KEJADIAN 23
23
He Sara a'nogo wa'lagaikhemo ebe salugun oba iluk Abraham en kweang onggo palhikhe wene
1-2He Sara a'nogo umur 127 tahun welagaikhesik o Hebron Kanaan kweang oba andoma nen wa'lagaikhemo, hun Abraham agwe wa'lagaikhe mene a'nogo faget endawi ou en he, le agu welagaikhe. 3A'nogo welagaikhesik Abraham agwe warek a'nogo fuluk afuni it inunggulenu Het mene o kweang andomaba welagaukwa mene inambit lagaikhesik yagaisikhi logolik, 4”An he, nebe pok nagun hinanggele'ma yoma welagimo re, an nagwe warek saligin oba kweang ekhe onggo paligen yagane'ni o” iluk yagaisasikhe.#Kis. 7:16; Ibr. 11:9, 13
5-6Yagaisasikhemo, iren onggo yagati logolik, ”Nit ninanggele'ma melalninabuageluk ninoe homame mene hat welagenma, nit ninebe mondogen ninagaiyekhogo hat hagwe saligin oba kweang wokhesugun o. Andi nen hat ninoe hagwe re niren afuni wa'lagunem salinaforek oba obalik mondok fanoma fisogo welago meneba salinogen,” iluk yagatukwa. 7A'nogo yagatukwama, at Abraham menlagaikhesik eindep awi yagaisogo it Het inap inawe a'ma soma isikhesik yagaisikhi logolik, 8”Hit nagaila'lak hinendawi fano nen, an nagwe yoma saluak anggegep halok he abo Efron hun Zohar amlogo a'nogo yagasi lani. 9Yagasi logoin halok, aren o Makhpela oumo eabu esanggoma werek mene a'nogo onggo wanigin ikhe halok he, oumo andi an onggo palimbik eise asiogen he, onggo mondok-mondogat fagain o. Nen ebe hit agaila'lak hineil werek kwelek yaat, an at oba onggo paligin he fano,” iluk yagaisasikhe.
10A'nogo isukwa andem oba, at Efron ebe re it Het inap a'nogo inom o kota kwe ambe pale'ma andoma afuni kabogetarek oba hurek welagaikhe. Hurek logolik afuni andoma welagaukwa mene omanogo ineilhanem aren onggo ikhi logolik, 11”An nagaila'lak, nerugwi ninunggulenu misik mene ineilhanem ikhi lagi andi. Yabu andi inom, oumo andi inom he hat ninoe nen hagwe salinogen wokheti lagi o,” iluk yagatikhe. 12Yagatikhemo at Abraham a'nogo ap Het mene a'nogo a'ma eindep awi yagaisogo hai watikhe. 13It afuni Het inap a'nogo inom, inesanggo holek werek kwelek he Abraham en at Efron a'nogo yagati logolik, ”An nane igin mene yi hesanggo holino. Yabu andi abirengge an onggo palambik nagwe andoma saligin enggere, uang yabu onggo ari helan,” iluk yagatikhe. 14-15Yagatikhemo at Efron nen onggo ikhi logolik, ”Kweang huli we misik andi re onggo perak abirengge mene 400 nen hilingi'mo andem faget he nemberek minggilumo higit anggegen? Lego, we hat ninoe hagwe andem saligin fano,” iluk yagatikhe. 16A'nogo yagatikhemo at Abraham en, onggo ikhe mene andi fano anggasikhesik, at Efron nen isikhe mene a'nogo it yi mene ti mene yatma hunisi lagaikharek inaben kilo walhugunggeba walet hasikhe. Walet hasikhesik afuni Het mene a'nogo ineilhanem uang perak 400 a'nogo Efron wogetikhe.
17A'nogo onggo palhikhemo kweang yabu faget inom, oumo a'nogo inom, e wilibik mene inom, nen, e huli-hulimo wilibik mene inom, hun Efron ogoi o Makhpela, Mamere nen mo lagai wagarek fikhit welagaikhe mene mondogat, huli andiba nen at Abraham mene hilinglagaikhe andi. 18It afuni Het mene o kota kwe ambe pale'ma kabogesi lagaukwa mene omanogo inebe mondogaren kweang andi eberogoat Abraham anggweang aga iluk fagetukwa.
19A'nogo hilingitukwasik at Abraham en agwe Sara warek a'nogo Makhpela oumo o Kanaan kweang oba aremnogo salhukwa. 20Andiba kweang inom, oumo inom, attak it ap inunggulenu Het mene eisewerek welagaikheba nen, Abraham mene afuni salinafuba agaikhe.
Currently Selected:
KEJADIAN 23: inohap
Highlight
Share
Copy
Want to have your highlights saved across all your devices? Sign up or sign in
