LUKAS 1

Lukas nen Teofilus hai watikhe wene

1-2Teofilus noe e. Wene nit ninanggele'ma nen hilinglagaikhe a'nogo, it wene ebe eroba nen hilinglarik wagunem ineilenggen hasukwasik yagaisilik nikhi lagaukwa mene nen yaganisasukwa higithogo, it afuni ekhe inebe mondok hokhorogo nenat wene ebe lisu paluogeluk walhilik wagaukwa. 3-4A'nogo walhilik wagaukwa meneat he, an ogo wene andi eroba nen furogo yanggulhi lagagisik a'luk he, haren wene yagahetukwa mene andi eberogoat iluk angganogen he, wene ebe pilingisogo lisu palogo hoba lakfei wesigeluk anggikhi lagirik palhi lagi yi o. Noe.

Allah nen Yohanes ima pelaginafi lagaikhe mene a'nogo ta'lasigin, iluk abok yagaisasikhe wene

5Ap enupogot Herodes o Yudea oba ferinarek were'ma andem, ap ekhe enu Zakharia, ap Abia nen tagongge mene, inebe imam logolik hilingiti lagaukwa mene, welagaikhe. Nen, at agwe enu re Elisabet, imam Harun en tagongge mene welagaikhe.#1Taw. 24:10 6At agwe emberek andi re, nineisena Tuhan nen he, ”Yi'nogo hilingi'no, ti'nogo hilingi'no,” iluk, yaganisigik, komotninafik, isikhe mene a'nogo, mondok higithogoat hilingiti lagaukwama re, at Allah nen he, ”It andi inobabut fano mondok,” iluk, enegat eilenggen isikhi lagaikhe. 7Meneat he, at he Elisabet andi, ebe abili nen eak ekhe takhigi'lek logolik agun emberegat arat yaman agaukwasik welagaukwa.

8-9A'nogo yaman agaukwasik logolik, inenggi ekhe sambul he, at Zakharia ebe inom, ap ekhe inebe misigat mene inom, Allah eisewerek logolik, iren at Allah awi wuri'mo kwisukwasik hilingisu higit agaikhe. Higit agaikhemo kwisukwasik he, amben fano mene Allah eilhanem sa nen hak nolesi kwigin, iluk oagengge lakfikhi lagaukwa higithogo, at Zakharia lakfugunem oba higit agaikhemo noligeluk kwisikhe. 10A'nogo kwisikhesik nolhu kwelek, afuni hokhorogo o silimo andogorogo samban ugu welagaukwa. 11Amben fano a'nogo mene endu nolhunem he, nineisena Tuhan agot, malaikat pogoroba Allah nen yonggo pelakfisa wagarek mene ekhe pi wagaikhesik amben fano mene nolhi lagaukwaba a'nogo inenggi ebekwe fikhit Zakharia elokhoma menlagaikhemo eilenggen hasikhe. 12Eilenggen hasikhesik he, a'manggen lagaikhesik ailo agaikhemo re, 13at malaikat a'nogo nen he, ”Zakharia! Hailo agun o. Hat samban ikhi lagen a'nogo, Allah arat esanggo holhe o. Hagwe Elisabet andi eak abat takhesigin o. Takhete halok he, enu Yohanes salino. 14-16At andi agaisa alabutmo nenat, Allah Areagun endawimo mondok peterek engge ta'lasimbik he, nineisena Tuhan eilhanem ebe kain logolik, anggur enggen amusu inom, i lugulugwi palharek mene fena inom, ninggi'lek mondok logolik, afuni Israel mene inebe hokhorogo inendawinggen nineisena Tuhan Allah oba himbirik logouwageluk, aren inobabut hebelinabigin andi. At ta'lagunem afuni inebe hokhorogo inendawimo inagaiyek hokhorogo hugu kwelek, hat ogore, hendawimo hagaiyek anggigik, ebe hoba liok igik, igin o.#Bil. 6:3 17Allah Areagun ap Elia endawimo peterogo logolik omamerogo hilingirik nikhi lagaikhe mene andi, at Yohanes andi oba louk imbik, yenggerugwi ineisena lak inom, lambukhogo fisigik, wene inesanggo holi'lagwi lek mene it ekhe wene holiluk higithogo hilingitarek mene inobabut wanuageluk hilinginafik, inebe nineisena Tuhan fagerat logouwageluk tegelogo fisigik, igeluk, at tak ta'lasimbik a'nogo hilingirik nikhi logogin o,” iluk yagatikhe.#Mal. 4:5-6 18A'nogo yagatikhemo, at Zakharia nen he, ”An nagwe nemberek arat yaman agosi'mo re, wene egen andi ninggi'nogo hilinglasigin. Eberogoat hilinglasigin iluk ninggi'nogo nelu asigin,” iluk isikhemo, 19at malaikat a'nogo nen he, ”An Allah eilhanem mendek welagirek mene nenu Gabriel andi re nebe an aro. Fano wene yi yagahesuageluk, at Allah nen yonggo laknobagai wagama wagi o.#Dan. 8:16, 9:21 20A'nogo wagarik wene yagaheti meneat he, eberogoat anggigi'lek andi nen, hilinglasigin higit oba hilinglasigin andi oan hilinglagi'lek werek kwelek he, halonggobak te'merogo hane igi'lek logombigen, hobuk wene andi mondogat hilinglagunemen, hane houwak igin o,” iluk yagatikhe. 21A'nogo yagatu kwelek he, it afuni olulu samban ugu welagaukwa mene omanogo nen he, ”Zakharia a'nogo olulu mondok wulibi wagi'lek Allah awi wuri'mo oloba mondok werek andi nailo e!” iluk a'nogo ugunem, 22Zakharia ebe wulibi wagaikhesik he, weneane ekhe mondok yagaisigi'lek kamo isikhemo, it omanogo nen he, ”Ap yi Allah awi wuri'mo nen abikanggo ekhe hikhemo higi,” iluk futfesukwa. A'nogo ugunem he, at a'nogo ekhe ane mondok igi'lek, we enggi tum piling enek ikhi lagaikhe. 23Allah faget hilingisuageluk it omanogo nen Zakharia yagatukwa a'nogo, arat hilingitikhesik he, oloba lagaikhe. 24-25Oloba lagaikhesik inenggi endebat welagaukwasigen, agwe Elisabet a'nogo omalik a'ma agaikhe. A'ma agaikhemo re, ”Neisena Tuhan andi, an mene endawi nen afuni ninom nenggali hak hikhi lagi a'nogo legasuageluk hilingnafe higi o,” iluk, kwe wulifi'lek oloba hinago mondok werek kwelek, tugi 5 nen folelhikhe.

Allah nen, ”Yesus ta'lasigin,” iluk abok yagaisasikhe wene

26-27He Elisabet a'nogo omalik a'ma werek kwelek, tugi 6 en folelhikhemo re, Allah nen malaikat pogoroba yonggo nikharek mene ekhe Gabriel a'nogo Galilea o sili enu Nazaret, andoma helenggerek enu Maria, ap Yusuf Daud en tagongge mene andi emberek wenago were'ma oba lakfei wagaikhe.#Mat. 1:18 28Lakfei wagaikhemo re, at malaikat helenggerek a'nogo oba wagaikhesik he, mel yagatikhe: ”Maria nerei e! Allah nen fano mondok mene wokhesigeluk hemberek welagebo,” iluk a'nogo isikhemo re, 29at hele Maria a'nogo esanggo holhikhesik, ailo nen oak lei'leik ikhi logolik he, ”Hai warogo yaganete andi ninggi'nogo nen yaganete,” iluk endawimo nen ebetikhe. 30A'nogo ebeti lagaikhemo, at malaikat a'nogo nen he, ”Maria, nerei e. Hailo agun o. At Allah nen endawit hafesik he, hebe oba liok ikhe o. 31Yethan, hat omalik ha'ma asimbik abat tasigin. Tasimbik he, enu Yesus salino.#Mat. 1:21 32Nen, omalik andi alue asimbik kain agunem he, afuni nen he, Tuhan Allah kain welagarek a'nogo amlogo higi o, iluk ikhi logogun. At omba Daud andi enupogot logolik, afuni aren ferinarek welagaikhe a'nogo obali'mo re, nineisena Tuhan nen, at andiat menfagain o.#2Sam. 7:12, 13, 16; Yes. 9:6 33Yakub en tagongge mene omanogo inoe enupogot at andiat awe a'ma ane hologo mondok logogun o. A'nogo ferinarek logolik ebe kain enu pogot mondok-mondok logogin. 34at hele Maria nen he: ”An ap ekhe nonggotma, hat yaganeten andi ninggi'nogo hilinglasigin,” iluk a'nogo isikhemo, 35at malaikat a'nogo nen he, ”Allah Areagun hoba louk i wesimbik he, kunmo kwagarek hak, nineisena Tuhan Allah omame hokho andi awe a'ma hobagagin. Hobagaumo re, heak Allah alegat amlogo tasumo re, afuni nen, At andi Allah amlogo, iluk ikhi logogun o. 36Nen, yethan, hat hoe Elisabet a'nogo ebe yaman aga meneat he, omalik abat a'ma agama o. He andi ebe abili o, iluk, abok agarek a'nogo omalik a'ma agasik tugi 6 en folelhemo yagaheti. 37At Allah nen yi mene ti mene hilingisigin he, elogo. Elok hilingisigin enek,” iluk yagatikhemo re,#Kej. 18:14 38at Maria nen he: ”I o. An Tuhan amingmingengge aro. Haren egen andi higithogoat hilingnabuago,” iluk isikhemo re, at malaikat yonggo wagaikhe mene a'nogo Maria herakfuluk lagaikhe.

At Maria a'nogo nen Elisabet ha lagaikhe wene

39 Malaikat a'nogo lagaikhemo, at hele Maria enggi endebat ekhe welagaikhesigen, o Yudea pisikhesik o tomkwe fikhit andoma lagaikhesik he, 40ap Zakharia a'nogo aiba kwi lagaikhesik he, he Elisabet a'nogo hai watikhe. 41Maria nen hai watunem Elisabet esanggo holhu kwelek aremnogoat he, eak a'ma mene a'nogo muluk hasikhe. A'nogo ugu kwelek, Allah Areagun, he Elisabet endawimo peterogo kwisikhe. 42Kwisikhemo, at he Elisabet a'nogo ane hokhorogoat he, mel isikhe: ”Hemi inebe hokhorogo werek kwelegat he, Allah nen, fano mene harat wokhetik, heak ha'ma andi fanot figik, ikhemo o. 43Nen, hat hebe an noe Enupogot agaisa nen nea wagen yi nailo e! 44Haren hai wa'nafunem nesanggo holhu kwelegat, omalik na'ma mene endawimo agaiyegeti logolik muluk hikhe o. 45Neisena Tuhan nen abok yagahetikhe mene, ebeat asigin o iluk, hendawinggen Allahba himbiret fegen andi, hendawimo hagaiyek hokhorogo hakhagain o,” iluk yagatikhe.

Maria nen Allah fogeratikhe wene

46A'nogo yagatikhemo, at hele Maria nen he,

”Neisena Tuhan andi an

nendawimo nen fogerati lagi o.#1Sam. 2:1-10

47Allah an telnafe mene a'nogo nen

yi'nogo hilingnafemo nendawimo

nagaiyek hokhorogo hikhi lagi o.

48An at amingmingengge mene yi,

inawe a'ma hak were'ma

eilenggen niikhe.

Huli yogondagen afuni mondogaren he,

Allah nen fano mene wogetemo,

iluk ikhi logogun o.#1Sam. 1:11

49At omame hokho mene nenat,

hokho mene hilingnafe o.

At onggwarek amuat enu werek logouwago.

50Afuni mondogat, attak ta'lagaukwa mene inom,

ket ta'lagaikha mene inom, hobuk ta'lasugun mene inom,

at ebe inailo were'ma endawi nen fano hilinginafi logogin o.

51At enggi omame hokho andiba,

afuni inendawimo nen fogerakhili'lagwi mene andi

mondok pugulogo nalek-falek isikhe o.

52Afuni kaindek inenupogot welagaikharek mene

andi sebelogo fisikhi logolik he,

it inenu lek mene andi menfisigik,#Ayb. 5:11, 12:19

53afuni inendawimo nele welagaikharek mene

fano mene oba loukhogo wogisikhi logolik he,

it inenggi werek mene andi, ekhe wogisigi'lek weat lakfisigik isikhe.

54-55Omanggumat nineisena Abraham inom,

aren tagongge mene inom mondogat fanorinabigeluk

abok yagaisasikhe a'nogo higithogo,

at agoromi ap Israel mene inoba ebe'luk endawi nen leberisageluk waga yi o,” iluk isikhe.#Kej. 17:7

56A'nogo isikhesik he, at hele Maria a'nogo tugi henagan hangge, at Elisabet emberek welagaikhesik he, hobuk aiba wagaikhe.

Yohanes ima pelaginafi lagaikhe mene a'nogo ta'lagaikhe wene

57At Maria wagaikhemo nen he, he Elisabet a'nogo eak takhagain higit agaikhemo re, eak abat takhasikhe. 58Eak abat takhasikhemo re, it afuni inom welagaukwa mene ekhe inom, at oe agot inom, ”Nineisena Tuhan nen mondok endawiratesik hilingite higi o,” iluk isukwasik he, at onggwarek inom inendawimo inagaiyegetukwa. 59Inendawimo inagaiyegetukwasik, inenggi 7 nen welagaukwasigen ohealekwe re, omalik a'nogo agap enggalimo mene paluageluk waluk wagaukwa. Wagaukwasik he, Omalik yi eisena enu higithogoat enu Zakharia saluok, iluk isukwa mene re, agaisa nen he,#Im. 12:3 60”Lego! Enu Yohanes salugun o,” iluk isikhe. 61A'nogo yagaisasikhemo, it omanogo nen he, ”Hoe hagot inenu a'nogo le'maat he, enu Yohanes salhen andi nenahalok salhen,” iluk, a'nogo isukwasik 62omalik a'nogo eisena Zakharia a'nogo inenggi tum piling yagati logolik he, ”Enu ki salugun,” iluk 63a'nogo isukwama, at Zakharia nen he, ”Helep lisu palharek mene ekhe wo'ne'ni,” iluk enggi tum piling isikhemo wogetukwama re, ”At enu Yohanes o,” iluk, lisu palhikhe. A'nogo lisu palhikhemo afuni hokhorogo omanogo nen, ”Nailo e!” iluk fogeratukwa. 64Fogeratu kwelek aremnogoat, Zakharia a'nogo ane mondok houwak isikhesik he, ane ikhi logolik Allah hai wati lagaikhe.

65A'nogo hilingitikhemo, it afuni inom welagaukwa mene omanogo inailo hokhorogo agaukwa. Inailo agaukwasik, wene hilinglagaikhe mene a'nogo abok o Yudea tomkwe welagaukwa mene andoma inoba piling-palanghogo yagaisilik lagaukwama wene andi sak-pak isikhe. 66A'nogo ikhi lagaukwama inesanggo holhukwasik he, ”Allah nen omamerogo fanot fikhemo higi,” iluk ineilenggen hasukwasik, inendawimo ebeti logolik he, ”Yenggerek yi alue asimbik he, ninggi'nogo hilingiti logogin,” iluk ikhi lagaukwa.

Zakharia nen wuniba Allah fogeratikhe wene

67At Yohanes eisena Zakharia a'nogo Allah Areagun endawimo peterogo kwisikhemo Allah wene ikhi logolik he, mel isikhe:

68”Nit afuni Israel mene andi nineisena

Tuhan Allah nen eilenggen nisa wagasik

telninafe andi nen he, at fogerati logouwogo.

69Telninabuageluk he, at amingmingengge

Daud en tagongge mene omame werek mene menfikhemo werek yi.

70A'nogo hilingite andi re, it ap attak mene

Allah nenat onggwarek faget fakhasikhemo

wene yagaisikhi lagaukwa mene nen yagaisikhi logolik he,

71it afuni ekhe ninom weim palek mene

inenggimo nen telninafik,

it afuni mondogat inabiret fisili'lagwi mene

inenggimo nen telogo ninobagagik, hilingisigin o,

iluk ikhi lagaukwa a'nogo higithogoat hilinglagaikhe.

72-73Aren ninambulak andi endawi nen

fanorinabigin iluk abok isikhe a'nogo ebe hilinginafik,

Yi'nogo hilinghinabigin iluk, wene onggwaregen

abok yagaisasikhe a'nogo ebe hilingitik igin o,

iluk he, nendawimo eberek logogin o, iluk yagaisasikhe.

Yi'nogo hilingisigin o, iluk hombuk palogo

nineisena Abraham yagatikhe hak hilingisi waga yi.

74-75It afuni ekhe ninom weim palek mene

inenggimo nen telogo re, ninailo agi'lek nineluk logolik,

Allah eilenggen werek kwelek nit weak hilingiti'lek

at faget enek higithogo hilingitik,

ikhi logouwageluk hilingisi waga yi o.

76-77Nen, hat namlogo yi nen,

ninoe Enupogot wesigin kwe yati logouwageluk,

hat attak yonggo laga logolik afuni yi weak ti weak hilingiri'lagwi mene

Allah nen wene inoba mene sebelogo legetfisaluk

telinabigin wene andi Haren yagaisamo inelu asigin andiba,

hat habok ikhi logolik,

Esin welagarek mene awene yagaisilik nikho a'nogo ebe yi aro,

iluk ikhi logogun.#Mal. 3:1

78Nineisena Allah obabut fano nen endawitninafikhesik,

o hil lakfei wagarek andi hak, ninoba lakfei waga logolik,

79O mummo logolik wa'lasu hak andi ninailo,

iluk anggili'lagwi a'nogo o selek hilingisogo fisigik,

ninonggothogo were'ma,

Kwe yiba lamo hinendawinggen hambuk igin, iluk, yaganisigik, igin o,”

iluk, Zakharia nen isikhe.#Yes. 9:1

80Nen, at Zakharia amlogo a'nogo ebe alue agaikhesik endawinggen mondok wurik agaikhesik, afuni Israel mene oan eilenggen isa lagi'lek logolik he, o leimo afuni mondok le'ma andoma welagaikhe.

Currently Selected:

LUKAS 1: inohap

Highlight

Copy