KEJADIAN 16
16
He Hagar eak Ismael emberegen hilingitukwa wene
1He Sarai Abram agwe a'nogo omalik tati'lek welagaikhe. Meneat he, at amingmingengge hele yenggerek fano mene aiba Mesir mene enu Hagar welagaikhe. 2A'nogo were'ma, at he Sarai nen Abram mel yagatikhe: ”Nineisena Tuhan nen omalik ekhe takhagain endawimo anggili'logo lek andi nen he, hat he an namingmingengge yi nen omalik ekhe an faget tasuagen he, hemberek nogo ini o,” iluk yagatikhemo, at Abram en fano isikhe. 3A'nogo isukwa andi, Abram ebe o Kanaan wagaikhesik 10 tahun welagaikhesigen, at he Sarai nen, amingmingengge he Hagar Abram agwe logouwageluk wogetikhe. 4A'nogo wogetikhesik, Abram he Hagar a'nogo emberek nogo isukwama re, omalik a'ma agaikhe. A'nogo meneat he, at he Hagar omalik a'ma aga mene a'nogo elu agaikhesik, fogerakhikhi logolik he, ”He Sarai elo'lek,” iluk anggasikhe.
5A'nogo anggikhi lagaikhemo, at he Sarai nen Abram mel yagatikhe, ”He Hagat he, an namingmingengge mene hat wokheti a'nogo meneat he, at omalik a'ma aga elu agasik he, an endawimo sebelogo nobagali'logo o. Sebelogo nobagali'logo andi re, ero hat weak oba o. Wene yi faget at Allah nenat halnisoago,” iluk wenagetikhe.
6A'nogo wenagetikhemo, at Abram en he, ”Fano, at faget he, hat hamingmingengge atma honggwaregenat iginmo re, hat hendawimo hamolo anggegen higithogoat hilingi'no o,” iluk yagatikhemo, at he Sarai nen he, he Hagat wiik-weakhogo hilingfesikhemo heise wulifikhe.
7A'nogo heise wulifikhesik, o leimo afuni le'ma enu Syur lagaikharek oba andoma i elesi wulibi wagarek oba lagaikhesik were'ma, At Tuhan agot malaikat mene ekhe oba pi wagaikhe. 8A'nogo pi wagaikhesik, mel yagatikhe: ”He Hagar Sarai amingmingengge mene yi, nerei e. Hat hebe o koma nen, o koma lagaluk?” iluk yagatikhemo, at he Hagar en he, ”An he, noe Sarai aiba nen heise wagi o,” iluk yagatikhe.
9A'nogo yagatikhemo, at malaikat a'nogo nen he,
”Hambotkwe he Sarai oba lambik,
at lebethikhi logoino o,” iluk yagatikhe.
10A'nogo yagatikhesik, ekhe mel yagatikheat:
”An nen he, haren tagongge mene inebe mondok hokhorogo,
afuni nen inenggi wenaginabu elo'lekhogo wokhesigin o.
11Hat heak ha'ma ari, ebe ap takhagain o.
Takhambik, hat le agunem heisena Enupogot esanggo holhe andi nen he,
enu Ismael salino o.
12A'nogo takhagain meneat he,
heak andi obabut he,
wam keledai enda'ma mene
obabut weak mene hangge logogin o.
At he, ogogwi agoromi mondogat inom
mondok heksek were'ma,
afuni inebe lombogen at wasuogeluk igik,
aren inebe lombok inoasigeluk igik,
inom mondok weak logogun o,” iluk yagatikhe.
13A'nogo yagatikhemo, at he Hagar endawimo nen he, ”Allah fetnarek welagarek mene neilenggen eberogoat higi o” iluk anggasikhesik mel isikhe: ”Neisena Tuhan Allah nen eberogoat fetnarek logolik yaganeti lagama o,” iluk isikhe. 14A'nogo isikhe andi nen, i mogoma o Kades honggolek Bered honggolek andi faget afuni nen he, mel agarek: ”At eluk mondok logolik an fetnarek welagarek mene agai moge,” iluk enu Lahai-Roi agarek.
15At he Hagar a'nogo hilingitikhesik, eak ap takhasikhemo, eisena Abram en enu Ismael salhikhe.#Gal. 4:22 16Andem sambul he, Abram ebe umur 86 tahun welagaikhe.
Currently Selected:
KEJADIAN 16: inohap
Highlight
Share
Copy
Want to have your highlights saved across all your devices? Sign up or sign in
