KEJADIAN 24
24
Ishak agwe wogetukwa wene
1Abraham ebe mondogat yaman agaikhe. Nen, Tuhan nen Abraham oba yi aple ti aple hilingitunem fano nek hilingfikhi lagaikhe. 2A'nogo fanoratu were'ma inenggi ekhe sambul at Abraham en he, at amingmingengge inoe mene Abraham angge yi mene ti mene enggiba logolik wene lenggalhi lagaikhe mene andi mel yagatikhe: ”Henggi nago fena honggolek fena honggolek kwelakfein o. 3Kwelakfembik he, Tuhan Allah pogot kweang enggiba welagarek mene a'nogo enuba hombuk mel iluk palin: An nen Abraham amlogo Ishak agwe afuni o Kanaan yoma mene herasigin lek. 4We, nambotkwe hat hebe ta'lagagin oba hoe hagot mene halok heragesi lagain o, iluk hombuk palin o,” iluk yagatikhe.
5A'nogo yagatikhemo, amingmingengge a'nogo nen he, ”He andi nen, an naiba herakfisaluk hat hombo'ne o andoma lagain he, nabit, iluk ikhe halok ninggi'nogo hilingisigin. Hat hamlogo ebe waluk hat haiba hebe ta'lagagin oba andoma lagain a? Lega?,” iluk heinok wokhasikhe. 6A'nogo heinok wokhasikhe meneat he, at Abraham en he, ”An namlogo ebe waluk o andoma logoin he, mondok nabiro. 7Tuhan Allah pogot enggi fisogo welagarek mene a'nogo nen he, neisena aiba nogogwi nagoromi were'ma andoma nen wo'narek wulibi waga logolik, o welagoba yoma faget hombuk palogo yi'nogo yaganetikhe: O andoma haren tagongge mene wogisagain, iluk yaganetikhe mene a'nogo nenat, haren he an namlogo agwe o neisena aiba andoma mene waluk we'nogen iluk, malaikat ekhe hoba lakfei wagunem lebetheagain aro. 8He andi nen hat hombo'ne wesigin he nabit ikhe halok, Allah enu hombuk paligin mene andi hoba selegaro. Ma re, an namlogo mondok waluk lagain lego,” iluk yagatikhe. 9A'nogo yagatikhemo, ap amingmingengge a'nogo enggi Abraham ago fena honggolek fena honggolek kwelakfesikhesik he, Abraham en wene yagatikhe mene higithogoat hilingisigiluk hombuk palhikhe. 10Hombuk palhikhesik he, amingmingengge a'nogo nen wam unta eisena Abraham mene 10 nen inom, yi mene ti mene onggo hokho mene ekhe inomat wanhikhesik he, ap Nahor ebe eluk logolik welagaikheba o Mesopotamia nen abel ponggwe andoma lagaikhe. 11Arat lagaikhesik, o kota esanggoma andoma i mogo habuli'mo hinagaisogo nenggarek oba andoma asi lagaikhesik, set warageluk wam unta omanogo andoma kamo uageluk yagatikhesik welagaikhe. Were'ma o arat hu'mo agaikhemo hemi i andi hinasi waga lagaukwa higit oba asi wagaikhe. 12Asi wagaikhemo, Abraham amingmingengge a'nogo nen samban yi'nogo isikhe: ”An noe Abraham eisena Tuhan Allah, neisena. Hat at ebe hendawirogo welagendek a'nogo nen, hobuk hendawi asimbik, an herarik wagi a'nogo, tip uageluk kino yagaheti o. 13Helime yenggerugwi o kota nen i mogoma hinatarek oba hinasuogeluk wesugun higit werek kwelek, an i mogo habuli'mo yi hurek welagi yi heilenggen nean o, neisena. 14It helime yenggerugwi andi wagunem he, an nen hele silerik ekhe mel yagasigin: Hele yi, na'logo e. Hagai oak oba i ekhe hina'nom o, iluk yagatunem aren he, hat hebe hinakhesumo nunggunem he, hanggo unta andoma ekhe noagen he, hinagisagain aro, iluk ikhe halok, neisena Henupogoren hamingmingengge Ishak faget, he andi heragaisogo wo'neten higi, iluk anggagain o. Andi eberogoat hilinglaga halok neisena Henupogoren noe Abraham hendawi hundik welagendek a'nogo nen hendawiraten, iluk anggagain o,” iluk yagatikhe. 15-16At samban a'nogo ugunem hele Ribka ebe fano mene ap woginafi'lek hele silerik oan were'ma i oak omoloba waluk i mogoma a'nogo wagaikhe. At Ribka eisena re, enu Betuel, nen Betuel eisena re Nahor, nen agaisa re Milka. Nen, at Abraham oe Nahor andi. Ma re, hele a'nogo i mogoma hinatikhesik he, ambotkwe lageluk isikhe. 17A'nogo lageluk ugunem he, at Abraham amingmingengge humusek era'lu wagaikhesik he, mel yagatikhe: ”Hele yi, na'logo e, i hat hagai oak oba hinago mene an ekhe wo'nom o,” iluk yagatikhe. 18A'nogo yagatikhemo, at hele a'nogo nen he, ”Neisena, ekhe nanogo,” iluk yagatikhesik, i hinago omoloba nen weak-weagat korokhogo pelakfei wagaikhesik he, i oak enggi fisogo logolik Abraham amingmingengge a'nogo noageluk wogetikhe. 19Wogetikhemo, arat nasikhemo re, at hele Ribka nen he, ”Hat hanggo unta andoma mondogat i inalabut ninghogo noagen he, ekhe hinagisagain aro,” iluk yagatikhe. 20A'nogo yagatikhesik, i o'lumo aremnogo wam unta i nagain oba keisalogo fuluk he, ambotkwe i mogo habuli'mo hinagaisogo nenggarek oba a'nogo humusek lagaikhesik he, wam omanogo mondogat i noageluk hokhorogo hinatikheat. 21At a'nogo hilingitu kwelek, Abraham amingmingengge a'nogo aneba igi'legat he, endawimo nen futfikhi lagaikhe. Futfikhi logolik: ”Tuhan nen lebetneamo an herarik wagi a'nogo ebe tibigin a? Sugwi asigin a?” iluk elu asigiluk eil wanhi lagaikhe.
22At hele a'nogo nen wam unta omanogo mondogat i wogisasikhemo inalabut ninghogo nasukwama re, at Abraham amingmingengge a'nogo nen alilingge emas onggo hokho mene ekhe wanhikhesik he, hele silerik a'nogo ambisang oba punu watfigik, senggan emas mene ekhe enggiba ikfigik, isikhe. 23A'nogo ikfesikhesik, hele a'nogo mel yagatikhe: ”Hele yi na'logo e. Hat heisena re sa nogo, yaganom. Nen, heisena aiba andoma an nagoromi ninom nogo ugun oba werega? Lega,” iluk yagatikhe. 24A'nogo yagatikhemo, aren he, ”An neisena enu re, Betuel. At eisena enu Nahor, agaisa enu re, Milka. 25Nen, nit ninaiba re, hit hinebe nogo ugun oba inom, wam esabolengga inom, inamburu nogoin mene inom werego,” iluk yagatikhe. 26A'nogo yagatikhemo, at Abraham amingmingengge a'nogo eindep awi yagaisogo Tuhan fogerati logolik he, mel isikhe: 27”Noe Abraham eisena Tuhan fogethafi lagi o, neisena. Haren wo'narek noe Abraham ogogwi agaila'lak inaiba yoma wagendik, an noe ane hologo hendawi hundik welagendek a'nogo nen hendawiraten hiigi o,” iluk yagatikhe.
28Hobuk at hele silerik a'nogo humusek eisena aiba lagaikhesik wene hilinglagaikhe mene a'nogo mondogat yagaisa lagaikhe. 29-30Hele Ribka oe enu re Laban. At Laban nen he, wene Abraham amingmingengge nen isikhe mene agoren yagatunem esanggo holhikhesik, agot alilingge ambisang oba inom, enggiba inom, kwelabek were'ma hasikhe. A'nogo hasikhesik, oloba nen humusek wulibi wagaikhesik, Abraham amingmingengge a'nogo emberek ambi asuogeluk wagaikhe re, Abraham amingmingengge a'nogo nen wam unta omanogo fisogo i mogo habuli'mo hinagaisogo nenggarek oba a'nogo era'luat were'ma wagaikhe. 31Wagaikhesik he, mel yagatikhe: ”Neisena, hat he, Allah nen fanothabi'logo mene hiigi o. Halok hat o enda'ma yoma logogin lego. An naiba louwogo. An naiba re, hat hebe faget inom, hanggo unta faget inom, o arat tegelogo fogoma werego,” iluk yagatikhe. 32A'nogo yagatikhesik, at Laban emberek aiba lagaukwa. Lagaukwasik, at Laban nen yi mene ti mene wam unta amboroba hele homak fesukwasik waluk lagaukwa mene omanogo lologo pelak fesukwasik he, esabolengga talfigik, sumburu wogetik, isukwa. A'nogo hilingitukwasik, Abraham amingmingengge a'nogo inom, afuni at inom lagaukwa mene inom, ineisok ebene sobalinabuogeluk i waluk wagaukwa. 33Waluk wagaukwasik, sumburu inahenengge isagisasukwama re, at Abraham amingmingengge a'nogo nen he, ”An wene warogo laknobagai wagaikha mene yagahisigi'lek sumburu tak nagain lego,” iluk yagaisasikhemo, at Laban nen he, ”Wene andi yaganisan o,” iluk yagatikhemo, 34at Abraham amingmingengge a'nogo nen wene eroba nen pilingisogo yagaisikhi logolik he: ”An he, Abraham amingmingengge mene wagi o. 35Neisena Tuhan nen he, an noe andi mondok fanotfigik, ebe mondok kainet figik, angge yi mene ti mene mondok hokhorogo hilingisogo figik, ikhemo. Nineisena Tuhan nen wogete mene re, wam domba inom, kambing inom, sapi inom, unta inom, keledai inom, uang perak mene inom, emas mene inom, afuni at amingmingengge logouwageluk ap inom, hemi inom, wogetikhemo werego. 36Nen, an noe agwe Sara andi ebe mondok yaman oba eak ap tatikhemo re, an noe nen angge yi mene ti mene andi mondogat amlogo wogete. 37-38Ma re, an noe andi nen he, an nen yagahesigin mene nane hologo hilingi'nogen he, hombuk mel palino: Hat hamlogo agwe helime silerik o Kanaan mene yoma ekhe herasigin lego. We, heisena ogogwi agoromi a'lima mene herasi lagen he, weak-weagat lagain o, iluk hombuk palin, iluk yaganete. 39A'nogo yaganetemo, an nen he, hele andi an nombo'ne wagi'lek kamo ikhe halok he, ninggi'nogo hilingisigin, iluk heinok wokhigimo re, 40aren he, haren, he andi elok waluk we'nogen iluk an neisena Tuhan ane hologo hilingitirek mene a'nogo nen agot malaikat ekhe hoba lakfei wesigin o. Lakfei wesumo, aren lebetheamo re, ebe asigin. An namlogo agwe ogogwi agoromi a'lima mene ekhe hemberek ambi asugun aro. 41Mene re, haren yagaisagain mene iren wokheti'lek halok, haren hombuk paligin mene andi hoba selegaro, iluk yaganete.
42A'nogo yaganetemo, hombuk a'nogoat palhi. Palhirik waga lagarik, i mogo habuli'mo hinagaisogo nenggarek oba wagarik, samban nendawimo nen ugu welagi:
Noe Abraham eisena Tuhan Allah neisena. Haren he, an he herarik wagi a'nogo wo'nom o. 43An he, nebe i mogo habuli'mo hinagaisogo nenggarek oba esanggoma yaat mendek were'ma, hele silerik ekhe i hinasigiluk waga halok, i ekhe wo'nesuageluk kino yagasigin o. 44An nen kino yagatunem, aren, I o, iluk hilingiti logolik, an mene wam unta inomat i wogete halok, neisena Tuhan an noe amlogo agwe heragaisogo wogeten mene ebe yiat higi, iluk anggagain o, iluk yagati. 45Samban nendawimo nen a'nogo ikhi lagarik oan elugun warogo igi'le'ma, at hele Ribka iwak omoloba waluk lagasik he, i mogoma a'nogo hinasi kwikhe. A'nogo hinasi kwikhemo an nen he, hele yi na'logo. I ekhe nagen he, wo'nom o, iluk yagati. 46A'nogo yagatimo, aren weak-weak iwak omoloba nen kobokhogo pelakfei wagasik he, mel yaganete: Ekhe nan o. Hat nenggen halok he, hanggo unta oma ogo noageluk wogisagain aro, iluk ikhesik an nebe wo'netemo arat ninggimo re, nanggo unta ogo wogetemo nengga aro. 47A'nogo arat hilingitemo nen, an nen he, Hat heisena sa, iluk heinok wokhigimo re, aren he: An neisena re, Betuel, Nahor amlogo. Nen, at agaisa re Milka, iluk yaganetemo, an nen he, alilingge emas mene ambisang oba punu watfigik, senggan enggimo ikfigik, igi. 48A'nogo ikfigirik, neindep awi yagaisogo noe Abraham eisena Tuhan Allah hai watik, fogeratik, igi. At Allah nen an noe ogogwi agoromi noba yoma wo'narek wagama re, hele yi an noe amlogo agwe arat nemberek ambi ago o. 49Hiren he, at oe andi, ebe nit mene, iluk at faget wene fanorogo igik, fano hilingfigik, ugun anggegep halok he, yaganesugun aro. A'nogo yaganesugun elo'lek halok he, an ninggi'nogo hilingisigin, iluk nendawimo senggerogo yaganesugun aro,” iluk yagaisasikhe.
50A'nogo yagaisasikhemo, it Laban Betuel emberegen he, mel yagatukwa: ”Wene hilinglaga mene egen andoma, At nineisena Tuhan Allah nen hilingitesi'mo re, niren wene yi'nogo ti'nogo ekhe ugun mondok elok lego. 51At hele Ribka ebe yi werek yi re, At nineisena Tuhan onggwaregen ikhe hagat hat hoe amlogo agwe asuagen he, hemberek lobagaigen o,” iluk yagatukwa. 52Yagatukwama wene andi at Abraham amingmingengge a'nogo esanggo holhikhesik he, eindep awi yagaisogo Allah fogeratikhe. 53Fogeratikhesik, su inom, inalilingge perak mene inom, emas mene inom, mondogat hele Ribka a'nogo wogetikhe. Wogetikhesik he, Ribka oe inom, agaisa inom yi mene ti mene onggo hokho palharek mene ekhe wogisasikheat.
54A'nogo arat wogisasikhesigen, Abraham amingmingengge a'nogo inom, afuni at inom lagaukwa mene omanogo, sumburu inom, i inom nasukwasik nogo isukwa. Nogo isukwasik he, ohealekwe o wei isikhemo ineluk agaukwasik he, at Abraham amingmingengge a'nogo nen he, mel isikhe: ”Hat hoe were'ma andoma fano lani, iluk yaganisani o,” iluk yagaisasikhe. 55A'nogo yagaisasikhe meneat he, it Ribka oe inom, agaisa inomen he: ”At Ribka re, minggu misik ogo, ninenggi 10 nen ogo, nit ninom yoma logombigen loak hogo o,” iluk yagatukwa. 56A'nogo yagatukwa meneat he, at Abraham amingmingengge a'nogo nen yagaisikhi logolik he: ”An faknobagagun lego. An herarik wagi mene andi Allah nen arat wo'netemo re, noe oba nambotkwe loageluk laknobagani o,” iluk yagaisasikhe. 57A'nogo yagaisasikhemo re, iren he, ”Ribka endawimo anggikhe mene ekhe yaganisoagen heinok wokhouwogen he, wolhouwogo,” iluk yagatukwa. 58A'nogo yagatukwasik, Ribka wolhasukwama wagaikhemo re, heinok wokhiki logolik he: ”Hat ap yi hemberek logoin hamolo a? Habira,” iluk heinok wokhasukwama re, aren he, ”Nemberek logoin namolo,” iluk yagaisasikhe.
59-60A'nogo yagaisasikhemo re, iren Ribka ebe yethikhi logolik, amingmingengge lebethikhi logogun mene ekhe emberek loageluk, Abraham amingmingengge inom, afuni inom lagaukwa mene inomat, lakfisa wagaukwa. A'nogo lakfisa waga logolik, Ribka Allah nen fanotfikhi logouwageluk mel yagatukwa:
”Ribka halabok. Allah nen fanothafunem afuni mondok hokhorogo inagaisa
hilingla'no o.
Nen, haren tagongge mene nen inaselei mene inawi kota sebelik laga
logouwago,” iluk yagatukwa.
61A'nogo yagatukwama, at Ribka nen he, hemi at amingmingengge logogun mene woginafikhesik he, inom wam unta omanogo amboroba lagasukwasik, Abraham amingmingengge a'nogo inom wagaukwa. 62It oan wagu kwelek, at Ishak o leimo nen lagaikhesik, i enu, ”Aren an lebe'niikheba,” iluk agarek oba andoma lagaikhesik, ebe o Kanaan i ambutmo higit andoma welagaikhe. 63Logolik, enggi ekhe sambul he, o hu'mokwe awi su mene wuri'mo nen sumburu awi yagokwe nikhi logogin iluk wulifikhesik, eilenggen yethasikhe re, wam unta wagunem yethasikhe. 64Yethasikhemo, at Ribka nen ogo Ishak eilenggen yethasikhesik he, wam unta oba nen korokhogo pi wagaikhe. 65Pi wagaikhesik, at Abraham amingmingengge a'nogo mel yagatikhe: ”Ap mene ekhe yabumo nen nit logoin fikhit weri'lago a'li sa,” iluk heinok wokhasikhe. Heinok wokhasikhemo aren he, ”A'li re, an noe igi a'nogo ebe ari o,” iluk yagatikhemo, at Ribka a'nogo su kain mene wanhikhesik he, elokhonggen salfesikhe.
66A'nogo salfesikhemo, at Abraham amingmingengge mene a'nogo nen he, wene hilinglagaikhe mene omanogo pilingisogo Ishak yagatikhe. 67A'nogo arat yagatikhemo, at Ishak en Ribka waluk he, agaisa Sara aiba welagaikheba kwisikhesik he, agwe ikhasikhe. Ikhasikhe andiba, Ishak agaisa wa'lagaikhemo endawimo weak welagaikhe mene re, agwe Ribka helasikheba nen endawimo fano agaikhesik, endawinggen hundik mondok welagaikhe.
Currently Selected:
KEJADIAN 24: inohap
Highlight
Share
Copy
Want to have your highlights saved across all your devices? Sign up or sign in
