mamolonua̒ olau̒. Taunto diila dadaata; wonu tuango lipu boito ngoa̒amila moheehea̒ wau moluhu olau̒, yi ngoa̒amila ngalaa̒anto mapo binasaalio.”
31Bo timongolio lolametao̒, “Amiaatia diila mowali mopoluli mao̒ tawaliyali lamiaatia hepilo hutulio debo odelo tasuuntali.”
Currently Selected:
ILOOWALI 34: LAIGOR
Highlight
Share
Copy
Want to have your highlights saved across all your devices? Sign up or sign in
