LUKAS 22

Yesus ebe wasuogeluk weim abok isukwa wene

(Mat. 26:1-5; Mrk. 14:1-2; Yoh. 11:45-53)

1It afuni Yahudi mene seni enu Paskah ninggi logolik, Linggene Roti Fiterek Lek Meneba werago mene nenggarek oba horogat asi wagaikhemo logolik he,#Kel. 12:1-27 2it ap Allah eisewerek mene inogogwi kaindek inom, Allah ane lisu palek eisewerek mene inom, afuni mondogat inailo nen he, ”Yesus wene ninggi'nogo oba fembik wasuok he,” iluk weim abok ikhi lagaukwa.

Yudas nen Yesus wasuageluk yonggo lagaikhe wene

(Mat. 26:14-16; Mrk. 14:10-11)

3A'nogo weim abok ugu kwelek he, it Yesus agoromi inebe 12 omanogo mene, ekhe enu Yudas Iskariot a'nogo endawimo Iblis kwisikhe. 4Kwisikhemo re, at Yudas, it ap Allah eisewerek mene inogogwi inom, Allah awi wurik kagalek welagaikharek mene inom, inoba lagaikhesik he, ”Yesus andi wasubagaigen he, hinenggiba ninggi'nogo fagain he,” iluk weim abok inom isukwa. 5Inom isukwasik, it ap omanogo inendawimo agaiyegeti logolik he, ”Onggo uang huli yiba wokhesugun,” iluk abok yagatukwa. 6Abok yagatukwama, at Yudas nen he, ”I o,” iluk yagaisasikhesik, ”Afuni inonggot werek kwelek, Yesus ale'ma fano asuak were'ma, mera nen inenggiba fagain he,” iluk weim abok endawimo logolik menenei ebeti lagaikhe.

Wam domba seni Paskah isasugun mene faget tegeli loageluk agoromi lakfisasikhe wene

(Mat. 26:17-25; Mrk. 14:12-21; Yoh. 13:21-30)

7Yudas a'nogo endawimo ebetu kwelek, Linggene Roti Fiterek Lek Meneba werago ninggi logolik, seni Paskah faget wam domba warogo nogoin higit agaikhe. 8Nogoin higit agaikhemo re, at Yesus nen Petrus Yohanes emberek lakfisikhi logolik he, mel yagaisasikhe: ”Nit seni Paskah faget wam domba ninom nouwogen he, lambik weragaisogo tegelogo fembik logoino o,” iluk a'nogo yagaisasikhemo, 9iren he, ”Niren yi mene ti mene o koma tegelogo fembik logogun ninamolo nen egen,” iluk isukwama, 10at Yesus nen he, ”Hit kota a'nogo kwi lambik he, ap ekhe iwak kweang temul mene hilingitarek meneba i hina'luk wagunem hinom ambi asugun a'naga. Ambi asimbik he, ombo'ne lano. Lagunem at aiba kwikhe halok, 11ap awi eisewerek mene andi oba heinok mel iluk wanino: At ninoe wene yaganisikherek mene a'nogo nen he, mel ikhe: An nagoromi nane wili'lagwi mene ninom Pesta Paskah faget domba wam warogo noageluk, o hulu senggelek ki hak fouget fegen, iluk heinok wani lani, iluk lakninobagai wagama wago o, iluk yagatunem, 12aren he, o henambo hokho senggelek mene werago nogoin oba obuluk mondok hilingik oba yagahisagain a'naga re, andomaat yi mene ti mene tegelogo fembik logoino o,” iluk he, lakfisasikhe. 13Lakfisasikhemo, it emberek lagaukwa hak he, aren isikhe hagat, a'nogo were'ma ha lagaukwasik he, Paskah seni a'nogo isasuogeluk domba watukwasik he, weragaisogo tegelogo fesukwa.

Yesus agoromi inom sumburu inom, enggen amusu inom, wurep oba nasukwa wene

(Mat. 26:26-30; Mrk. 14:22-26; 1Kor. 11:23-25)

14Nogoin oba arat asi wagaikhemo re, at Yesus nen he, agoromi lakfisageluk inayonggo fesikhe mene omanogo inom lagaukwasik nouwogeluk hu'lagaukwa. 15Hu'lagaukwasik, aren mel yagaisasikhe: ”An yi enggin ti enggin hugu kwelek noasugun andi, oan hilingnafi'lek werek kwelek, seni Paskah nagoromi ninom nelo e, iluk, nendawimo namolo anggigi hagat ninom nogoin o. 16Ninom yiat naluk hobuk, at Allah nen awe a'ma fisambik ebe mene nogoin andi oan werek kwelek he, yi mene ekhe ninom ninggi'lek logogin o, iluk eberogoat yagahisigi,” iluk yagaisasikhesik he, 17-18hobuk iwak enggen amusu hinago enggim wanhikhesik he, Allah hai warogo, agoromi wogisikhi logolik, mel yagaisasikhe: ”Anggur enggen amusu yi nambik he, an hobuk ekhe ninggi'lek logombigen, huli, at Allah nen awe a'ma fisagain andi huli, hobuk nagain o. Halok, yi waganogo hinonggwaregen sumburogo naluk lobagaigen iluk wokhisigi o,” iluk yagaisasikhe. 19A'nogo yagaisasikhesik, hobuk sumburu roti mene enggim wanhikhesik he, Allah hai warogo nen ebe kurogo re, agoromi sumburisikhi logolik he, mel yagaisasikhe: ”Yi an nebe aro. [An nebe hit faget noatunem wa'lasigin andi, an noba eberek logobagaigen he, yi'nogoat ninggi logoino,” iluk yagaisasikhemo, 20arat nasukwama nen he, iwak enggen amusu hinago a'nogoat wogisikhi logolik he, ”Yi re, an namep aro. Allah nen wene ket mene warogo wokhinabigin, isikhe a'nogo afuni hokhorogoat faget namep wulagaisogo noasugun andiba, ebe asigin o,” iluk sumburogo wogisasikhesik he, mel yagaisasikhe.]#Yer. 31:31-34

21”Nagoromi! Yethani! Ap ekhe sumburu e talek oba nemberek misi'mo ninggi lago mene nen an noasuageluk yonggo lagain o.#Mzm. 41:10 22Yonggo lamo an abat ta'lasi wagagi a'nogo at Allah nen he, at wasuak, iluk anggasikhe higithogoat noasugun meneat he, ap an noasuageluk yonggo lagain mene andi nek he, nendawi e. Alomat lakhagain o,” iluk yagaisasikhemo re, 23it-it mel isukwa: ”Andi sa nen hilingisigin mene ikhe,” iluk he, heinok-hanok ilik lagaukwa.

”Hat kain nogo? Lek, an anggigi,” ilik lagaukwa wene

24A'nogo ilik lagaukwasik he, kain sa, iluk inane sagalhi logolik, mel isukwa: ”Henu werek he hat nogo? An anggigi,” iluk, at ekhe nen ekhe yagatik, ekhe nen ekhe yagatik, inane sagalhukwa.#Mat. 18:1; Mrk. 9:34; Luk. 9:46 25A'nogo ugunem, at Yesus nen it mel yagaisasikhe: ”It afuni endakwe mene andi re, inogogwi inenupogoren inagoromi ferinarek logolik inane ninghogoat, yi mene hilingi'no, ti mene hilingi'no, iluk yagaisigik, nen, it inagoromi nen, ninoe andi fano fetninarek werek, agarek andi hak he,#Mat. 20:25-27; Mrk. 10:42-44 26hiren, a'nogo hilingisugun mondok lego. Halok he, hit mene ekhe nen he, an nenu werek logoile, anggugu halok, hinagorat asuago. Nen, an nen ferinarek logoile, iluk anggugu halok he, hinamingmingenggeat asuago.#Mat. 23:11; Mrk. 9:35 27Hit hinendawimo nen he, ap sa hak kain werek anggegep. At ap hurek logolik sumburu nili'logo mene andi a? Athe, amingmingengge mene nen, at oe noageluk wogosi weri'logo mene andi a. Lego. Kain he, at hurek logolik sumburu nili'logo mene, andi aro. A'nogo meneat he, an hit ninom logolik hinamingmingengge hak hilingiti lagi o.#Yoh. 13:12-15

28Weak hokhorogoat hilingnafu kwelegat he, hit yi nek he, an heraknobagagi'lek ninom mondok welago andi nen he, 29-30An Neisena nen afuni an nawe a'ma ferinarek logouwageluk mennobagasikhe andi hak he, hit ogo re afuni an nawe a'ma fisagain oba andoma sumburu ninggik, i ninggik, ikhi logolik he, hinobuluk talek oba kainat logolik, afuni Israel mene inunggulenu 12 nen omanogo wene inoba figik, kotik, ubagaigen, iluk, hirat menhinobagagi o,” iluk yagaisasikhe.#Mat. 19:28

”Haren Yesus nonggot, iluk labeligin o,” iluk Petrus yagatikhe wene

(Mat. 26:31-35; Mrk. 14:27-31; Yoh. 13:36-38)

31Yesus nen a'nogo yagaisasikhesik he, ekhe Petrus oba mel yagatikhe: ”Simon! Simon! hesanggo holin! Gandum afulfulengge fologo hebisagarek andi hak he, hit mondogat a'nogo, at Iblis nen hinebe folhinabigeluk Allah kino yagatemo aren elok iluk yagate meneat he, 32hat hendawinggen noba himbiret fuluk welagen mene andi maben asinogo iluk he, hat faget an Allah ayonggo arat figimo o. Hafe hebelagen halok he, hagaila'lak yoma haren inendawinggen ago watfisikhi logoino,” iluk yagatikhe. 33A'nogo yagatikhemo, at Petrus nen he, mel yagatikhe: ”Noe e! O afuni inenggi hele warogo fisagarek oba kwelakhobagagik, hebe mondok hoatik, hilinghafu halok he, an nemberegat ninoasuageluk welagi o,” iluk yagatikhe meneat he, 34at Yesus nen he, ”Petrus! Yogondak ayam ane oan igi'lek werek kwelek, haren, Yesus andi re an nonggot, iluk, henggi henagan oba labeligin a'naga o,” iluk yagatikhe.

”Karok inom, yi mene ti mene inom, waluk lano,” iluk yagaisasikhe wene

35At Yesus nen a'nogo yagatikhesik he, at Petrus agaila'lak fena inom lambukhogo mel yagaisasikhe: ”An nen, hit hinarupiah awingga inom, hinasungge inom, hinasepatu inom, waluk lagubo, iluk lakhinobagasigi a'nogo nen he, hit yi mene ti mene legat welagagiba?” iluk yagaisasikhemo, iren he, mel yagatukwa: ”Lego. Elogat welagagu o,” iluk yagatukwama,#Mat. 10:9-10; Mrk. 6:8-9; Luk. 9:3, 10:4 36at Yesus nen he, mel yagaisasikhe: ”Meneat he, yogondak enek he, hinarupiah awingga inom, hinasungge inom, werek halok he, helaluk lani o. Nen, hit ekhe karok weim yafarek mene a'nogo lek halok he, hinasu endakwe laberek mene onggo palogo karok onggo palino. 37An hilingnabugun mene faget lisu palogo fikhi logolik he, At andi afuni inobabut weak hilingitarek mene inom higithogo hilingnafa o, iluk isukwa a'nogo, an noba higit asigin meneat yogondak higit arik weri'lago andi nen yagahisigi o,” iluk yagaisasikhemo,#Yes. 53:12 38iren he, mel yagatukwa: ”Noe. Nit mene karok weim yafarek mene a'nogo pire werek yi han?” iluk inukhasukwama, at Yesus nen he, ”Andi elok werego,” iluk yagaisasikhe.

At Yesus Zaitun punuba lagasikhesik Allah ayonggo fesikhe wene

(Mat. 26:36-46; Mrk. 14:32-42)

39A'nogo yagaisaluk inom wulifukwasik he, o kota a'nogo hebisaluk he, at Yesus Zaitun punuba lagakhi lagaikhe a'nogo hagat lagagunem agoromi ane wanhi lagaukwa mene omanogo ombo'ne lagasukwa. 40Arat lagasukwasik he, mel yagaisasikhe: ”Weak hilingisuageluk hinendawimo kagali wesinogo iluk, sambanat ikhi logoni o,” iluk yagaisasikhesik he, 41at ebe ale'ma tegelogo horogat lagaikhesik, eindep awi yagaisogo samban ikhi logolik, 42mel isikhe: ”Neisena e! Haren fano anggegen halok he, an weaget nabugun mene andi telnabino,” iluk u hak, ”Enggen amusu hinago noageluk wo'nesugun andi, haren an noba nen wokhano. Mene re, an nendawimo anggikhi lagi mene andi lego. We, hat hendawimo anggegen mene andiat hilingnabino o,” iluk yagatikhemo, 43[it malaikat Allah nen yonggo lakfisikherek mene ekhe pogoroba nen oba pi wagaikhesik he, endawinggen ago watfesikhe. 44Endawinggen ago watfesikhe mene re, endawimo mondok weak logolik hobuk samban engginhogo ugunem, likhak mep hangge mene tephigik kweangma ting-tung pisikhe.]

45Samban iluk menlagaikhesik, agoromi omanogo inoba wagaikhe re, it omanogo inendawimo mondok weak agaikhemo andi nen he, nogo ikhi logolik were'ma isa wagaikhe. 46Isa wagaikhesik he, mel yagaisasikhe: ”Hit nenahalok nogo ikhi lagep. Weak hilingisuageluk hinendawimo kagali wesinogo nen he, hinebe hineluk asimbik samban ikhi logoni o,” iluk yagaisasikhe.

Yesus ebe fakfesukwa wene

(Mat. 26:47-56; Mrk. 14:43-50; Yoh. 18:3-11)

47At Yesus nen a'nogo ugu kwelek aremnogoat, at agoromi inebe 12 omanogo mene ekhe enu Yudas a'nogo, yonggo lagaikhesigen ap hokhorogoat woginarek wagaikhesik he, at tak Yesus hai ambe saluk wasigeluk, oba wagaikhe. 48Wagaikhemo, at Yesus nen he, mel yagatikhe: ”Yudas! An abat ta'lasi wagagi a'nogo, afuni nen futnobagaluk noasuageluk, haren hai hambe saluk warogo nebe inenggiba feigeluk wagen?” iluk yagatikhemo, 49it ap Yesus inom welagaukwa mene omanogo nen he, it wagaukwa mene omanogo ineilenggen isaluk he, inendawimo nen, a'nogo hilingisugun higi, anggasukwasik, Yesus mel yagatukwa: ”Noe! Nit karok oba inoasu a? Lega,” iluk, 50heinok wanhi logolik aremnogoat, Yesus agot ekhe nen ap Allah eisewerek mene inoe kain amingmingengge mene ekhe wasigeluk fugethasikhe re, esanggo ebekwe nek sabelogo lakfesikhe. 51A'nogo sabelogo lakfesikhe meneat he, at Yesus nen he, ”O huk! Arat o,” iluk, ap a'nogo esanggo enggi fakfesikhesik he, to'motfesikhe. 52A'nogo to'mot fesikhesik he, at Yesus nen, it ap Allah eisewerek inogogwi kaindek inom, Allah awi wurik kagalek welagaikharek mene inom, inaluendek inom, at ebe fakfouwogeluk wagaukwa mene mondogat mel yagaisasikhe: ”Ap yogot wanhunem fakfisa wagaikharek hak, hiren an a'nogoat faknobagauwageluk karok inom, yei inom, waluk wagep yi ri! 53Hundik-handigat Allah awi wuri'mo hit an ninom logolik faknobagagi'lek welagepsigen he, yogondak yi nek he, o mum eise welagarek mene a'nogo omame agama re, hiren faknobagagun higit obaat wagep yi o,” iluk yagaisasikhe.#Luk. 19:47, 21:37

Petrus nen, ”Yesus andi nonggot,” iluk labelhikhe wene

(Mat. 26:57-58; Mrk. 14:53-54,66-72; Yoh. 18:12-18,25-27)

54At Yesus nen a'nogo yagaisasikhemo, iren at ebe fakfesukwasik he, ap Allah eisewerek inoe kain mene a'nogo aiba waluk lagu kwelek, at Petrus a'nogo hobuk inombo'ne igam-hegam lagaikhe. 55A'nogo laga lagaikhesik, ap kain a'nogo awi lilu afuni endu nonggwalfuluk sogoi sakhikhi logolik hurek were'ma re, inanggele'ma hu'lagaikhe. 56A'nogo hurek were'ma endu amulok yararet hugunem, at helenggerek inamingmingengge mene ekhe eilenggen Petrus yethasikhesik he, eilenggen oba lourogo logolik, mel yagaisasikhe: ”Ap yi ogo re, Yesus inom welagaikha mene aro,” iluk yagaisasikhemo, 57at Petrus nen labelhi logolik he, mel yagatikhe: ”Lego. Hele yi! Ap andi ebe an nonggoro,” iluk yagatikhe. 58A'nogo yagatikhesigen, welagi'legat, ap ekhe nen Petrus eilenggen hasikhesik he, mel yagatikhe: ”Hat yi re, it meneat anggigi,” iluk yagatikhe meneat he, aren he, ”Noe. An lego,” iluk yagatikhe. 59A'nogo yagatikhemo hobuk satu jam hangge welagaukwasigen, ap ekhe nen ane ninghogo it afuni omanogo mel yagaisasikhe: ”Ap yi ebe Galilea meneat he, eberogoat Yesus inom nikhi lagaikha mene aro,” iluk yagaisasikhemo, 60at Petrus nen he, ”Noe! Hat egen andi, An nonggoro,” iluk ugu kwelek aremnogoat he, ayam ane isikhe. 61Isikhemo re, Yesus elokhe hebekhogo eilenggen Petrus yethugunem at Petrus endawimo nen he, mel anggasikhe: ”Eigo! At Yesus nen an yaganeti logolik he, o yogondak sue ayam ane oan igi'lek werek kwelek, haren he, Yesus nonggoro, iluk, henggi henagan oba labeligin, iluk yaganete a'nogo ebe arat labelhi yi,” iluk endawimo ebetikhe. 62Endawimo a'nogo ebetikhesik enda'ma wulifikhesik he, le mondok hokhorogo endawi fit-fit le agaikhe.

Yesus yei watik, inane asegen wokhigik, isukwa wene

(Mat. 26:67-68; Mrk. 14:65)

63At Petrus a'nogo le agu kwelek, it ap Yesus ebe fisogo welagaukwa mene omanogo nen inane asegen wokhigik, yei watik, isukwa. A'nogo hilingiti logolik, 64eilenggen salfesukwasik he, ”Sa nen hoate nogo. Yaganisan ta!” iluk yagatik, 65inane hokhorogoat li'no-pi'norogo enggali watik, ikhi lagaukwa.

Yesus anema wanhukwa wene

(Mat. 26:59-66; Mrk. 14:55-64; Yoh. 18:19-24)

66A'nogo yagati logolik were'ma, o wei isikhemo re, ap Yahudi mene inaluendek omanogo inom, Allah eisewerek mene inogogwi kaindek mene inom, Allah ane lisu palek eisewerek mene inom, andogotukwasik, wene Allah ane faget ero pilingitarek oba andoma were'ma, Yesus waluk inoba kwisukwama re, 67iren mel yagatukwa: ”Allah nen Kristus telinaferek mene ayonggo fuluk lakfei wesigin isikhe a'nogo harara? Hat halok he, yaganisan o,” iluk yagatukwama, at Yesus nen he, mel yagaisasikhe: ”An nen yagahisugunem he, eberogoat iluk hinendawimo futfogoin nogo? 68Heinok wokhisugunem he, onggo yaganesugun nogo? Lego,” iluk yagaisasikhesik, ekhe mel yagaisasikhe: 69”Huli yogondak yi nen he, hobuk an abat ta'lasi wagagi mene neisena Allah omame werek yi mene ti mene hilingisu hagenek a'nogo enggi ebekwe kainat logogin o,” iluk yagaisasikhemo, 70it mondogaren he, mel yagatukwa: ”Halok he, hat Allah amlogo nogo?” iluk yagatukwama, aren he: ”Hit hinonggwaregen egep andi aro,” iluk yagaisasikhemo, 71iren he, mel yagatukwa: ”Afuni nen at weak hilingitunem ineilenggen haga mene wene furogo uageluk nenahalok yerinarek logogun nogo. Wene at onggwaregen ikhe mene arat ninesanggo holho yoma ri!” iluk isukwa.

Currently Selected:

LUKAS 22: inohap

Highlight

Copy